పూలవనంలో చిగురించిన ఆశల బతుకమ్మ.

--- ఖమ్మంలో తలసేమియా చిన్నారుల హృదయాలను హత్తుకునే వేడుకలు!
--- ​రక్తదాతలే మా ప్రాణదాతలు.. బంగారు బతుకునివ్వమ్మా గౌరమ్మ!

​ఖమ్మం బ్యూరో , అక్టోబర్ 11(తెలంగాణ ముచ్చట్లు )

​"బతుకమ్మా.. బతుకమ్మ ఉయ్యాలో.. బంగారు బతుకు ఇవ్వమ్మా.. ఉయ్యాలో!" ఆ పసి గొంతుకల నుంచి వెలువడిన ఈ ఆర్తనాదం, ఆనంద కేకలు ఆ ప్రాంగణాన్ని ఒక దివ్యమైన పూల వనంగా మార్చేశాయి. రోజూ మందు బిళ్లలు, సూదిమందుల నడుమ పోరాడే ఆ చిన్నారి ప్రాణాలు, తెలంగాణ సాంస్కృతిక వైభవానికి ప్రతీకైన బతుకమ్మ పండుగ వేళ ఒక్కసారిగా ఉత్సాహంతో ఉప్పొంగాయి.
​సంకల్ప స్వచ్ఛంద సేవా సంస్థ ఆధ్వర్యంలో వైరా రోడ్డులోని రితన్య ఆసుపత్రి ప్రాంగణం ఆదివారం నాడు సరికొత్త శోభను సంతరించుకుంది. తలసేమియా మహమ్మారితో పోరాడుతున్న చిన్నారులు తమ తల్లిదండ్రులతో కలిసి స్వయంగా రంగురంగుల పూలను సేకరించారు. తమ చిన్నారి చేతులతోనే ఎంతో శ్రద్ధగా, భక్తిశ్రద్ధలతో ఒక భారీ బతుకమ్మను తీర్చిదిద్దారు. ​సాంప్రదాయ దుస్తుల్లో ముద్దుముద్దుగా తయారై వచ్చిన ఆ చిన్నారుల ముఖాల్లోని చిరునవ్వులు అందరినీ కంటతడి పెట్టించాయి. గౌరమ్మకు, బతుకమ్మకు ప్రత్యేక పూజలు చేసిన అనంతరం, వారు వలయాకారంగా తిరుగుతూ ఆడిపాడిన తీరు అందరి హృదయాలను హత్తుకుంది. ​ఈ వేడుకల్లో చిన్నారులు చేసిన వేడుక కేవలం ఆటపాటలకే పరిమితం కాలేదు; తమకు ప్రతి నెలా ప్రాణం పోస్తున్న రక్తదాతలను తలుచుకుంటూ వారు భావోద్వేగానికి గురయ్యారు. "మాకు పునర్జన్మ ఇస్తున్న రక్తదాతలను, దేవుళ్లా ఆదుకుంటున్న మనుషులను ఎల్లప్పుడూ చల్లగా చూడమ్మా గౌరమ్మ" అంటూ ఆ చిన్నారులు వేడుకున్న తీరు అక్కడి వారందరి గొంతుకలను మూగబోయేలా చేసింది. ​ఈ మానవీయ వేడుకల్లో ప్రముఖ వైద్యులు డాక్టర్ డి. నారాయణమూర్తి, సంస్థ ఫౌండర్ అనిత, సంస్థ బాధ్యులు ప్రొద్దుటూరి పావని, పి. ఉదయభాస్కర్, పి. రవిచందర్ తదితరులు పాల్గొని చిన్నారులతో పాటు బతుకమ్మ ఆటలాడి, వారిలో ఆత్మస్థైర్యాన్ని నింపారు. పూల పండుగ తెచ్చిన ఈ సంతోషం ఆ చిన్నారుల జీవితాల్లో చిరకాలం నిలవాలని ప్రతి ఒక్కరూ ఆకాంక్షించారు.