ఖమ్మం బ్యూరో , నవంబర్ - 02(తెలంగాణ ముచ్చట్లు )

వేసవి కాలం, ఎల్నినో ప్రభావాలను సమర్థవంతంగా ఎదుర్కొనేందుకు, జిల్లాలోని అన్ని నివాస ప్రాంతాలలో తాగునీటి ఎద్దడి తలెత్తకుండా ముందస్తు ప్రణాళికలు రూపొందించి అమలు చేయాలని ఖమ్మం జిల్లా కలెక్టర్, డబ్ల్యూఎస్ఎమ్ ఛైర్మన్ దివాకర టి ఎస్ సంబంధిత అధికారులను ఆదేశించారు. సోమవారం కలెక్టరేట్ సమావేశ మందిరంలో తాగునీటి సరఫరా మౌళిక సదుపాయాలపై, అడిగిన వారికి పని కల్పన పై కలెక్టర్, జిల్లా స్థాయి సమీక్షా సమావేశం నిర్వహించారు. 

ఈ సందర్భంగా జిల్లా కలెక్టర్ మాట్లాడుతూ, జిల్లాలోని 21 మండలాల్లో నవంబర్ 09 నుండి నవంబర్ 14 వరకు మండల స్థాయి సమావేశాలను నిర్వహించాలన్నారు. ఇట్టి సమావేశాలలో సర్పంచ్‌లు, పంచాయతీ కార్యదర్శులు, ఎంపీడీఓలు, ఎంపీఓలు మరియు సాంకేతిక సిబ్బంది వంద శాతం భాగస్వామ్యమయ్యేలా చర్యలు తీసుకోవాలని ఆదేశించారు.   

మిషన్ భగీరథ (ఇంట్రా & గ్రిడ్) ఎఈఈ/ఎఈ, ఎంపీఓ, సర్పంచ్‌లు, కార్యదర్శులతో ప్రత్యేక బృందాలను ఏర్పాటు చేసి ప్రతి వీధిలో 24-పాయింట్ల చెక్‌లిస్ట్ ఆధారంగా క్షేత్రస్థాయి తనిఖీలు చేపట్టాలని సూచించారు. క్షేత్రస్థాయి పరిశీలనకు ముందే హ్యాండ్ పంపులు, సింగిల్/త్రీ-ఫేజ్ మోటార్ల మరమ్మతులు, పైప్‌లైన్ లీకేజీల నివారణ, ఓహెచ్‌ఎస్‌ఆర్‌ ట్యాంకుల శుభ్రత, క్రిమిసంహారక చర్యలు పూర్తి చేయాలని అన్నారు. ప్రతి గ్రామ పంచాయతీలో 3 నెలలకు సరిపడా బ్లీచింగ్ పౌడర్ బఫర్ స్టాక్ నిల్వ ఉంచాలని తెలిపారు.  

తక్కువ వర్షపాతం, నీటిమట్టం పడిపోవడం లేదా స్థానిక బోరుబావులు ఎండిపోయిన ప్రాంతాలను గుర్తించి, నీటి ఎద్దడి రాకుండా గ్రామ పంచాయతీ నీటి ట్యాంకర్లను అందుబాటులో ఉంచాలన్నారు. అవసరమైన చోట నిబంధనల ప్రకారం ప్రైవేట్ వ్యవసాయ బావులను అద్దెకు తీసుకోవడానికి ముందస్తు ప్రతిపాదనలు సిద్ధం చేయాలన్నారు. నీటి శుద్ధి కేంద్రాలు, ఇంటేక్ బావులు, పంపింగ్ స్టేషన్లను క్రమం తప్పకుండా తనిఖీ చేసి, కనీస నీటి మట్టాలను నిర్వహించాలని తెలిపారు. అలాగే అన్ని వాటర్ ట్రీట్‌మెంట్ ప్లాంట్లలో 3 నెలలకు సరిపడా ఆలమ్/పిఏసి, క్లోరిన్ నిల్వలు ఉండేలా చూడాలని స్పష్టం చేశారు.  
 
తాగునీటి సమస్యల పరిష్కారానికి టోల్-ఫ్రీ నంబర్ 1916 పై ప్రతి గ్రామ పంచాయతీ పరిధిలో నోటీసు బోర్డులు, డప్పు చాటింపులు, స్థానిక వార్డు గ్రూపుల ద్వారా విస్తృత ప్రచారం కల్పించాలని సూచించారు. రోజువారీ నివేదికలను సేకరిస్తూ, వారపు నివేదికలను సమర్పించాలని ఆదేశించారు.  

తాగునీటి సరఫరాలో నిర్లక్ష్యం వహిస్తే కఠిన చర్యలు ఉంటాయని, అధికారులు సమన్వయంతో పనిచేసి ప్రజలకు ఎలాంటి తాగునీటి ఎద్దడి కలగకుండా చూడాలని కలెక్టర్ హెచ్చరించారు.

ఎల్నినో దృష్ట్యా అడిగిన వారికి పనిదినాలు కల్పించాలని కలెక్టర్ అన్నారు. అన్ని గ్రామపంచాయతీల్లో పనులు గుర్తించి, తదనుగుణంగా చర్యలు తీసుకోవాలని అన్నారు. ఇందిరమ్మ రెండో విడత ఇండ్ల మంజూరు ప్రక్రియను పూర్తి చేసి, నిర్మాణాలు చేపట్టేలా చర్యలు తీసుకోవాలని అన్నారు.

ఈ సమావేశంలో మిషన్ భగీరథ ఎస్ఈ శేఖర్ రెడ్డి, జిల్లా పంచాయతీ అధికారి వినోద్ కుమార్, ఎంపీడీవోలు, ఎంపీవోలు, మిషన్ భగీరథ ఏఈ లు, అధికారులు, తదితరులు పాల్గొన్నారు.

చిల్పూర్, నవంబర్ 2 (తెలంగాణ ముచ్చట్లు):*

ఎమ్మెల్యే కడియం శ్రీహరి, ఎంపీ కడియం కావ్యల ఆదేశంతో మండలంలోని  వెంకటాద్రిపేట గ్రామంలో ఎమ్మెల్సీ ఓట్ల నమోదు కార్యక్రమం జోరుగా సాగింది. ఓటు నమోదు, పరిశీలన కార్యక్రమంలో కాంగ్రెస్ పార్టీ గ్రామ నాయకులు, ఓటర్లు పాల్గొన్నారు.కాంగ్రెస్ పార్టీ గ్రామ శాఖ అధ్యక్షుడు కోడిశాల రవి ఆధ్వర్యంలో ఈ కార్యక్రమం నిర్వహించారు. అర్హత కలిగిన ఓటర్లందరూ తమ పేర్లను నమోదు చేసుకునేలా నాయకులు అవగాహన కల్పించారు. నమోదైన ఓట్లను పరిశీలించి, తప్పులు లేకుండా చూసుకున్నారు.అర్హులైన ప్రతి ఒక్కరూ ఎమ్మెల్సీ ఓటరుగా నమోదు చేసుకోవాలని ఈ సందర్భంగా నాయకులు పిలుపునిచ్చారు.ఈ కార్యక్రమంలో మాజీ ఎంపీటీసీ ఎన్నకూస కుమార్, చిల్పూర్ గుట్ట దేవస్థానం కమిటీ మెంబర్ గుడెల్లి అరుణ రమేష్ రెడ్డి, వార్డ్ మెంబర్ వడ్డేపల్లి పవన్, మంతెన లవన్, వెంకట్ రెడ్డి, రమణారెడ్డి, ప్రసాద్ రెడ్డి, పున్నం చందర్ రెడ్డి, రఘు, రత్నాకర్ పాల్గొన్నారు. ఓటర్లు హర్షవర్ధన్ రెడ్డి, నూనె దేవరాజు, సాంబరాజు తదితరులు పాల్గొన్నారు.

 *ఏసిఎస్ఐఆర్ నుంచి ఇంజినీరింగ్ విభాగంలో పీహెచ్‌డీ పట్టా పొందిన యెదులాపురం రంజిత్ కుమార్*

హుజూరాబాద్,నవంబర్ 02(తెలంగాణ ముచ్చట్లు ):

పట్టణానికి చెందిన యెదులాపురం రంజిత్ కుమార్ ప్రతిష్ఠాత్మక డాక్టర్ ఆఫ్ ఫిలాసఫీ (పీహెచ్‌డీ) పట్టా సాధించి హుజూరాబాద్ ప్రాంతానికి గర్వకారణంగా నిలిచారు. రిటైర్డ్ ఉపాధ్యాయుడు యెదులాపురం రామబ్రహ్మం కుమారుడైన రంజిత్ కుమార్ ఇంజినీరింగ్ విభాగంలో ఉన్నత పరిశోధనలు పూర్తి చేసి ఈ అరుదైన విద్యా ఘనతను సొంతం చేసుకున్నారు.
జాతీయ స్థాయిలో గుర్తింపు పొందిన అకాడమీ ఆఫ్ సైంటిఫిక్ అండ్ ఇన్నోవేటివ్ రీసెర్చ్ (ఏసిఎస్ఐఆర్ ) సంస్థ నుంచి ఆయన ఈ డాక్టరేట్‌ను అందుకున్నారు. పరిశోధనా సంస్థల విభాగంలో ఎన్‌ఐఆర్‌ఎఫ్ (ఎన్ఐఆర్ఎఫ్ ) జాతీయ ర్యాంకింగ్స్‌లో 9వ స్థానంలో నిలిచిన ఈ ప్రతిష్ఠాత్మక సంస్థలో పీహెచ్‌డీ పొందడం విశేషం.
హైదరాబాద్‌లోని ప్రముఖ జాతీయ పరిశోధనా సంస్థ సిఎస్ఐఆర్ –ఇండియన్ ఇన్‌స్టిట్యూట్ ఆఫ్ కెమికల్ టెక్నాలజీ (సిఎస్ఐఆర్ -ఐఐసిటీ )లో యూజీసీ నెట్ జూనియర్ రీసెర్చ్ ఫెలోషిప్ (జెఆర్ఎఫ్ ) సాధించి రంజిత్ కుమార్ తన డాక్టరల్ పరిశోధనను విజయవంతంగా పూర్తి చేశారు. నానోస్ట్రక్చర్డ్ ఐరన్ ఆక్సైడ్లు, ఎంట్రోపీ ఇంజినీర్డ్ స్పినెల్ ఫెర్రైట్ల తయారీ, వాటి లక్షణాల విశ్లేషణతో పాటు అయస్కాంత లక్షణాలు, శక్తి నిల్వ (ఎనర్జీ స్టోరేజ్) రంగాల్లో వాటి వినియోగంపై ఆయన విస్తృతంగా పరిశోధనలు నిర్వహించారు.

స్టేషన్‌ ఘన్‌పూర్, నవంబర్ 2 (తెలంగాణ ముచ్చట్లు):

ఎల్‌నినో ప్రభావంతో జిల్లావ్యాప్తంగా కరువు పరిస్థితులు నెలకొన్నాయని, జనగామ జిల్లాను కరువు జిల్లాగా ప్రకటించి రైతులకు తక్షణమే పంట నష్టపరిహారం అందించాలని సీపీఎం జిల్లా కార్యదర్శివర్గ సభ్యులు రాపర్తి రాజు డిమాండ్ చేశారు.స్టేషన్‌ ఘన్‌పూర్‌లోని సీపీఎం మండల కార్యాలయంలో ఆదివారం జరిగిన మండల కమిటీ సమావేశంలో ఆయన మాట్లాడారు. వర్షాలు సకాలంలో కురవక పంటలు సాగు చేయలేక, సాగు చేసిన రైతులు దిగుబడులు తగ్గి తీవ్రంగా నష్టపోయారన్నారు. జిల్లాలో కేవలం నాలుగు మండలాలను మాత్రమే కరువు మండలాలుగా ప్రకటించడం సరికాదన్నారు.పత్తికి ఎకరాకు రూ.50 వేలు, వరికి ఎకరాకు రూ.30 వేల చొప్పున ఎలాంటి షరతులు లేకుండా నష్టపరిహారం ఇవ్వాలని, గిట్టుబాటు ధర కల్పించి పంటలను ప్రభుత్వమే కొనుగోలు చేయాలని కోరారు. వ్యవసాయ రుణాలు మాఫీ చేసి కొత్త రుణాలు ఇవ్వాలని, ఉపాధి హామీ పనులు విస్తృతంగా చేపట్టి పెండింగ్ వేతనాలు చెల్లించాలని డిమాండ్ చేశారు.రేషన్ కార్డుదారులకు నెలకు 12 కిలోల బియ్యంతో పాటు 14 రకాల నిత్యావసర సరుకులు ఉచితంగా ఇవ్వాలని, అర్హులందరికీ కొత్త రేషన్ కార్డులు మంజూరు చేయాలన్నారు. సమస్యలు పరిష్కరించకుంటే పెద్ద ఎత్తున ఆందోళన చేపడతామని హెచ్చరించారు.సమావేశంలో మండల కార్యదర్శి మునిగెల రమేష్, జిల్లా కమిటీ సభ్యులు భూక్యా చందు నాయక్, తోడెంగల ఐలయ్య, కుర్ర ఉప్పలయ్య, గట్ల మల్లారెడ్డి తదితరులు పాల్గొన్నారు.

ఘన్‌పూర్‌లో గ్రామ ఆరోగ్య, పోషకాహార దినోత్సవం

పాల్గొన్న 17వ వార్డు కౌన్సిలర్ పొన్నం స్వరూప రాజయ్య

స్టేషన్ ఘన్‌పూర్, నవంబర్ 2 (తెలంగాణ ముచ్చట్లు): 

తల్లీబిడ్డల ఆరోగ్య పరిరక్షణే ప్రధాన లక్ష్యంగా స్టేషన్ ఘన్‌పూర్‌లోని ఒకటవ కేంద్రంలో గ్రామ ఆరోగ్య, పోషకాహార దినోత్సవాన్ని నిర్వహించారు. ఈ కార్యక్రమంలో 17వ వార్డు కౌన్సిలర్ పొన్నం స్వరూప రాజయ్య పాల్గొన్నారు.
ఈ సందర్భంగా గర్భిణులకు వైద్య పరీక్షలు నిర్వహించడంతో పాటు చిన్నారులకు వ్యాధి నిరోధక టీకాలు వేశారు. తల్లులు, చిన్నారుల పోషకాహార స్థితిని పరిశీలించి, రక్తహీనత నివారణకు తీసుకోవాల్సిన జాగ్రత్తలపై అవగాహన కల్పించారు. మాతాశిశు మరణాలను తగ్గించేందుకు గర్భిణులు క్రమం తప్పకుండా వైద్య పరీక్షలు చేయించుకోవాలని సూచించారు.

అలాగే వ్యక్తిగత పరిశుభ్రత, పరిసరాల పరిశుభ్రత ప్రాముఖ్యతను వివరించారు. గర్భిణులు, బాలింతలు తీసుకోవాల్సిన పౌష్టికాహారం, చిన్నారుల శారీరక ఎదుగుదల, ఆరోగ్యకరమైన ఆహారపు అలవాట్లపై తల్లులకు అవగాహన కల్పించారు. తల్లీబిడ్డల సంపూర్ణ ఆరోగ్యానికి పోషకాహారంతో పాటు సకాలంలో వైద్య సేవలు పొందడం ఎంతో అవసరమని వివరించారు.
ఈ కార్యక్రమంలో అంగన్‌వాడీ ఉపాధ్యాయురాలు మారేడుపాక లిఖిత భవాని, సహాయకురాలు తాటికొండ బుచ్చమ్మతో పాటు మాచర్ల కోమల, నక్క సుహాసిని, ఈగ సోని, కడమంచి జ్యోతి, గుండె వేణు, గుండె మరియా తదితరులు పాల్గొన్నారు.

500 మందితో ఎల్‌హెచ్‌పీఎస్ ఆధ్వర్యంలో భారీ నిరసన ర్యాలీ

నిందితులను అరెస్ట్ చేయకపోతే పోలీస్‌స్టేషన్ ముట్టడిస్తాం

ఎల్‌హెచ్‌పీఎస్ రాష్ట్ర అధ్యక్షుడు గుగులోతు భీమా నాయక్

పెద్దగూడూరు, నవంబర్ 02 (తెలంగాణ ముచ్చట్లు): 

తెలంగాణ ఉద్యమకారుడు, జర్నలిస్ట్ బానోత్ రామన్న నాయక్‌పై హత్యాయత్నానికి పాల్పడిన నిందితులను తక్షణమే అరెస్ట్ చేసి కఠినంగా శిక్షించాలని డిమాండ్ చేస్తూ లంబాడీ హక్కుల పోరాట సమితి (ఎల్‌హెచ్‌పీఎస్) ఆధ్వర్యంలో పెద్దగూడూరు మండల కేంద్రంలో భారీ నిరసన ర్యాలీ నిర్వహించారు. సుమారు 500 మంది పాల్గొన్న ఈ ర్యాలీలో నిందితులను వెంటనే అరెస్ట్ చేయాలని, బాధితుడికి న్యాయం చేయాలని పెద్ద ఎత్తున నినాదాలు చేశారు.
ఈ సందర్భంగా ఎల్‌హెచ్‌పీఎస్ రాష్ట్ర అధ్యక్షుడు గుగులోతు భీమా నాయక్ మాట్లాడుతూ.. ప్రజా సమస్యలపై నిరంతరం పోరాడుతూ, ప్రజల పక్షాన తన కలంతో గళమెత్తుతున్న తెలంగాణ ఉద్యమకారుడు, జర్నలిస్ట్ రామన్న నాయక్‌పై హత్యాయత్నం జరిగి ఇన్ని రోజులు గడుస్తున్నా పోలీసులు నిందితులను ఎందుకు అరెస్ట్ చేయడం లేదని ప్రశ్నించారు. ఒక జర్నలిస్ట్‌పై, తెలంగాణ ఉద్యమకారుడిపై దాడి జరిగితేనే పోలీసులు స్పందించకపోవడం బాధాకరమని ఆగ్రహం వ్యక్తం చేశారు.
రామన్న నాయక్‌పై హత్యాయత్నానికి పాల్పడిన వారిని గుర్తించి తక్షణమే అరెస్ట్ చేయాలని, వారిపై ఎస్సీ, ఎస్టీ అట్రాసిటీ కేసు నమోదు చేసి కఠిన చర్యలు తీసుకోవాలని డిమాండ్ చేశారు. రౌడీలు, గూండాలను ప్రోత్సహిస్తూ సమాజంలో భయాందోళనలు సృష్టించే వారిని కూడా చట్టప్రకారం శిక్షించాలని అన్నారు.
ప్రజాస్వామ్యంలో ప్రశ్నించే గొంతుకలను భయపెట్టే దాడులను ఎట్టి పరిస్థితుల్లోనూ సహించేది లేదని స్పష్టం చేశారు. పోలీసులు వెంటనే స్పందించి నిందితులను అరెస్ట్ చేయకపోతే పోలీస్‌స్టేషన్ ముట్టడితో పాటు ఎల్‌హెచ్‌పీఎస్ ఆధ్వర్యంలో రాష్ట్రవ్యాప్తంగా ఆందోళన కార్యక్రమాలు చేపట్టి ఉద్యమాన్ని మరింత ఉధృతం చేస్తామని గుగులోతు భీమా నాయక్ హెచ్చరించారు.
ఈ నిరసన కార్యక్రమంలో ఎల్‌హెచ్‌పీఎస్ జిల్లా కార్యనిర్వాహక అధ్యక్షుడు బానోతు చందులాల్ నాయక్, పార్లమెంట్ ఇన్‌చార్జి రాందాస్ నాయక్, ఎన్‌టీవీఎస్ జిల్లా అధ్యక్షుడు వీరేష్ నాయక్, డీఎస్‌ఎఫ్‌ఐ జిల్లా నాయకులు దేవేందర్, చందా, ఈశ్వర్, మల్లు, చంగ్లాల్, శీను నాయక్, శివవర్మ నాయక్, రాము, కిరణ్ తదితరులు పాల్గొన్నారు.

* రోగి మృతిపై సమగ్ర విచారణ జరపాలి.. 

* కెవిపిఎస్ జిల్లా ఉపాధ్యక్షుడు వడ్లూరి కిషోర్ డిమాండ్

జమ్మికుంట, నవంబర్ 02 (తెలంగాణ ముచ్చట్లు):

జమ్మికుంట పట్టణంలోని కార్తికేయ ఆసుపత్రిని నిబంధనలకు విరుద్ధంగా నిర్వహిస్తున్నారని, వెంటనే ఆసుపత్రిని సీజ్ చేయాలని కుల వివక్ష వ్యతిరేక పోరాట సంఘం (కెవిపిఎస్) జిల్లా ఉపాధ్యక్షుడు వడ్లూరి కిషోర్ డిమాండ్ చేశారు. ఈ మేరకు సోమవారం జమ్మికుంట మండల ప్రజా పరిషత్ కార్యాలయంలో సంబంధిత అధికారులకు, ప్రజావాణిలో వినతిపత్రం అందజేశారు.

ఈ సందర్భంగా కిషోర్ మాట్లాడుతూ ఆసుపత్రి భవన నిర్మాణ పనులు కొనసాగుతున్నప్పటికీ వైద్య సేవలు అందిస్తున్నారని ఆరోపించారు. పట్టణంలో జనసాంద్రత అధికంగా ఉన్న ప్రాంతంలో ఆసుపత్రి నిర్వహిస్తుండటంతో వాహనాల పార్కింగ్ సమస్య ఏర్పడి ప్రజలు ఇబ్బందులు ఎదుర్కొంటున్నారని తెలిపారు. గత కొద్ది రోజుల క్రితం ఆసుపత్రికి చికిత్స కోసం వచ్చిన ఓ రోగికి అధిక మోతాదులో మందులు ఇవ్వడం వల్ల మృతి చెందినట్లు ఆరోపించారు. ఈ ఘటనపై కూడా సమగ్ర విచారణ జరపాలని కోరారు.

జిల్లా వైద్య, ఆరోగ్య శాఖ అధికారులు వెంటనే స్పందించి ఆసుపత్రి నిర్వహణకు సంబంధించిన అనుమతులు, వైద్య ప్రమాణాలు, రోగి మృతికి సంబంధించిన ఆరోపణలపై పూర్తిస్థాయి విచారణ చేపట్టి బాధ్యులపై చర్యలు తీసుకోవాలని డిమాండ్ చేశారు. ఆసుపత్రిని సీజ్ చేయాలని, అధికారులు స్పందించని పక్షంలో కెవిపిఎస్ ఆధ్వర్యంలో ఆందోళన కార్యక్రమాలు చేపడతామని హెచ్చరించారు.

నీళ్లున్నా పంటలను ఎండబెట్టారు.. రైతులకు నష్టపరిహారం చెల్లించాలి

-- మాజీ మంత్రి హరీశ్ రావు

పెద్దమందడి,నవంబర్02(తెలంగాణ ముచ్చట్లు):

కాంగ్రెస్ ప్రభుత్వ నిర్లక్ష్యం వల్లే పాలమూరు ప్రాంతంలో రైతులు సాగునీటి కష్టాలు ఎదుర్కొంటున్నారని మాజీ మంత్రి, బీఆర్ఎస్‌ఎల్పీ డిప్యూటీ ఫ్లోర్ లీడర్ హరీశ్ రావు విమర్శించారు. ప్రకృతి వైపరీత్యం వల్ల వచ్చిన కరువు కాదని, ప్రభుత్వ వైఫల్యంతోనే పంటలు ఎండిపోయాయని ఆరోపించారు.వనపర్తి జిల్లా పెద్దమందడి మండలం అల్వాల గ్రామంలో సాగునీరు అందక ఎండిపోయిన వరి పంటలను మాజీ మంత్రి సింగిరెడ్డి నిరంజన్ రెడ్డి, ఇతర పార్టీ నేతలతో కలిసి హరీశ్ రావు పరిశీలించారు. పంటలు ఎండిపోవడంతో ఆవేదన వ్యక్తం చేస్తున్న రైతులను పరామర్శించి ధైర్యం చెప్పారు. అనంతరం నిర్వహించిన రైతు సభలో ఆయన మాట్లాడుతూ.. ఒక్క అల్వాల గ్రామంలోనే సుమారు 250 ఎకరాల్లో పంటలు ఎండిపోయాయని, రాష్ట్రవ్యాప్తంగా 25 లక్షల ఎకరాల వరకు పంట నష్టం జరిగిందని పేర్కొన్నారు.శ్రీశైలం ప్రాజెక్టుకు 221 టీఎంసీలు, జూరాల ప్రాజెక్టుకు 252 టీఎంసీల నీరు వచ్చినా సకాలంలో మోటార్లు నడపక రైతులకు సాగునీరు అందించలేదని ఆరోపించారు. కల్వకుర్తి ఎత్తిపోతల పథకం కింద ఐదు మోటార్లను 24 గంటలు నడిపితే మరిన్ని ఎకరాలకు నీరందించే అవకాశం ఉన్నా ప్రభుత్వం నిర్లక్ష్యం చేసిందన్నారు. కళ్లముందే కృష్ణా జలాలు పారుతున్నా పాలమూరు పొలాలకు నీరు అందకపోవడం బాధాకరమన్నారు.పాలమూరు-రంగారెడ్డి ఎత్తిపోతల పథకంలోని కాలువల్లో పేరుకుపోయిన మట్టిని తొలగించి రిజర్వాయర్లకు నీటిని తరలించాలని డిమాండ్ చేశారు. జూరాల నుంచి మరో 15 రోజుల పాటు నీటిని విడుదల చేసి చేతికొచ్చే దశలో ఉన్న పంటలను కాపాడాలని కోరారు.రైతుల కష్టాలను పట్టించుకోకుండా ప్రభుత్వం నిర్లక్ష్యంగా వ్యవహరిస్తోందని విమర్శించిన హరీశ్ రావు, ఎండిపోయిన పంటలకు వెంటనే నష్టపరిహారం చెల్లించాలని, యాసంగి రైతుబంధు విడుదల చేయాలని డిమాండ్ చేశారు. రైతు కూలీలకు ప్రకటించిన రూ.12 వేల ఆర్థిక సాయం అందించాలని, ఉపాధి కోల్పోయిన వ్యవసాయ కూలీలకు ఉపాధి హామీ పనిదినాలు పెంచాలని కోరారు.తెలంగాణలో నెలకొన్న కరువు పరిస్థితులను పరిశీలించేందుకు కేంద్ర బృందాన్ని పంపించి రైతులను ఆదుకోవాలని కేంద్ర ప్రభుత్వాన్ని డిమాండ్ చేశారు. రైతులు అధైర్యపడవద్దని, వారి సమస్యలపై రాబోయే అసెంబ్లీ సమావేశాల్లో ప్రభుత్వాన్ని నిలదీసి రైతుల పక్షాన పోరాడతామని హామీ ఇచ్చారు.ఈ కార్యక్రమంలో మాజీ మంత్రులు సింగిరెడ్డి నిరంజన్ రెడ్డి, వి. శ్రీనివాస్ గౌడ్, సి. లక్ష్మారెడ్డి, ఎమ్మెల్సీ నవీన్ కుమార్ రెడ్డి, మాజీ ఎమ్మెల్యేలు, బీఆర్ఎస్ రాష్ట్ర నాయకులు, స్థానిక ప్రజాప్రతినిధులు, పార్టీ నాయకులు, కార్యకర్తలు, రైతులు పాల్గొన్నారు.

- రోడ్డుపై ఆరబోసిన ధాన్యాన్ని ఢీకొని వ్యక్తి మృతి.
- ధాన్యం యజమానులదే పూర్తి బాధ్యత: సీఐ తుమ్మలపల్లి శ్రీహరి.

సత్తుపల్లి, నవంబరు 2(తెలంగాణ ముచ్చట్లు):

ప్రభుత్వ రహదారులపై వరి ధాన్యం ఆరబోసి ప్రమాదాలకు కారణమవుతున్న వారిపై క్రిమినల్ కేసులు నమోదు చేస్తామని సత్తుపల్లి సీఐ తుమ్మలపల్లి శ్రీహరి హెచ్చరించారు. ఈ నెల ఒకటో తేదీన సదాశివునిపాలెం గ్రామంలో రోడ్డుపై ఆరబోసిన ధాన్యం కారణంగా జరిగిన ప్రమాదంలో ఓ వ్యక్తి ప్రాణాలు కోల్పోయాడని తెలిపారు. సదాశివునిపాలెం గ్రామానికి చెందిన గాయం రాము, చాట్ల లక్ష్మి అనే ఇద్దరు వ్యక్తులు ప్రభుత్వ రహదారిపై వరి ధాన్యం ఆరబోశారు. అదే సమయంలో తుంబూరు గ్రామానికి చెందిన తురకా రాంబాబు ద్విచక్రవాహనంపై అటుగా వెళ్తూ ధాన్యం కుప్పను ఢీకొట్టాడు. ఈ ప్రమాదంలో వాహనంపై నుంచి రోడ్డుపై పడటంతో తలకు తీవ్ర గాయాలై అక్కడికక్కడే మృతి చెందాడు. ఈ ఘటనపై అందిన ఫిర్యాదు మేరకు రోడ్డుపై ధాన్యం ఆరబోసి ప్రమాదానికి కారణమైన గాయం రాము, చాట్ల లక్ష్మిపై సత్తుపల్లి పోలీస్ స్టేషన్‌లో క్రిమినల్ కేసు నమోదు చేసినట్లు సీఐ తుమ్మలపల్లి శ్రీహరి వెల్లడించారు. ఈ నేపథ్యంలో ఉన్నతాధికారుల ఆదేశాల మేరకు సత్తుపల్లి పోలీస్ స్టేషన్ పరిధిలోని గ్రామాల ప్రజలకు పోలీసులు పలు సూచనలు చేశారు. కొందరు రైతులు ప్రభుత్వ రహదారులపై ధాన్యం ఆరబోయడమే కాకుండా, వాహనాలు ధాన్యం కుప్పలపైకి రాకుండా రోడ్లపై పెద్ద పెద్ద రాళ్లు, ముళ్ల కంచెలు, కట్టెలు ఏర్పాటు చేస్తున్నారని తెలిపారు. దీనివల్ల రోడ్డు ప్రమాదాలు జరిగి విలువైన ప్రాణాలు కోల్పోయే ప్రమాదం ఉందని పేర్కొన్నారు. ఇకపై రహదారులపై ధాన్యం ఆరబోసి ప్రమాదాలకు కారణమైతే సంబంధిత వ్యక్తులపై క్రిమినల్ కేసులు నమోదు చేస్తామని సీఐ హెచ్చరించారు. ఇలాంటి ప్రమాదాలకు ధాన్యం యజమానులే పూర్తి బాధ్యత వహించాల్సి ఉంటుందని స్పష్టం చేశారు. రైతులు తమ పంటను ప్రభుత్వ రహదారులపై కాకుండా ప్రభుత్వం కేటాయించిన ధాన్యం కొనుగోలు కేంద్రాలు (పీపీసీలు) లేదా గ్రామాల్లో అందుబాటులో ఉన్న ప్రత్యామ్నాయ కల్లాల్లో మాత్రమే ఆరబెట్టుకోవాలని సత్తుపల్లి సీఐ తుమ్మలపల్లి శ్రీహరి విజ్ఞప్తి చేశారు.

*రూ.100 కోట్ల నిధుల ఖర్చుపై సమగ్ర విచారణ జరిపించాలి:బీఆర్‌ఎస్‌ నగర అధ్యక్షుడు చల్ల హరి శంకర్.*

కరీంనగర్‌, నవంబర్‌ 2 (తెలంగాణ ముచ్చట్లు):

కరీంనగర్‌ నగరపాలక సంస్థలో బీజేపీ మేయర్‌, డిప్యూటీ మేయర్‌, కార్పొరేటర్లపై వస్తున్న అవినీతి ఆరోపణలపై కేంద్ర హోంశాఖ సహాయ మంత్రి, ఎంపీ బండి సంజయ్‌ సమాధానం చెప్పాలని బీఆర్‌ఎస్‌ నగర అధ్యక్షుడు చల్ల హరి శంకర్‌ డిమాండ్‌ చేశారు. సోమవారం మంకమ్మతోటలోని మీకోసం కార్యాలయంలో నిర్వహించిన విలేకరుల సమావేశంలో ఆయన మాట్లాడుతూ.. నగరంలో జనరల్‌ ఫండ్‌, యూఏడీఎఫ్‌ నిధులు కలిపి సుమారు రూ.100 కోట్లు ఖర్చు చేసినట్లు చెబుతున్నా అభివృద్ధి పనులు ఆశించిన స్థాయిలో కనిపించడం లేదన్నారు. నిధుల వినియోగం, పనుల కేటాయింపు, బిల్లుల చెల్లింపులపై సమగ్ర విచారణ జరిపించాలని కోరారు.

కాంట్రాక్టర్ల నుంచి కమీషన్లు వసూలు చేస్తున్నారనే ఆరోపణలతోపాటు భవన నిర్మాణ అనుమతుల విషయంలోనూ అక్రమాలు జరుగుతున్నాయని ఆరోపించారు. గత ఎనిమిది నెలల 15 రోజుల్లో జారీ చేసిన అనుమతులపై విచారణ జరిపించాలని, కాంట్రాక్టర్లు, భవన యజమానులను విచారిస్తే వాస్తవాలు వెలుగులోకి వస్తాయని అన్నారు. తమ వద్ద ఆడియో, వీడియో రికార్డులతోపాటు ఆధారాలు ఉన్నాయని వెల్లడించారు.

అవినీతి ఆరోపణలు నిజమైతే సంబంధిత కార్పొరేటర్లను పార్టీ నుంచి సస్పెండ్‌ చేస్తారా? బ్లాక్‌లిస్టులో పెడతారా? అని బండి సంజయ్‌ను ప్రశ్నించారు. తమ వద్ద ఉన్న ఆధారాలతో మహాలక్ష్మి ఆలయంలో మీడియా సమక్షంలో ప్రమాణం చేసేందుకు సిద్ధమని, బండి సంజయ్‌ కూడా సిద్ధం కావాలని సవాల్‌ విసిరారు. ఆరోపణలను నిరూపించలేకపోతే క్షమాపణ చెప్పి ముక్కు నేలకు రాస్తానన్నారు. ఆధారాలు బయటపెట్టిన రోజు బండి సంజయ్‌ మంత్రి పదవికి రాజీనామా చేయాల్సి వస్తుందని హెచ్చరించారు.

ఈ సమావేశంలో బీఆర్‌ఎస్‌ నగర ప్రధాన కార్యదర్శి గడ్డం ప్రశాంత్‌ రెడ్డి, మాజీ కార్పొరేటర్‌ అనూప్‌ కుమార్‌, డివిజన్‌ అధ్యక్షులు, పార్టీ నాయకులు పాల్గొన్నారు.

ధర్మసాగర్,నవంబర్02 (తెలంగాణ ముచ్చట్లు): 

రాబోయే పట్టభద్రుల ఎమ్మెల్సీ ఎన్నికల నేపథ్యంలో అర్హులైన పట్టభద్రులందరూ ఓటరుగా నమోదు చేసుకోవాలనే లక్ష్యంతో ధర్మసాగర్ మండల సమన్వయ కమిటీ ఆధ్వర్యంలో ఓటరు నమోదు అవగాహన కార్యక్రమాన్ని నిర్వహించారు.మండలంలోని మల్లక్‌పల్లి, ధర్మాపురం, తాటికాయల, పెద్దపెండ్యాల, కరుణాపురం గ్రామాల్లో కమిటీ సభ్యులు పర్యటించి పట్టభద్రులకు ఓటరు నమోదు ప్రాముఖ్యతను వివరించారు. ప్రజాస్వామ్యంలో ఓటు హక్కు ప్రాధాన్యతను తెలియజేస్తూ, అర్హత కలిగిన ప్రతి పట్టభద్రుడు తప్పనిసరిగా ఎమ్మెల్సీ ఓటరుగా నమోదు చేసుకోవాలని కోరారు.అదేవిధంగా ఓటరు నమోదుకు అవసరమైన ధ్రువపత్రాలు, దరఖాస్తు విధానం తదితర అంశాలపై పట్టభద్రులకు అవగాహన కల్పించారు. అర్హులైన ఒక్క పట్టభద్రుడు కూడా ఓటు హక్కును కోల్పోకుండా ప్రతి ఒక్కరూ నమోదు ప్రక్రియలో భాగస్వాములు కావాలని పిలుపునిచ్చారు.
ఈ కార్యక్రమంలో ధర్మసాగర్ మండల ఎమ్మెల్సీ ఎన్నికల ఇన్‌చార్జులు కర్ర సోమిరెడ్డి, గుర్రపు ప్రవీణ్, మాజీ మండల అధ్యక్షులు మునిగెల రాజు,సీనియర్ నాయకులు సోంపెల్లి కరుణాకర్,ననుబాల చంద్రమౌళి,వల్లాల రాజు  తదితరులు పాల్గొన్నారు.

అక్రమ మైనింగ్‌కు అడ్డుకట్ట వేసేందుకు సమీకృత గ్రావెల్ నిర్వహణ పోర్టల్ ప్రారంభం

ఇక మొబైల్ ద్వారానే దరఖాస్తు.. 

క్యూఆర్ కోడ్‌తో అనుమతుల జారీ

హనుమకొండ జిల్లా కలెక్టర్ చాహత్ బాజ్ పాయి

హనుమకొండ, నవంబర్ 02 (తెలంగాణ ముచ్చట్లు):

జిల్లాలో గ్రావెల్ (మట్టి) తవ్వకాలకు అనుమతుల ప్రక్రియను సులభతరం చేయడంతో పాటు అక్రమ మైనింగ్‌కు అడ్డుకట్ట వేసేందుకు సమీకృత గ్రావెల్ నిర్వహణ విధానాన్ని అమల్లోకి తీసుకువచ్చినట్లు హనుమకొండ జిల్లా కలెక్టర్ చాహత్ బాజ్ పాయి తెలిపారు. ఇందుకోసం ప్రత్యేకంగా రూపొందించిన ఇంటిగ్రేటెడ్ గ్రావెల్ మేనేజ్‌మెంట్ సిస్టం (ఐజీఎంఎస్) పోర్టల్‌ను సోమవారం జిల్లా కలెక్టరేట్‌లో ఆమె లాంఛనంగా ప్రారంభించారు.
ఈ సందర్భంగా నిర్వహించిన మీడియా సమావేశంలో నూతన విధానం అమలు, దరఖాస్తుల ప్రక్రియ, అనుమతుల మంజూరు తదితర అంశాలను కలెక్టర్ వివరించారు. ఈ పోర్టల్ ద్వారా ప్రజలు తమ మొబైల్ నంబర్ నమోదు చేసి, ఓటీపీ ద్వారా లాగిన్ అయి గ్రావెల్ తవ్వకాలకు అనుమతుల కోసం ఆన్‌లైన్‌లో దరఖాస్తు చేసుకోవచ్చని తెలిపారు. దరఖాస్తులను సంబంధిత అధికారులు పరిశీలించి, రెవెన్యూ భూములకు సంబంధించిన అనుమతులను మూడు నుంచి ఐదు రోజుల్లో పరిష్కరించేలా చర్యలు తీసుకుంటున్నట్లు వెల్లడించారు.
సెంటర్ ఫర్ గుడ్ గవర్నెన్స్ సమన్వయంతో ఈ పోర్టల్‌ను అభివృద్ధి చేసినట్లు పేర్కొన్నారు. దరఖాస్తు సమయంలో ఆధార్ తదితర ప్రాథమిక వివరాలతో పాటు గ్రావెల్ ఎక్కడి నుంచి తీసుకోవాలనుకుంటున్నారనే సమాచారం నమోదు చేస్తే సరిపోతుందని తెలిపారు. సొంత పట్టా భూమి నుంచి మట్టి తీసుకోవాలనుకుంటే పట్టాదారు పాస్‌బుక్ ప్రతిని, ఇతరుల పట్టా భూమి నుంచి తీసుకోవాలనుకుంటే భూయజమాని సమ్మతి పత్రాన్ని అప్‌లోడ్ చేయాలని సూచించారు. ప్రభుత్వ భూముల విషయంలో సర్వే నంబర్, భౌగోళిక స్థాన వివరాలను సమర్పించాల్సి ఉంటుందని వివరించారు.
దరఖాస్తుల పరిశీలన కోసం రెవెన్యూ శాఖకు ప్రత్యేకంగా మూడు పేజీల తనిఖీ జాబితాను అందుబాటులో ఉంచినట్లు కలెక్టర్ తెలిపారు. నీటిపారుదల శాఖకు సంబంధించిన అంశాలుంటే ఆ శాఖకు కూడా దరఖాస్తులను పంపిస్తారని, ఆ శాఖ అధికారులు రెండు రోజుల్లో పరిశీలించి తిరిగి రెవెన్యూ శాఖకు పంపిస్తారని చెప్పారు. రెవెన్యూ శాఖ నిరభ్యంతర పత్రం జారీ చేసిన అనంతరం, గ్రావెల్ పరిమాణం ఎక్కువగా ఉన్న సందర్భాల్లో గనుల శాఖ అధికారులు క్షేత్రస్థాయిలో పరిశీలన చేస్తారని తెలిపారు. పరిమాణం తక్కువగా ఉన్న దరఖాస్తులను జిల్లా స్థాయిలో పరిశీలించి అనుమతులు జారీ చేస్తారని వివరించారు.
అనుమతులు మంజూరైన తర్వాత సంబంధిత వివరాలతో కూడిన క్యూఆర్ కోడ్ రూపొందుతుందని కలెక్టర్ వెల్లడించారు. ఎంత పరిమాణంలో గ్రావెల్ తరలించాలి, ఏ ప్రాంతం నుంచి తీసుకెళ్లాలి, గమ్యస్థానం, అనుమతి చెల్లుబాటు సమయం వంటి వివరాలు అందులో ఉంటాయని తెలిపారు. అనుమతి పొందిన ట్రాక్టర్లు, ఇతర వాహనాల నంబర్లను కూడా నమోదు చేస్తారని, ఆ వాహనాల ద్వారానే గ్రావెల్ తరలించాల్సి ఉంటుందని స్పష్టం చేశారు.
ఈ ప్రక్రియలో గ్రామ పంచాయతీ సిబ్బంది కీలక పాత్ర పోషిస్తారని, అనుమతించిన ట్రిప్పుల సంఖ్యతో పాటు వాస్తవంగా తరలించిన ట్రిప్పులను కూడా పర్యవేక్షించాల్సి ఉంటుందని పేర్కొన్నారు. పోర్టల్ వినియోగంపై రెవెన్యూ అధికారులు, పంచాయతీ కార్యదర్శులకు ఇప్పటికే శిక్షణ అందించినట్లు తెలిపారు. గ్రావెల్ అనుమతుల ద్వారా వచ్చే ఆదాయంలో కొంత భాగాన్ని గ్రామ పంచాయతీలకు కేటాయించేలా నిర్ణయం తీసుకున్నట్లు వెల్లడించారు.
ఈ పోర్టల్ ఇసుక అనుమతులకు సంబంధించింది కాదని, కేవలం గ్రావెల్ (మట్టి) తవ్వకాలు, తరలింపునకు మాత్రమే వర్తిస్తుందని కలెక్టర్ స్పష్టం చేశారు. రాష్ట్రంలో ఇసుక కోసం ఇప్పటికే ప్రత్యేక పోర్టల్ అందుబాటులో ఉందని తెలిపారు.
గనుల శాఖ వద్ద ఇప్పటికే మరో పోర్టల్ ఉన్నప్పటికీ, అది ప్రధానంగా జాతీయ రహదారుల వంటి పెద్ద ప్రభుత్వ పనులకు అవసరమైన వేల మెట్రిక్ టన్నుల గ్రావెల్ అనుమతుల కోసం ఉపయోగపడుతోందన్నారు. అయితే గ్రామీణ ప్రాంతాల్లో రహదారుల నిర్మాణం, ఇతర చిన్నచిన్న అభివృద్ధి పనులకు తక్కువ పరిమాణంలో గ్రావెల్ అవసరమైనప్పుడు అనుమతులు పొందడంలో ప్రజలు ఎదుర్కొంటున్న ఇబ్బందులను తొలగించేందుకు ఈ నూతన విధానాన్ని అందుబాటులోకి తీసుకొచ్చినట్లు వివరించారు.
గ్రావెల్ అవసరమైన ప్రతి ఒక్కరూ ఈ పోర్టల్ ద్వారా దరఖాస్తు చేసుకునేలా ప్రజల్లో విస్తృత ప్రచారం కల్పించాలని, నూతన విధానాన్ని ప్రజల్లోకి తీసుకెళ్లేందుకు అధికారులు, మీడియా ప్రతినిధులు సహకరించాలని కలెక్టర్ కోరారు.
ఈ సందర్భంగా మీడియా ప్రతినిధులు అడిగిన పలు సందేహాలను జిల్లా కలెక్టర్, అదనపు కలెక్టర్, గనుల శాఖ సహాయ సంచాలకులు నివృత్తి చేశారు. అనంతరం ఐజీఎంఎస్ పోర్టల్‌కు సంబంధించిన ప్రచార పోస్టర్లను కలెక్టర్, ఇతర అధికారులు ఆవిష్కరించారు.
ఈ సమావేశంలో అదనపు కలెక్టర్ ఎన్. రవి, స్థానిక సంస్థల ఇన్‌ఛార్జి అదనపు కలెక్టర్ శేషాద్రి, డీఆర్వో శ్రీనివాస్, గనుల శాఖ ఏడీ రామాచారి, డీఆర్డీఓ మేన శ్రీను, సీపీఓ సత్యనారాయణరెడ్డి, జీడబ్ల్యూఎంసీ కాజీపేట డిప్యూటీ కమిషనర్ బిర్రు శ్రీనివాస్, సీ సెక్షన్ సూపరింటెండెంట్ చల్లా ప్రసాద్, సీజీజీ ప్రాజెక్ట్ డైరెక్టర్ రాధాకృష్ణ, ఈడీఎంశ్రీధర్ తదితర అధికారులు పాల్గొన్నారు.

వంగాలపల్లి,నవంబర్ 02 (తెలంగాణ ముచ్చట్లు): 

రాబోయే పట్టభద్రుల ఎమ్మెల్సీ ఎన్నికల నేపథ్యంలో అర్హత కలిగిన ప్రతి పట్టభద్రుడు ఓటరుగా నమోదు చేసుకోవాలని వంగాలపల్లి, నష్కల్ గ్రామాల బీఆర్ఎస్ పార్టీ ఎమ్మెల్సీ ఎన్నికల ఇన్‌చార్జి ఆరూరి పవన్ పిలుపునిచ్చారు.
ఈ సందర్భంగా ఆయన మాట్లాడుతూ ప్రజాస్వామ్యంలో ఓటు హక్కు అత్యంత విలువైనదని, పట్టభద్రుల సమస్యలను శాసనమండలిలో బలంగా వినిపించేందుకు ఎమ్మెల్సీ ఎన్నికలు కీలకమని పేర్కొన్నారు. ఈ నేపథ్యంలో వంగాలపల్లి, నష్కల్ గ్రామాల్లోని అర్హులైన పట్టభద్రులందరూ ఓటరు నమోదు ప్రక్రియను సద్వినియోగం చేసుకోవాలని కోరారు.
ముఖ్యంగా యువత, నిరుద్యోగ పట్టభద్రులు ఓటరు నమోదుపై నిర్లక్ష్యం చేయకుండా తమ ఓటు హక్కును పొందాలని సూచించారు. అర్హులైన ప్రతి పట్టభద్రుడిని ఓటరుగా నమోదు చేయించేలా పార్టీ శ్రేణులు సమన్వయంతో కృషి చేయాలని ఆరూరి పవన్ పిలుపునిచ్చారు.

మాదిగ సామాజిక వర్గానికి చట్టసభల్లో సముచిత ప్రాతినిధ్యం కల్పించాలి

తెలంగాణ ఉద్యమంతో పాటు వర్గీకరణ ఉద్యమంలోనూ పనిచేశా.. నాకు అవకాశం ఇవ్వండి

టీపీసీసీ అధ్యక్షుడు మహేష్ కుమార్ గౌడ్‌ను కలిసి విజ్ఞప్తి చేసిన డాక్టర్ పిడమర్తి రవి

హైదరాబాద్ (తెలంగాణ ముచ్చట్లు): 

త్వరలో భర్తీ చేయనున్న గవర్నర్ కోటా ఎమ్మెల్సీ స్థానాల్లో మాదిగ సామాజిక వర్గానికి అవకాశం కల్పించాలని కాంగ్రెస్ పార్టీ రాష్ట్ర నాయకుడు డాక్టర్ పిడమర్తి రవి కోరారు. ఈ మేరకు టీపీసీసీ అధ్యక్షుడు, శాసనమండలి సభ్యుడు మహేష్ కుమార్ గౌడ్‌ను ఢిల్లీలో కలిసి తనకు ఎమ్మెల్సీగా అవకాశం కల్పించాలని విజ్ఞప్తి చేశారు.ఈ సందర్భంగా పిడమర్తి రవి మాట్లాడుతూ.. తెలంగాణ రాష్ట్రంలో అతిపెద్ద సామాజిక వర్గాల్లో ఒకటైన మాదిగలకు రాజకీయంగా సముచిత ప్రాతినిధ్యం కల్పించాల్సిన అవసరం ఉందన్నారు. తెలంగాణ ఉద్యమంతో పాటు మాదిగ వర్గీకరణ ఉద్యమంలోనూ తాను చురుకుగా పనిచేశానని, అయినప్పటికీ కాంగ్రెస్ పార్టీలో తనకు తగిన గుర్తింపు, సముచిత స్థానం లభించలేదని పేర్కొన్నారు.
గవర్నర్ కోటాలో భర్తీ చేయనున్న ఎమ్మెల్సీ స్థానాల్లో మాదిగ సామాజిక వర్గానికి ప్రాధాన్యతనిస్తూ తనకు అవకాశం కల్పించాలని కోరారు. మాదిగలను శాసనమండలికి పంపించడం ద్వారా చట్టసభల్లో ఆ వర్గానికి తగిన ప్రాతినిధ్యం కల్పించాలని మహేష్ కుమార్ గౌడ్‌కు విజ్ఞప్తి చేసినట్లు తెలిపారు.
ముఖ్యమంత్రి రేవంత్ రెడ్డి, కాంగ్రెస్ పార్టీ ఆధ్వర్యంలో మాదిగ వర్గీకరణ సమస్య పరిష్కారమైన నేపథ్యంలో మాదిగ సామాజిక వర్గం తరఫున కృతజ్ఞతలు తెలియజేస్తున్నానని పిడమర్తి రవి అన్నారు. అదే విధంగా రాష్ట్ర ప్రభుత్వంలోనూ మాదిగలకు సముచిత స్థానం కల్పించేలా చర్యలు తీసుకోవాలని కోరారు.ఈ కార్యక్రమంలో మాదిగ రాజకీయ వేదిక రాష్ట్ర అధ్యక్షుడు ఒక్కలగడ్డ చంద్రశేఖర్‌తో పాటు పలువురు మాదిగ నాయకులు పాల్గొన్నారు.

ప్రజల సమస్యల పరిష్కారంలో నిర్లక్ష్యం వహించొద్దు.. 

నిర్ణీత గడువులోగా పరిష్కరించాలి

అధికారులను ఆదేశించిన 
హనుమకొండ జిల్లా కలెక్టర్ చాహత్ బాజ్ పాయి

హనుమకొండ, నవంబర్ 02 (తెలంగాణ ముచ్చట్లు): 

ప్రజావాణి కార్యక్రమంలో ప్రజల నుంచి అందిన అర్జీలను త్వరితగతిన పరిష్కరించేందుకు సంబంధిత అధికారులు తక్షణ చర్యలు చేపట్టాలని హనుమకొండ జిల్లా కలెక్టర్ చాహత్ బాజ్ పాయి ఆదేశించారు. ప్రజా సమస్యల పరిష్కారంలో ఏ అధికారి కూడా నిర్లక్ష్యం వహించరాదని స్పష్టం చేశారు.
సోమవారం హనుమకొండ జిల్లా కలెక్టరేట్‌లోని సమావేశ మందిరంలో వివిధ శాఖల జిల్లా అధికారులతో కలిసి నిర్వహించిన ప్రజావాణి కార్యక్రమంలో కలెక్టర్ ప్రజల నుంచి వినతులు స్వీకరించారు.
ఈ సందర్భంగా కలెక్టర్ మాట్లాడుతూ.. ప్రజావాణి అనేది ప్రజల సమస్యలను నేరుగా తెలుసుకుని పరిష్కరించేందుకు ప్రభుత్వం నిర్వహిస్తున్న అత్యంత ప్రాధాన్యత కలిగిన కార్యక్రమమని పేర్కొన్నారు. ప్రజల నుంచి అందిన ప్రతి అర్జీని బాధ్యతాయుతంగా పరిశీలించి, నిర్ణీత గడువులోగా పరిష్కరించాలని అధికారులకు సూచించారు. వివిధ శాఖలకు సంబంధించిన వినతులు పెండింగ్‌లో ఉండకుండా చర్యలు తీసుకోవాలని, ప్రజలకు మెరుగైన సేవలు అందించేందుకు శాఖల మధ్య సమన్వయంతో పనిచేయాలని ఆదేశించారు.
జిల్లా కలెక్టరేట్‌తో పాటు హనుమకొండ, పరకాల ఆర్డీవో కార్యాలయాలు, ఎంపీడీవో కార్యాలయాల్లో నిర్వహించిన ప్రజావాణి కార్యక్రమానికి మొత్తం 232 అర్జీలు అందాయి. ఇందులో జిల్లా కలెక్టరేట్‌లో 116, ఆర్డీవో కార్యాలయాల్లో 21, ఎంపీడీవో కార్యాలయాల్లో 95 అర్జీలను అధికారులు స్వీకరించారు.
ఈ కార్యక్రమంలో జిల్లా అదనపు కలెక్టర్ ఎన్. రవి, స్థానిక సంస్థల ఇన్‌ఛార్జి అదనపు కలెక్టర్ శేషాద్రి, డీఆర్డీఓ మేన శ్రీను, వివిధ శాఖల జిల్లా అధికారులు పాల్గొన్నారు.

-బీపీసీఎల్ ప్లాంట్ నిర్మాణ సన్నాహాలను తక్షణమే విరమించుకోవాలి

 -దళిత హక్కుల పోరాట సమితి రాష్ట్ర ప్రధాన కార్యదర్శి మారుపాక అనిల్ కుమార్

ఎల్కతుర్తి, నవంబర్ 2 (తెలంగాణ ముచ్చట్లు):

హనుమకొండ జిల్లా ఎల్కతుర్తి మండలం దండేపల్లి గ్రామ శివారులోని ప్రభుత్వ భూమిలో భారత పెట్రోలియం కార్పొరేషన్ లిమిటెడ్ (బీపీసీఎల్) ఇంధన సిలిండర్ల నింపే కేంద్రం నిర్మాణానికి అధికారులు చేస్తున్న సన్నాహాలను తక్షణమే విరమించుకోవాలని దళిత హక్కుల పోరాట సమితి తెలంగాణ రాష్ట్ర ప్రధాన కార్యదర్శి మారుపాక అనిల్ కుమార్ డిమాండ్ చేశారు. పేదల భూములను వారి నుంచి దూరం చేసే ప్రయత్నాలను సహించబోమని, భూ పరిరక్షణ కోసం పోరాటాలను మరింత ఉధృతం చేస్తామని హెచ్చరించారు.

ఈ మేరకు సోమవారం మండల తహసీల్దార్ కార్యాలయం ఎదుట దళిత హక్కుల పోరాట సమితి ఆధ్వర్యంలో ధర్నా నిర్వహించారు. ఈ సందర్భంగా మారుపాక అనిల్ కుమార్ మాట్లాడుతూ.. దండేపల్లి గ్రామ శివారులోని సర్వే నంబర్ 439లో మొత్తం 170 ఎకరాల 27 గుంటల ప్రభుత్వ భూమి ఉందని, 1992లో ఈ భూమిని 299 మంది నిరుపేదలకు పంపిణీ చేసినట్లు తెలిపారు. భూమిలేని పేద కుటుంబాలకు జీవనాధారంగా ఉన్న భూమిలో బీపీసీఎల్ కేంద్రం నిర్మాణానికి సన్నాహాలు చేయడం ఆందోళన కలిగిస్తోందన్నారు.

ఎన్నో ఏళ్లుగా ఈ భూములపై ఆధారపడి జీవిస్తున్న పేద కుటుంబాల భవిష్యత్తును ప్రభుత్వం దృష్టిలో ఉంచుకోవాలని సూచించారు. అభివృద్ధి పేరుతో పేదల జీవనాధారాన్ని దెబ్బతీయడం తగదని, ప్రస్తుతం భూములను సాగు చేసుకుంటున్న వారిని గుర్తించి అర్హులైన సాగుదారులకు చట్టబద్ధమైన హక్కులు కల్పించాలని డిమాండ్ చేశారు.

భూముల స్థితిగతులు, లబ్ధిదారుల హక్కులపై సమగ్ర విచారణ జరిపిన తర్వాతే ప్రభుత్వం నిర్ణయం తీసుకోవాలని కోరారు. బీపీసీఎల్ కేంద్రం నిర్మాణ సన్నాహాలను వెంటనే నిలిపివేసి, భూముల లబ్ధిదారులు, ప్రస్తుత సాగుదారులకు న్యాయం చేయాలని స్పష్టం చేశారు. ప్రభుత్వం స్పందించకపోతే పేదల భూముల పరిరక్షణ కోసం ప్రజలను కలుపుకొని పెద్ద ఎత్తున ఉద్యమాలు చేపడతామని మారుపాక అనిల్ కుమార్ హెచ్చరించారు.

ఈ కార్యక్రమంలో కామెర లక్ష్మణ్, దళిత హక్కుల పోరాట సమితి జిల్లా కార్యదర్శి నిమ్మల మనోహర్, భారత కార్మిక సంఘాల సమాఖ్య జిల్లా కార్యదర్శి కర్రె లక్ష్మణ్, సీపీఐ మండల సహాయ కార్యదర్శి గడ్డం రాజనర్సు, రేణిగుంట్ల సాంబయ్య, గడ్డం సంధ్య, జాజాల సరోజన, జన్ను లింగయ్య, మారుపాక సంపత్, గడ్డం పూల, అజయ్ తదితరులు పాల్గొన్నారు.

పెద్దమందడి,నవంబర్02(తెలంగాణ ముచ్చట్లు):

వనపర్తి జిల్లా పెద్దమందడి మండలం వెల్టూర్ గ్రామంలో విద్యుత్ ట్రాన్స్‌ఫార్మర్లను దొంగలు లక్ష్యంగా చేసుకున్నారు. ట్రాన్స్‌ఫార్మర్లను దొంగలించడమే కాకుండా, వాటిలో ఉండే విలువైన పరికరాలను సైతం అపహరించినట్లు రైతులు తెలిపారు.ప్రస్తుతం పంటలు చేతికొచ్చే సమయంలో విద్యుత్ ట్రాన్స్‌ఫార్మర్లు చోరీకి గురికావడంతో రైతులు తీవ్ర ఆందోళనకు గురవుతున్నారు. విద్యుత్ సరఫరా నిలిచిపోవడంతో వ్యవసాయ పనులకు ఆటంకం ఏర్పడుతోందని, పంటలను కాపాడుకోవడం కష్టంగా మారుతోందని రైతులు ఆవేదన వ్యక్తం చేస్తున్నారు.రైతుల కష్టాలను దృష్టిలో ఉంచుకుని సంబంధిత విద్యుత్ శాఖ అధికారులు వెంటనే స్పందించి చోరీకి గురైన ట్రాన్స్‌ఫార్మర్ల స్థానంలో కొత్త ట్రాన్స్‌ఫార్మర్లను ఏర్పాటు చేసి విద్యుత్ సరఫరాను పునరుద్ధరించాలని రైతులు కోరుతున్నారు. అలాగే ట్రాన్స్‌ఫార్మర్ల చోరీలకు పాల్పడుతున్న వారిని గుర్తించి కఠిన చర్యలు తీసుకోవాలని పోలీసు శాఖను విజ్ఞప్తి చేస్తున్నారు.

పెద్దమందడి,నవంబర్02(తెలంగాణ ముచ్చట్లు):

వనపర్తి జిల్లా పెద్దమందడి మండల పరిధిలోని వీరాయపల్లి గ్రామంలో భూముల రీ-సర్వే ప్రక్రియ ముమ్మరంగా కొనసాగుతోంది. గ్రామంలో ఇప్పటివరకు దాదాపు 500 ఎకరాల భూమికి రీ-సర్వే నిర్వహించినట్లు పెద్దమందడి తహసీల్దార్ మల్లికార్జున్ తెలిపారు.ఈ సందర్భంగా తహసీల్దార్ మాట్లాడుతూ గ్రామంలో రీ-సర్వే పనులను వేగవంతం చేశామని, మిగిలిన భూములకు కూడా సర్వే నిర్వహించి మరో వారం రోజుల్లోగా మొత్తం ప్రక్రియను పూర్తి చేస్తామని వెల్లడించారు. భూముల వివరాలను క్షేత్రస్థాయిలో పరిశీలించి, సర్వే పనులను పకడ్బందీగా నిర్వహిస్తున్నట్లు తెలిపారు.నిర్దేశిత గడువులోగా రీ-సర్వే ప్రక్రియను పూర్తి చేసేందుకు రెవెన్యూ అధికారులు కృషి చేస్తున్నారని తహసీల్దార్ మల్లికార్జున్ పేర్కొన్నారు.

* జ్ఞానేష్ కుమార్ వెంటనే రాజీనామా చేయాలి

* జమ్మికుంట గాంధీ చౌరస్తాలో యూత్ కాంగ్రెస్ శాంతియుత నిరసన

జమ్మికుంట, నవంబర్ 01 (తెలంగాణ ముచ్చట్లు):

దేశ ప్రజాస్వామ్య వ్యవస్థను, రాజ్యాంగ విలువలను పరిరక్షించడంలో కేంద్ర ప్రభుత్వం విఫలమవుతోందని యూత్ కాంగ్రెస్ నాయకులు విమర్శించారు. ఓటు హక్కు పరిరక్షణ కోసం రాహుల్ గాంధీ నేతృత్వంలో ఢిల్లీలోని రాంలీలా మైదానంలో చేపట్టిన మహా మార్చ్‌కు మద్దతుగా ఆదివారం జమ్మికుంట పట్టణంలోని గాంధీ చౌరస్తాలో యూత్ కాంగ్రెస్ మండల అధ్యక్షుడు బుడిగె శ్రీకాంత్ ఆధ్వర్యంలో శాంతియుత నిరసన కార్యక్రమం నిర్వహించారు.

ఈ సందర్భంగా నాయకులు మాట్లాడుతూ.. ప్రజాస్వామ్యంలో ఓటు హక్కు అత్యంత కీలకమని, అర్హులైన ప్రతి పౌరుడికి ఓటు వేసే హక్కును కాపాడాల్సిన బాధ్యత ఎన్నికల సంఘంపై ఉందన్నారు. ఓటర్ల జాబితాల సవరణ పేరుతో అర్హులైన ఓటర్ల ఓట్లను తొలగించే పరిస్థితులు ఏర్పడటం ఆందోళనకరమని పేర్కొన్నారు. ఎన్నికల సంఘం కేంద్ర ప్రభుత్వానికి అనుబంధ సంస్థగా కాకుండా రాజ్యాంగబద్ధమైన స్వతంత్ర సంస్థగా వ్యవహరించాలని సూచించారు.

ఎన్నికల సంఘం పనితీరుపై ప్రజల్లో అనుమానాలు వ్యక్తమవుతున్న నేపథ్యంలో ప్రధాన ఎన్నికల కమిషనర్ జ్ఞానేష్ కుమార్ తన స్వతంత్రతను, పారదర్శకతను నిరూపించుకోవాలని డిమాండ్ చేశారు. రాజ్యాంగ విలువలు, ప్రజల ఓటు హక్కు కంటే రాజకీయ ప్రయోజనాలే ముఖ్యమనే విధంగా వ్యవహరిస్తే ప్రజాస్వామ్యానికి నష్టం వాటిల్లుతుందని ఆవేదన వ్యక్తం చేశారు. ఎన్నికల సంఘంపై ప్రజలకు నమ్మకం కల్పించడంలో విఫలమైన జ్ఞానేష్ కుమార్ తన పదవికి వెంటనే రాజీనామా చేయాలని డిమాండ్ చేశారు.

ఎస్‌ఐఆర్ ప్రక్రియ పేరుతో అర్హులైన ఓటర్ల హక్కులకు భంగం కలగకుండా చూడాలని, ఓటర్ల జాబితా నుంచి ఎవరి పేరునైనా తొలగించే ముందు సరైన విచారణ జరిపి, స్పష్టమైన కారణాలతో నోటీసులు జారీ చేయాలని కోరారు. అభ్యంతరాలు తెలిపేందుకు సంబంధిత ఓటర్లకు తగిన అవకాశం కల్పించాలని అన్నారు. ఓటు హక్కు అనేది ఎవరి దయాదాక్షిణ్యాలపై ఆధారపడినది కాదని, అది రాజ్యాంగం కల్పించిన హక్కు అని స్పష్టం చేశారు.
కేంద్ర హోంమంత్రి అమిత్ షా దేశవ్యాప్తంగా కోట్లాది ఓట్ల తొలగింపునకు సంబంధించి చేసిన ప్రకటనలపై కేంద్ర ప్రభుత్వం స్పష్టత ఇవ్వాలని డిమాండ్ చేశారు. తొలగించిన ఓట్ల సంఖ్య, అందులో అనర్హులైన వారి వివరాలు, నిజమైన ఓటర్ల పరిస్థితి, అక్రమ చొరబాటుదారులుగా గుర్తించిన వారి వివరాలను గణాంకాలతో సహా ప్రజల ముందుంచాలని కోరారు. ఎన్నికల కమిషనర్ల నియామక ప్రక్రియలో కేంద్ర ప్రభుత్వం తీసుకొచ్చిన మార్పులను సమీక్షించి ఎన్నికల సంఘం స్వతంత్రతను కాపాడాలని అన్నారు.

ప్రజాస్వామ్య వ్యవస్థలో ప్రతిపక్షాల ప్రశ్నలకు కేంద్ర ప్రభుత్వం సమాధానం చెప్పాలని, రాజ్యాంగ సంస్థల స్వతంత్రతను గౌరవించాలని హితవు పలికారు. అర్హులైన ప్రతి పౌరుడి ఓటును కాపాడటం, ఎస్‌ఐఆర్ ప్రక్రియలో పారదర్శకత పాటించడం, తొలగించిన ఓట్ల వివరాలను బహిర్గతం చేయడం ప్రభుత్వంతో పాటు ఎన్నికల సంఘం బాధ్యత అని పేర్కొన్నారు. ఓటు హక్కు పరిరక్షణ కోసం, రాజ్యాంగాన్ని కాపాడటం కోసం తమ పోరాటం కొనసాగుతుందని స్పష్టం చేశారు.

ఈ కార్యక్రమంలో యూత్ కాంగ్రెస్ పట్టణ అధ్యక్షుడు వీరమనేని పరుశురాం, సుంకరి రమేష్, జిల్లా ప్రధాన కార్యదర్శి పర్లపెల్లి నాగరాజు, కౌన్సిలర్లు శ్రీపతి నరేష్, ఒగ్గు రమేష్, చందా రాజు, తెలంగాణ ఉద్యమకారుడు అన్నం ప్రవీణ్, కాంగ్రెస్ నాయకులు వాసాల రామస్వామి, యూత్ కాంగ్రెస్ జిల్లా కార్యదర్శి మహేష్, నియోజకవర్గ ప్రధాన కార్యదర్శులు పంజాల అజయ్, గొడుగు మానస, పాతకాల రమేష్, మండల ఉపాధ్యక్షులు దేవునూరి వినయ్, రాచపల్లి సాగర్, ప్రధాన కార్యదర్శి బిజిగిరి శ్రీకాంత్, మండల మహిళా అధ్యక్షురాలు తోట స్వప్న, పిడుగు భాగ్య, వివిధ గ్రామాల కాంగ్రెస్ అధ్యక్షులు, సేవాదళ్ పట్టణ అధ్యక్షుడు బండి పవన్ తదితర నాయకులు, కార్యకర్తలు, యువకులు పాల్గొన్నారు.

*55 ఏళ్ల మహిళ ఆత్మహత్య!*

*భర్త ఫిర్యాదుతో కేసు నమోదు - దర్యాప్తు చేస్తున్న పోలీసులు!*

చిల్పూర్, నవంబర్ 1 (తెలంగాణ ముచ్చట్లు):

చిల్పూర్ మండలం రాజవరం గ్రామంలో విషాద ఘటన చోటుచేసుకుంది. గ్రామానికి చెందిన భూక్య లక్ష్మి (55), అనారోగ్య సమస్యలు, ఆర్థిక ఇబ్బందులతో మనస్తాపానికి గురై వేసుకొని మృతి చెందినట్లు పోలీసులు తెలిపారు.ఈ ఘటనపై ఆమె భర్త రాములు ఇచ్చిన ఫిర్యాదు మేరకు పోలీసులు కేసు నమోదు చేసి, దర్యాప్తు చేపట్టినట్లు చిల్పూర్ పోలీసులు తెలిపారు.మహిళ మృతితో గ్రామంలో విషాదఛాయలు అలుముకున్నాయి.

పెద్దమందడి,నవంబర్01(తెలంగాణ ముచ్చట్లు):

వనపర్తి జిల్లా పెద్దమందడి మండలం వెల్టూర్ గ్రామ సర్పంచ్ అశోక్ తల్లి నాగేంద్రమ్మ దశదిన కార్యక్రమానికి మాజీ మంత్రి సింగిరెడ్డి నిరంజన్ రెడ్డి హాజరై నివాళులర్పించారు. ఈ సందర్భంగా నాగేంద్రమ్మ చిత్రపటానికి పూలమాల వేసి పుష్పాంజలి ఘటించారు. అనంతరం సర్పంచ్ అశోక్ కుటుంబ సభ్యులను పరామర్శించి, వారికి తన ప్రగాఢ సానుభూతిని తెలియజేశారు. నాగేంద్రమ్మ మృతి పట్ల విచారం వ్యక్తం చేస్తూ, ఆమె ఆత్మకు శాంతి చేకూరాలని భగవంతుడిని ప్రార్థించారు.ఈ సందర్భంగా మాజీ మంత్రి నిరంజన్ రెడ్డి మాట్లాడుతూ.. కుటుంబంలో పెద్ద దిక్కుగా ఉన్న వ్యక్తిని కోల్పోవడం ఎంతో బాధాకరమని, తల్లి మరణం కుటుంబ సభ్యులకు తీరని లోటని పేర్కొన్నారు. ఆప్తులను కోల్పోయిన సమయంలో కుటుంబ సభ్యులు ధైర్యంగా ఉండాలని, వారికి మనోధైర్యం కల్పిస్తూ అండగా నిలవాలని అన్నారు. కష్టకాలంలో కుటుంబ సభ్యులకు తన ప్రగాఢ సానుభూతిని తెలియజేస్తూ, ఈ విషాద సమయంలో వారికి మనోధైర్యం కలగాలని ఆకాంక్షించారు.ఈ దశదిన కార్యక్రమంలో కుటుంబ సభ్యులు, బంధుమిత్రులు, స్థానిక ప్రజాప్రతినిధులు, వివిధ పార్టీల నాయకులు, కార్యకర్తలు, గ్రామ పెద్దలు, గ్రామస్థులు తదితరులు పాల్గొని నాగేంద్రమ్మకు నివాళులర్పించారు.

*రైతులకు సాగునీరు అందించాలనే డిమాండ్‌తో 400 కిలోమీటర్ల మహా సైకిల్ యాత్ర.*

*ఐదవ రోజు యాత్రకు గంగాధర ఎక్స్ రోడ్డు వద్ద ఘన స్వాగతం.*

*సైకిల్ తొక్కి సంఘీభావం తెలిపిన మాజీ ఎమ్మెల్యే సుంకె రవిశంకర్.*

గంగాధర, నవంబర్ 1 (తెలంగాణ ముచ్చట్లు):

కాళేశ్వరం ప్రాజెక్టును పూర్తిస్థాయిలో వినియోగంలోకి తీసుకువచ్చి రైతులకు సాగునీరు అందించాలని, రైతాంగ ప్రయోజనాలను కాపాడాలని డిమాండ్ చేస్తూ తెలంగాణ ఉద్యమకారుడు బొడ్డు రవీందర్ ఆధ్వర్యంలో చేపట్టిన 400 కిలోమీటర్ల మహా సైకిల్ యాత్ర ఐదవ రోజుకు చేరుకుంది. మేడిగడ్డ నుంచి కొండపోచమ్మ సాగర్ వరకు కొనసాగుతున్న ఈ యాత్రకు చొప్పదండి నియోజకవర్గంలోని గంగాధర ఎక్స్ రోడ్డు వద్ద ఘన స్వాగతం లభించింది.

ఈ సందర్భంగా మాజీ ఎమ్మెల్యే సుంకె రవిశంకర్ యాత్ర బృందానికి పూలమాలలు వేసి, శాలువాలతో ఘనంగా సత్కరించారు. అనంతరం స్వయంగా సైకిల్ తొక్కుతూ ఐదవ రోజు యాత్రను ప్రారంభించి తన సంఘీభావాన్ని ప్రకటించారు.

కాళేశ్వరం ప్రాజెక్టు ద్వారా రైతులకు పూర్తిస్థాయిలో సాగునీరు అందించాలని, రైతాంగ హక్కులను పరిరక్షించాలని యాత్ర బృందం డిమాండ్ చేసింది. రైతుల సంక్షేమం, సాగునీటి సాధన లక్ష్యంగా ఈ పోరాటం నిరంతరం కొనసాగుతుందని నిర్వాహకులు స్పష్టం చేశారు.

*మానకొండూరులో జిల్లా గవర్నర్ అధికారిక పర్యటన.. ప్రభుత్వ పాఠశాలలకు 1,001 పుస్తకాల పంపిణీ.*

*విద్యార్థులకు క్రీడా సామగ్రి, బాలిక చదువుకు ఆర్థిక సహాయం అందజేత.*

మానకొండూరు, నవంబర్ 1 (తెలంగాణ ముచ్చట్లు):

లయన్స్ క్లబ్ ఆఫ్ కరీంనగర్, జిల్లా 320-జి ఆధ్వర్యంలో జిల్లా గవర్నర్ లయన్ మోర భద్రేశం అధికారిక పర్యటన సందర్భంగా ఆదివారం మానకొండూరులో పలు సేవా కార్యక్రమాలు నిర్వహించారు. లయన్ జి.వి. రామకృష్ణ రావు నాయకత్వంలో ఆయన నివాసంలో ఈ కార్యక్రమాలు చేపట్టారు.

ఈ సందర్భంగా ప్రభుత్వ పాఠశాలల విద్యార్థులకు విద్యను ప్రోత్సహించే ఉద్దేశంతో 1,001 పుస్తకాలను పంపిణీ చేశారు. ప్రభుత్వ పాఠశాలలకు క్రీడా సామగ్రిని అందజేశారు. మానకొండూరులోని మూడు అంబేద్కర్ కమ్యూనిటీ కేంద్రాలకు ప్రజల్లో సామాజిక అవగాహన పెంపొందించేందుకు రోజువారీ దినపత్రికలను అందించారు. లయన్స్ క్లబ్ ద్వారా విద్యా సహాయం పొందుతున్న ఒక బాలిక చదువుల కోసం ఆర్థిక సహాయాన్ని చెక్కు రూపంలో అందజేశారు.

విద్య, క్రీడలు, సామాజిక చైతన్యం, సమాజ అభివృద్ధి లక్ష్యంగా లయన్స్ క్లబ్ చేపడుతున్న సేవా కార్యక్రమాలు అభినందనీయమని నిర్వాహకులు పేర్కొన్నారు. సేవే లక్ష్యంగా ప్రజలకు అండగా నిలవడమే క్లబ్ ప్రధాన ఆశయమని తెలిపారు.

ఈ కార్యక్రమానికి లయన్స్ క్లబ్ ఆఫ్ కరీంనగర్ జిల్లా 320-జి అధ్యక్షుడు లయన్ మైదారం శివకాంత్ అధ్యక్షత వహించగా, కార్యదర్శి లయన్ బత్తో వినోద్, లయన్ కృష్ణ చైతన్య, ఆర్.సి. ఆర్.ఎస్.పి. రెడ్డి, జెడ్.సి. ముక్కా కృష్ణ, పలువురు క్లబ్ సభ్యులు పాల్గొన్నారు.

పెద్దమందడి,నవంబర్01(తెలంగాణ ముచ్చట్లు):

వనపర్తి జిల్లా పెద్దమందడి మండలం వెల్టూర్ గ్రామ సర్పంచ్ అశోక్ తల్లి నాగేంద్రమ్మ దశదిన కర్మ కార్యక్రమంలో వెల్టూర్ మాజీ సర్పంచ్ శ్రీనివాస్ రెడ్డితో పాటు పలువురు గ్రామ నాయకులు పాల్గొని నివాళులర్పించారు. ఈ సందర్భంగా నాగేంద్రమ్మ చిత్రపటానికి పూలమాల వేసి పుష్పాంజలి ఘటించారు. అనంతరం సర్పంచ్ అశోక్ కుటుంబ సభ్యులను పరామర్శించి, వారికి తమ ప్రగాఢ సానుభూతిని తెలియజేశారు.ఈ సందర్భంగా శ్రీనివాస్ రెడ్డి మాట్లాడుతూ.. తల్లిని కోల్పోవడం ఏ కుటుంబానికైనా తీరని లోటని, ఆ బాధను భరించే శక్తిని కుటుంబ సభ్యులకు భగవంతుడు ప్రసాదించాలని ఆకాంక్షించారు. నాగేంద్రమ్మ ఆత్మకు శాంతి చేకూరాలని ప్రార్థిస్తూ, అశోక్ కుటుంబ సభ్యులకు మనోధైర్యం కల్పించారు.ఈ కార్యక్రమంలో శ్రీనివాస్ రెడ్డితో పాటు గ్రామ నాయకులు చింతల వెంకటేశ్వర్లు, దిండు రవీందర్, డీలర్ శ్రీనివాసులు, మిల్లర్ రాజు, కుమ్మరి కొండన్న, కావలి వెంకటయ్య, కావలి తిరుపతయ్య, శివ, బొడ్డప్ప, తదితరులు పాల్గొని నాగేంద్రమ్మకు నివాళులర్పించారు.

వనపర్తి,నవంబర్01(తెలంగాణ ముచ్చట్లు):

పట్టభద్రుల ఓటు నమోదు కార్యక్రమం గడువును మరో 10 రోజులు పొడిగించాలని సాహితీ కళా వేదిక వనపర్తి జిల్లా అధ్యక్షుడు పలుస శంకర్ గౌడ్ ప్రభుత్వాన్ని, ఎన్నికల సంఘాన్ని కోరారు. అర్హత కలిగిన ప్రతి పట్టభద్రుడికి ఓటరుగా నమోదు చేసుకునే అవకాశం కల్పించాలని విజ్ఞప్తి చేశారు.చాలామంది పట్టభద్రులు వివిధ కారణాలతో ఇప్పటివరకు ఓటర్లుగా నమోదు చేసుకోలేకపోయారని తెలిపారు. ఉద్యోగాలు, ఉన్నత చదువులు, ఇతర ప్రాంతాల్లో నివాసం ఉండటం వంటి కారణాలతో నిర్ణీత గడువులోపు దరఖాస్తు చేసుకోలేకపోయారని పేర్కొన్నారు. ముఖ్యంగా గ్రామీణ ప్రాంతాల్లో పట్టభద్రుల ఓటు నమోదు ప్రక్రియపై సరైన అవగాహన లేకపోవడం, ఆన్‌లైన్ దరఖాస్తు సమయంలో ఎదురవుతున్న సాంకేతిక సమస్యలు కూడా నమోదు ఆలస్యానికి కారణమవుతున్నాయని అన్నారు.పట్టభద్రుల ఓటు హక్కు ఎంతో విలువైనదని, ప్రజాస్వామ్య వ్యవస్థలో పట్టభద్రుల భాగస్వామ్యం కీలకమని శంకర్ గౌడ్ పేర్కొన్నారు. అర్హులైన ప్రతి ఒక్కరికీ ఓటు హక్కు వినియోగించుకునే అవకాశం కల్పించాల్సిన బాధ్యత ప్రభుత్వంతో పాటు ఎన్నికల సంఘంపై ఉందన్నారు. ఈ నేపథ్యంలో మానవతా దృక్పథంతో మరో పది రోజుల పాటు గడువు పొడిగిస్తే ఇప్పటివరకు నమోదు చేసుకోలేకపోయిన వేలాది మంది పట్టభద్రులకు ప్రయోజనం చేకూరుతుందని తెలిపారు.ఇప్పటికీ అనేకమంది పట్టభద్రులు ఓటరుగా నమోదు చేసుకునేందుకు ఎదురుచూస్తున్నారని, వారి ఇబ్బందులను దృష్టిలో ఉంచుకుని ఎన్నికల సంఘం వెంటనే స్పందించి గడువు పొడిగింపుపై స్పష్టమైన ప్రకటన విడుదల చేయాలని కోరారు. పట్టభద్రుల గొంతుకగా తాను చేస్తున్న ఈ విజ్ఞప్తిని ప్రభుత్వం, ఎన్నికల సంఘం సానుకూలంగా పరిగణించాలని పలుస శంకర్ గౌడ్ విజ్ఞప్తి చేశారు.

పశువైద్యశాలల్లో వైద్యులు, మందులు అందుబాటులో ఉంచాలి

గొర్రెలు, మేకల పెంపకందారుల సంఘం డిమాండ్

స్టేషన్ ఘన్‌పూర్, నవంబర్ 01 (తెలంగాణ ముచ్చట్లు): 

గొర్రెలు, మేకల పెంపకందారులు ఎదుర్కొంటున్న సమస్యలను ప్రభుత్వం తక్షణమే పరిష్కరించాలని, వాటికి ఉచిత వైద్యం, మందులు, దాణా, తాగునీటి సౌకర్యాలు కల్పించాలని గొర్రెలు, మేకల పెంపకందారుల సంఘం డిమాండ్ చేసింది.
స్టేషన్ ఘన్‌పూర్ మున్సిపల్ పరిధిలోని శివునిపల్లిలో గొర్రెలు, మేకల పెంపకందారుల సహకార సంఘం ముఖ్య నాయకుల సమావేశం పెద్ది వెంకటయ్య అధ్యక్షతన నిర్వహించారు. ఈ సమావేశానికి జిల్లా గౌరవ అధ్యక్షుడు సాదం రమేష్ ముఖ్య అతిథిగా హాజరై మాట్లాడారు.
రాష్ట్ర సంఘం పిలుపు మేరకు అక్టోబర్ 25 నుంచి నవంబర్ 10వ తేదీ వరకు జనగామ జిల్లాలోని అన్ని మండలాల్లో గొర్రెలు, మేకల పెంపకందారుల స్థితిగతులపై క్షేత్రస్థాయి సర్వే నిర్వహిస్తున్నట్లు తెలిపారు. జిల్లా ఉపాధ్యక్షుడు మేకల మల్లేష్ బృందంతో కలిసి గ్రామాల్లో గొల్లకురుమలు ఎదుర్కొంటున్న సమస్యలను పరిశీలిస్తున్నట్లు పేర్కొన్నారు.

గ్రామీణ ప్రాంతాల్లోని పశువైద్యశాలల్లో వైద్యులు అందుబాటులో లేకపోవడం, అవసరమైన మందులు లభించకపోవడంతో పెంపకందారులు ప్రైవేటు మందుల దుకాణాల్లో అధిక ధరలకు మందులు కొనుగోలు చేయాల్సి వస్తోందని ఆవేదన వ్యక్తం చేశారు. వర్షాకాలం, వాతావరణ మార్పుల కారణంగా వచ్చే కాలానుగుణ వ్యాధుల నివారణకు ప్రభుత్వం తగిన చర్యలు తీసుకోవడం లేదన్నారు.గొర్రెలు, మేకలు మేత మేయడానికి ప్రభుత్వ బంజరు భూములు అందుబాటులో లేకపోవడం మరో ప్రధాన సమస్యగా మారిందన్నారు. రానున్న రోజుల్లో ఎల్‌నినో ప్రభావంతో కరువు పరిస్థితులు ఏర్పడితే మేత, తాగునీటి కొరత మరింత తీవ్రమయ్యే ప్రమాదం ఉందని ఆందోళన వ్యక్తం చేశారు. మరోవైపు గ్రామీణ ప్రాంతాల్లో వీధికుక్కల దాడులతో గొర్రెలు, మేకలు మృత్యువాత పడుతున్నాయని, దీంతో పెంపకందారులు ఆర్థికంగా నష్టపోతున్నారని తెలిపారు.

సంఘం ప్రధాన డిమాండ్లు ఇవే..

* గ్రామీణ పశువైద్యశాలల్లో పశువైద్యులను నిరంతరం అందుబాటులో ఉంచాలి.
* గొర్రెలు, మేకలకు అవసరమైన అన్ని రకాల మందులను ఉచితంగా పంపిణీ చేయాలి.
* కరువు పరిస్థితులను దృష్టిలో ఉంచుకుని ప్రభుత్వమే ఉచితంగా దాణా, తాగునీటి సౌకర్యాలు కల్పించాలి.
* వీధికుక్కల దాడుల నుంచి గొర్రెలు, మేకలను రక్షించేందుకు ప్రత్యేక చర్యలు చేపట్టాలి.
* నష్టపోయిన గొల్లకురుమల పెంపకందారులను ప్రభుత్వం ఆర్థికంగా ఆదుకోవాలి.

గొర్రెలు, మేకల పెంపకమే జీవనాధారంగా బతుకుతున్న గొల్లకురుమల సమస్యలపై ప్రభుత్వం తక్షణమే స్పందించి, వారి జీవనోపాధికి భరోసా కల్పించాలని సంఘం నాయకులు డిమాండ్ చేశారు.

స్టేషన్ ఘన్‌పూర్, నవంబర్ 1 (తెలంగాణ ముచ్చట్లు):

స్టేషన్ ఘన్‌పూర్ మున్సిపాలిటీ పరిధిలోని చాగల్లు గ్రామంలో ఆదివారం 8వ వార్డులో బీఆర్ఎస్ పార్టీ ఆధ్వర్యంలో ఇంటింటికీ తిరిగి ఎమ్మెల్సీ ఎన్నికల గ్రాడ్యుయేట్ ఓటు హక్కు నమోదు కార్యక్రమం నిర్వహించారు.ఈ సందర్భంగా గ్రాడ్యుయేట్లను కలిసి ఓటు హక్కు నమోదు చేసుకోవాలని కోరగా, గ్రాడ్యుయేట్లు బీఆర్ఎస్ పార్టీకి పూర్తి మద్దతు ప్రకటించారు. దాదాపు 15 మంది ఓటు హక్కు కోసం దరఖాస్తు చేసుకొని ఐడి నంబర్లు ఇవ్వడం జరిగింది. మరో 10 మంది దరఖాస్తు కోసం ప్రూఫ్స్ ఇవ్వడం జరిగింది.గ్రాడ్యుయేట్ల నుంచి వస్తున్న ఈ స్పందన పట్ల బీఆర్ఎస్ నాయకులు హర్షం వ్యక్తం చేశారు. ఎమ్మెల్సీ ఎన్నికల్లో బీఆర్ఎస్ అభ్యర్థి గెలుపు కోసం ప్రతి గ్రాడ్యుయేట్ ఓటరును నమోదు చేసేలా కృషి చేస్తామని తెలిపారు.
ఈ కార్యక్రమంలో 8వ వార్డు కౌన్సిలర్ పొన్నం రాజేష్, అన్నెపు అనిల్, చిక్కుడు సునీల్, మహమ్మద్ సాదిక్, రంగు రాకేష్, ఆకుల విజయ్, షేక్ ఇమ్రాన్, పొన్నబోయిన శివ, వడ్లకొండ రాంబాబు మరియు బీఆర్ఎస్ కార్యకర్తలు పాల్గొన్నారు.
ఈ కార్యక్రమానికి సహకరించిన గ్రాడ్యుయేట్లకు మరియు తోటి కార్యకర్తలకు నాయకులు హృదయపూర్వక ధన్యవాదాలు తెలిపారు.

*ఘన్‌పూర్‌లో 60 అడుగుల మెగా రోడ్డు!*

*ఎమ్మెల్యే చొరవతో రోడ్డు విస్తరణకు మోక్షం*

*గాంధీ బొమ్మ నుండి బస్టాండ్ వరకు సెంట్రల్ లైటింగ్‌తో కొత్త రూపు!*

*ట్రాఫిక్ రద్దీకి చెక్ - పట్టణ అభివృద్ధిలో కీలక అడుగు!*

స్టేషన్ ఘన్‌పూర్, నవంబర్ 01 (తెలంగాణ ముచ్చట్లు): 

ఎన్నో ఏళ్లుగా స్టేషన్ ఘన్‌పూర్ పట్టణ ప్రజలు ఎదురుచూస్తున్న రోడ్డు విస్తరణకు ఎట్టకేలకు లైన్ క్లియర్ అయింది. ఇరుకైన రోడ్డు, నిత్యం ట్రాఫిక్ జామ్, ప్రభుత్వ కార్యాలయాలకు వెళ్లే ప్రజల అవస్థలు... ఇక అన్నింటికీ తెరపడనుంది.గాంధీ బొమ్మ నుండి బస్టాండ్ వరకు గల ప్రతాప్ టెంట్ హౌస్, పోలీస్ స్టేషన్, ఎమ్మార్వో ఆఫీస్, తెలంగాణ తల్లి విగ్రహం మీదుగా బస్టాండ్ వరకు రోడ్డు విస్తరణతో పాటు సెంట్రల్ లైటింగ్ ఏర్పాటు చేసి, అభివృద్ధికి పెద్దపీట వేయాలనే లక్ష్యంతో ఎమ్మెల్యే కడియం శ్రీహరి ప్రత్యేక చొరవ తీసుకొని రూ. 2 కోట్ల 50 లక్షల నిధులు మంజూరు చేయించారు. టెండర్లు పిలిచి పనులు ప్రారంభించనున్నారు.
ప్రస్తుతం ఉన్న బీటీ రోడ్డు మధ్య నుంచి ఇరువైపులా 30 అడుగుల చొప్పున మొత్తం 60 అడుగుల రహదారిగా అభివృద్ధి చేయనున్నారు. ఇందుకోసం శనివారం అధికారులు మార్కింగ్ కూడా పూర్తి చేశారు. త్వరలోనే అడ్డుగా ఉన్న ప్రహరీ గోడలు, ఇళ్లు, మెట్లను తొలగించి పనులు ప్రారంభించనున్నారు. ప్రభుత్వ కార్యాలయాలు, ప్రభుత్వ ఆసుపత్రి మీదుగా ఈ విస్తరణ జరగనుంది.ఈ పనులు పూర్తయితే పట్టణ అభివృద్ధిలో కీలక అడుగు పడినట్లేనని ప్రజలు ఆశాభావం వ్యక్తం చేస్తున్నారు. రోడ్డు విస్తరణ పనులకు ప్రజలు సహకరించాలని మున్సిపల్ అధికారులు సైతం కోరుతున్నారు.

మున్సిపల్ చైర్మన్ : తాటికొండ వినయ్ కుమార్:*

 "పట్టణ అభివృద్ధి అంటే ఇదే. కేవలం రోడ్డు వేయడం కాదు, భవిష్యత్తు అవసరాలకు తగ్గట్టుగా 60 అడుగుల రోడ్డు వేస్తున్నారు. ఇది ఘన్‌పూర్‌కు ఎంతో అవసరం. వ్యాపారులు, వాహనదారులు కొంత ఇబ్బంది పడినా, భవిష్యత్తు కోసం అందరూ సహకరించాలి. పనులు నాణ్యతగా, త్వరగా పూర్తి చేయాలని కోరుతున్నాం." "మున్సిపాలిటీ అభివృద్ధే మా లక్ష్యం. ఎమ్మెల్యే కడియం శ్రీహరి  సహకారంతో ఈ మెగా రోడ్డు విస్తరణ పనులు చేపడుతున్నాం. మార్కింగ్ పూర్తి చేశాము, త్వరలోనే అడ్డంకులు తొలగించి పనులు ప్రారంభిస్తాం. సెంట్రల్ లైటింగ్‌తో పాటు ఈ రోడ్డును పట్టణానికి ఆదర్శంగా తీర్చిదిద్దుతాం. ప్రజలు సహకరిస్తే పనులు వేగంగా పూర్తవుతాయి

గట్టు ప్రశాంత్, తిరుమలనాథ దేవస్థానం డైరెక్టర్*

 "గతంలో ఉన్న నాయకులు అభివృద్ధిపై ఏనాడూ దృష్టి పెట్టలేదు. ఈ రోడ్డు విస్తరణ కోసం కనీసం ఆలోచించలేదు. ఇరుకైన రోడ్డు వల్ల ప్రతిరోజూ కార్యాలయాలకు వెళ్లే వాహనదారులకు ట్రాఫిక్ సమస్యలు తలెత్తేవి. ఎమ్మెల్యే కడియం శ్రీహరి గారి చొరవ వల్లే ఈ రోడ్డుకు మోక్షం లభించింది. 60 అడుగుల రోడ్డు, సెంట్రల్ లైటింగ్ వస్తే ఘన్‌పూర్ రూపురేఖలే మారిపోతాయి. ప్రజలందరూ సహకరించి ఈ పనులు త్వరగా పూర్తయ్యేలా చూడాలి."

*పొన్నం స్వరూప - రాజయ్య,17 వ వార్డు  కౌన్సిలర్:*

 "బస్టాండ్‌కు, ఆసుపత్రికి, ఎమ్మార్వో ఆఫీస్‌కు వచ్చే వారికి ఇది ప్రధాన రహదారి. ఇప్పుడు విస్తరణ జరుగుతుండటం ఎంతో సంతోషంగా ఉంది. సెంట్రల్ లైటింగ్ వస్తే రాత్రి వేళల్లో కూడా సురక్షితంగా ఉంటుంది. ఎమ్మెల్యే గారికి ప్రత్యేక ధన్యవాదాలు."
ఇరుకైన ఈ రహదారి విస్తరణకు ఎట్టకేలకు మోక్షం లభించిందని, ఎమ్మెల్యే కడియం శ్రీహరి వల్లే ఇది సాధ్యమైందని స్థానికులు హర్షం వ్యక్తం చేస్తున్నారు.

భీమదేవరపల్లి, నవంబర్ 1 (తెలంగాణ ముచ్చట్లు):

భీమదేవరపల్లి మండలం ముల్కనూర్ జిల్లా పరిషత్ ఉన్నత పాఠశాలలో 1988-89 విద్యా సంవత్సరంలో పదో తరగతి వరకు చదువుకున్న పూర్వ విద్యార్థులు ఆదివారం తాము విద్యనభ్యసించిన పాఠశాలలో ఆత్మీయంగా కలుసుకున్నారు.

ఈ సందర్భంగా ఎన్నో ఏళ్ల తర్వాత కలుసుకున్న చిన్ననాటి స్నేహితులు ఒకరినొకరు ఆప్యాయంగా పలకరించుకుంటూ, పాఠశాల రోజుల మధుర జ్ఞాపకాలను నెమరువేసుకున్నారు. తమ జీవిత ప్రయాణంలోని అనుభవాలను పరస్పరం పంచుకుంటూ ఆనందంగా గడిపారు. బాల్య స్నేహబంధాలను మరోసారి గుర్తుచేసుకుంటూ ఉత్సాహంగా సందడి చేశారు.

ఏళ్లు గడిచినా చెక్కుచెదరని స్నేహబంధాలకు ఈ ఆత్మీయ సమ్మేళనం నిదర్శనంగా నిలిచింది. పూర్వ విద్యార్థుల కలయికతో పాఠశాల ప్రాంగణం ఆనందోత్సాహాలతో కళకళలాడింది.

ఐకేపీ కొనుగోలు కేంద్రాలను వెంటనే ప్రారంభించాలి.. మధ్యవర్తుల వ్యవస్థకు తావివ్వకూడదు: మంతుర్తి శ్రీకాంత్ యాదవ్

ఎల్కతుర్తి నవంబర్01 (తెలంగాణ ముచ్చట్లు): 

ధాన్యం కొనుగోళ్లలో జాప్యం చేస్తూ కాంగ్రెస్ ప్రభుత్వం వరి రైతులను ఇబ్బందులకు గురిచేస్తోందని ఎల్కతుర్తి మండల బీజేపీ అధ్యక్షుడు మంతుర్తి శ్రీకాంత్ యాదవ్ విమర్శించారు. మండలంలోని అన్ని గ్రామాల్లో ఐకేపీ ధాన్యం కొనుగోలు కేంద్రాలను వెంటనే ప్రారంభించాలని ఆయన ప్రభుత్వాన్ని డిమాండ్ చేశారు.

నెలల తరబడి కష్టపడి పండించిన వరి పంటను కోసి ధాన్యం విక్రయించేందుకు రైతులు సిద్ధంగా ఉన్నప్పటికీ, కొనుగోలు కేంద్రాలు ప్రారంభించకపోవడంతో రైతులు ఆందోళన చెందుతున్నారని అన్నారు. ప్రభుత్వం ముందస్తు ఏర్పాట్లు చేయకపోవడం వల్ల రైతులు తమ ధాన్యాన్ని ఎక్కడ విక్రయించాలో తెలియని పరిస్థితి ఏర్పడిందని పేర్కొన్నారు.

కొనుగోలు కేంద్రాల ప్రారంభంలో జాప్యం చేస్తే మధ్యవర్తులు, దళారుల వ్యవస్థకు అవకాశం ఏర్పడి రైతులు నష్టపోయే ప్రమాదం ఉందని ఆందోళన వ్యక్తం చేశారు. రైతులు పండించిన ధాన్యాన్ని ప్రభుత్వమే మద్దతు ధరకు కొనుగోలు చేయాలని, గన్నీ సంచులు, హమాలీలు, తూకం యంత్రాలు, రవాణా వంటి సదుపాయాలను ముందుగానే అందుబాటులో ఉంచాలని కోరారు.

ధాన్యం కొనుగోలు చేసిన అనంతరం రైతులకు చెల్లింపులు ఆలస్యం కాకుండా చూడాలని, కొనుగోలు కేంద్రాల ప్రారంభ తేదీలను ప్రభుత్వం స్పష్టంగా ప్రకటించాలని డిమాండ్ చేశారు. ఎన్నికల సమయంలో రైతులకు ఇచ్చిన హామీలను అమలు చేస్తూ, క్షేత్రస్థాయిలో రైతులు ఎదుర్కొంటున్న సమస్యలను పరిష్కరించాలని మంతుర్తి శ్రీకాంత్ యాదవ్ కాంగ్రెస్ ప్రభుత్వాన్ని కోరారు.