ఘనపూర్‌లో ఆరు అడుగుల భారీ బతుకమ్మ!

ఆటపాటలతో సందడి చేసిన ఆడపడుచులు. 

దాండియా ఆడిన మార్వాడీ మహిళలు

స్టేషన్ ఘన్‌పూర్, అక్టోబర్ 10 (తెలంగాణ ముచ్చట్లు): 

తెలంగాణ సంస్కృతి, సంప్రదాయాలకు ప్రతీకగా నిలిచే బతుకమ్మ పండుగ వేడుకలు స్టేషన్ ఘన్‌పూర్ పట్టణంలోని 14వ వార్డు శివాజీ సెంటర్‌లో ఘనంగా నిర్వహించారు. మారేడుపాక రమ ఆధ్వర్యంలో ఏర్పాటు చేసిన ఆరు అడుగుల భారీ బతుకమ్మ వేడుకలకు ప్రత్యేక ఆకర్షణగా నిలిచింది. రంగురంగుల పూలతో అత్యంత అందంగా పేర్చిన భారీ బతుకమ్మపై గౌరమ్మ ప్రతిమను అమర్చి అలంకరించడంతో చూపరులను విశేషంగా ఆకట్టుకుంది. భారీ బతుకమ్మను తిలకించేందుకు స్థానికులు ఆసక్తిగా తరలివచ్చారు.బతుకమ్మ పండుగను పురస్కరించుకుని శివాజీ సెంటర్‌లో పండుగ సందడి నెలకొంది. 14వ వార్డుకు చెందిన ఆడపడుచులు సంప్రదాయ దుస్తులు ధరించి బతుకమ్మలను తీసుకువచ్చి ఒకచోట చేరారు. అనంతరం బతుకమ్మల చుట్టూ తిరుగుతూ సంప్రదాయ పాటలు పాడుతూ, చప్పట్లు కొడుతూ ఉత్సాహంగా ఆటపాటలతో సందడి చేశారు. మహిళల కోలాహలం, బతుకమ్మ పాటలతో పరిసర ప్రాంతాలు పండుగ శోభను సంతరించుకున్నాయి.

ఈ వేడుకల్లో మరో ప్రత్యేకతగా మార్వాడీ మహిళలు సైతం పాల్గొని దాండియా నృత్యాలతో సందడి చేశారు. తెలంగాణ సంప్రదాయ బతుకమ్మ వేడుకల్లో ఇతర ప్రాంతాల మహిళలు కూడా ఉత్సాహంగా భాగస్వాములు కావడం అందరినీ ఆకట్టుకుంది. విభిన్న సంస్కృతులు, సంప్రదాయాలు కలిసిమెలిసి పండుగను జరుపుకోవడం ద్వారా సామాజిక ఐక్యత, సోదరభావం వెల్లివిరిశాయి. మహిళల ఆటపాటలు, దాండియా నృత్యాలతో శివాజీ సెంటర్‌లో సందడిగా పండుగ వాతావరణం నెలకొంది.తెలంగాణ ఆడపడుచులకు ఎంతో ఇష్టమైన బతుకమ్మ పండుగ ప్రకృతిని ఆరాధించే గొప్ప సంప్రదాయానికి ప్రతీక. వివిధ రకాల పూలతో బతుకమ్మలను పేర్చి గౌరమ్మను పూజించడం, సంప్రదాయ పాటలు పాడుతూ ఆటలాడటం ఈ పండుగ ప్రత్యేకత. తరతరాలుగా వస్తున్న ఈ సంస్కృతిని భావితరాలకు అందించడంలో ఇలాంటి వేడుకలు కీలక పాత్ర పోషిస్తాయి.

మారేడుపాక రమ ఆధ్వర్యంలో ఏర్పాటు చేసిన ఆరు అడుగుల భారీ బతుకమ్మ వేడుకల్లో మహిళలు పెద్ద సంఖ్యలో పాల్గొని పండుగను ఆనందోత్సాహాల మధ్య జరుపుకున్నారు. ఈ కార్యక్రమంలో దిడ్డి రోజా, దిడ్డి రజిత, శారద, సల్ల దేవిక, మహేశ్వరం వాణి, కొండూరు కవిత, షరాబు అరుణ, పాలకుర్తి రజిత, వనమాల శ్రావ్య, కుసుమ స్వప్న, శంకేష్ పద్మ, కుంబోజు రాధ, బైరు వరలక్ష్మి, అంజమ్మ, గుండు స్వరూప రాణి, నిఖిల, రమ్య తదితరులు పాల్గొన్నారు.