దళితుల ఆత్మగౌరవానికి నిలువెత్తు నిదర్శనం కాంగ్రెస్ పార్టీ

-అవకాశం వచ్చినప్పుడు మనమే మనవాళ్లను బలపరచాలి

-స్టేషన్ ఘనపూర్ ఎమ్మెల్యే కడియం శ్రీహరి

లింగాల ఘనపూర్,తెలంగాణ ముచ్చట్లు:

దళితులకు రాజకీయ, ఆర్థిక, సామాజిక స్థిరత్వాన్ని అందించిన పార్టీ కాంగ్రెస్ పార్టీ మాత్రమేనని 
స్టేషన్ ఘనపూర్ ఎమ్మెల్యే, మాజీ ఉపముఖ్యమంత్రి కడియం శ్రీహరి
స్పష్టం చేశారు. ఆదివారం లింగాల ఘనపూర్ మండల కేంద్రంలో నిర్వహించిన మాదిగల ఆత్మీయ సమ్మేళనంలో ముఖ్య అతిథిగా పాల్గొన్న ఆయన, గత ప్రభుత్వాల్లో దళితులపై జరిగిన అన్యాయాన్ని విపులంగా వివరించారు.

ఇందిరా గాంధీ నాయకత్వం దళితుల ఆత్మగౌరవానికి మూలాధారం

ఇందిరా గాంధీ హయాంలోనే మాదిగల ఆత్మగౌరవం పరిరక్షించబడిందని, ఆ సిద్ధాంతాన్ని కొనసాగిస్తున్నదే కాంగ్రెస్ పార్టీ అని శ్రీహరి గుర్తు చేశారు. దళితులకు రాజ్యాంగబద్ధ హక్కులను అందించిన అంబేద్కర్ గారు లేకపోతే, ఈ స్థాయికి వచ్చే అవకాశం ఉండేది కాదని చెప్పారు. రాజ్యాంగం వల్లే దళితులు నేటి సమాజంలో గౌరవంగా నిలబడ్డారని తెలిపారు.

అవకాశాల వినియోగంపై స్పష్టమైన సందేశం

‘‘అందరికీ అవకాశాలు ఒకేసారి రావు. వచ్చిన అవకాశాలను సద్వినియోగం చేసుకుంటే గుర్తింపు వస్తుంది. దుర్వినియోగం చేస్తే కనుమరుగవుతారు,’’ అని హితవు పలికారు. ‘‘ఒకరికొకరం సహకరించుకోవాలి. మనవాళ్లకు మనమే అండగా నిలవాలి’’ అని పిలుపునిచ్చారు. అవకాశాన్ని పొందిన వారు పనిచేసే అవకాశం లేకుండా చేసే రాజకీయ వ్యవస్థను ప్రశ్నించారు.

తనపై వచ్చిన ఆరోపణలపై బహిరంగ సవాల్

తన రాజకీయ జీవితం 30 ఏళ్లుగా నిర్దోషంగా సాగిందని, ఇప్పటిదాకా తనపై అవినీతి ఆరోపణలు చేయగలిగినవారు ఎవరూ లేరని ధీమాగా చెప్పారు. ‘‘రెండు వేల ఎకరాలు కబ్జా చేశానన్న ఆరోపణలు, బీఆర్ఎస్ బీ ఫాం కోసం డబ్బులు తీసుకున్నానన్న ఆరోపణలు చేసినవారు ఏమీ నిరూపించలేకపోయారు. నిజంగా నిరూపిస్తే పదవికి రాజీనామా చేసి వాళ్ల ఇళ్లలో గులాంగా పని చేస్తా,’’ అని సవాల్ విసిరారు.

ఇందిరమ్మ ఇళ్లలో దళితులకు పెద్ద పీట 

స్టేషన్ ఘనపూర్ నియోజకవర్గంలో మంజూరైన 3500 ఇళ్లలో 1500 ఇళ్లు దళితులకు కేటాయించినట్లు వెల్లడించారు. అలాగే, లింగాల ఘనపూర్ మండలానికి రాజీవ్ యువ వికాసం పథకం కింద మంజూరైన 640 యూనిట్లలో పార్టీకోసం కృషి చేస్తున్నవారికి ప్రాధాన్యత ఇచ్చినట్లు తెలిపారు.

బీఆర్‌ఎస్ నేతలపై తీవ్ర విమర్శలు

గత ప్రభుత్వంలో నియోజకవర్గాన్ని నేతృత్వం వహించిన ఎమ్మెల్యే పథకాలను, పదవులను అమ్ముకున్నాడని, దళిత బంధు అమలులో దళితులను మోసం చేశాడని ఆరోపించారు. ఇప్పుడు ఆయనను బీఆర్‌ఎస్ కేవలం కడియం శ్రీహరిని తిట్టించే వ్యక్తిగా మాత్రమే తీసుకుందని విమర్శించారు.

సమాన హక్కుల సాధన కోసం కాంగ్రెస్ కృషి

‘‘తెలంగాణలో షెడ్యూల్ కులాల వర్గీకరణ చేసి చట్టబద్ధత కల్పించిన ప్రభుత్వం కాంగ్రెస్‌దే’’ అని గుర్తు చేశారు. దళితుల శ్రేయస్సే తన ముఖ్య ధ్యేయమని, తాను ఎమ్మెల్యేగా ఉన్నంతకాలం ఏ ఒక్క దళిత బిడ్డకూ అన్యాయం జరగనివ్వరని హామీ ఇచ్చారు.

ఈ కార్యక్రమంలో సభా అధ్యక్షుడు గుగ్గిళ్ల నర్సయ్య, మండల కాంగ్రెస్ అధ్యక్షుడు శివ కుమార్, ఎస్సీ సెల్ అధ్యక్షుడు నర్సింగ రమేష్, మాజీ జడ్పిటిసి గుడి వంశీధర్ రెడ్డి, సీనియర్ నాయకులు మల్లారెడ్డి, మండల మాజీ ప్రజాప్రతినిధులు, సమన్వయ కమిటీ సభ్యులు, పార్టీ నాయకులు, కార్యకర్తలు, మహిళలు తదితరులు పాల్గొన్నారు.