*‘వండర్ ఇండియా రికార్డ్స్‌’లో సువర్ణాక్షరాలతో నమోదు*
*రవీంద్రభారతి వేదికగా ప్రతిష్టాత్మక ‘భారత్ గౌరవ్’ పురస్కారం*
హుజూరాబాద్‌, అక్టోబరు 6 (తెలంగాణ ముచ్చట్లు):
హుజూరాబాద్‌ గడ్డ ఖ్యాతి మరోసారి అంతర్జాతీయ స్థాయిలో మార్మోగింది. సమాజ హితం, నిస్వార్థ సేవ, ఆధ్యాత్మిక విలువల పరిరక్షణను లక్ష్యంగా చేసుకుని నిరంతరం సేవలందిస్తున్న ప్రముఖ ఆధ్యాత్మికవేత్త, ప్రజాకవి, మానవ విలువల పరిరక్షణ ట్రస్ట్‌ జాతీయ అధ్యక్షుడు డా. నాగుల సత్యం గౌడ్‌కు అరుదైన గౌరవం దక్కింది. ఆయన చేస్తున్న సామాజిక, ఆధ్యాత్మిక సేవలను గుర్తించిన ప్రతిష్టాత్మక ‘వండర్ ఇండియా రికార్డ్స్‌’ సంస్థ తమ అధికారిక రికార్డుల పుస్తకంలో ఆయన సేవలను నమోదు చేయడంతో పాటు ‘భారత్ గౌరవ్’ పురస్కారంతో ఘనంగా సత్కరించింది.
రవీంద్రభారతిలో ఘన సన్మానం
హైదరాబాద్‌ లక్డీకాపూల్‌లోని రవీంద్రభారతి మెయిన్‌ హాల్‌ వేదికగా గాంధీ జయంతి, దసరా ఉత్సవాల సందర్భంగా నిర్వహించిన వైభవ కార్యక్రమంలో ఈ ప్రతిష్టాత్మక పురస్కారాన్ని ప్రదానం చేశారు. భారత్ వరల్డ్ రికార్డ్, ఏబీసీడీ ఫౌండేషన్ వ్యవస్థాపకులు కదరి వెంకటరమణ రావు సమక్షంలో పలువురు ప్రముఖుల చేతుల మీదుగా సత్యం గౌడ్‌ను ఘనంగా సన్మానించారు.
పట్టుశాలువాతో సత్కరించి, ఐడెంటిటీ కార్డు, అంతర్జాతీయ రికార్డు పతకాన్ని అందజేయడంతో పాటు ప్రశంసాపత్రం, ప్రతిష్టాత్మక ‘భారత్ గౌరవ్’ అవార్డును అందించి అభినందించారు.
మానవీయ విలువలకు పెద్దపీట
ఈ సందర్భంగా ముఖ్య అతిథులు మాట్లాడుతూ.. సత్యం గౌడ్‌ తన రచనలు, ఉపన్యాసాల ద్వారా సమాజంలో మానవీయ విలువలను పెంపొందిస్తూ, ఆధ్యాత్మిక జ్ఞానాన్ని ప్రజలకు చేరువ చేస్తున్నారని కొనియాడారు. ఆయన చేస్తున్న నిస్వార్థ సేవలు నేటి యువతకు, సమాజానికి స్ఫూర్తిదాయకమని పేర్కొన్నారు.
అహింసా మార్గమే సమాజ వికాసానికి రాజమార్గం
పురస్కారం అందుకున్న డా. నాగుల సత్యం గౌడ్‌ మాట్లాడుతూ.. సమాజ వికాసానికి అహింసా మార్గమే ప్రధాన రాజమార్గమని అన్నారు. ప్రతి ఒక్కరూ స్వార్థాన్ని వీడి లోకకళ్యాణంలో భాగస్వాములు కావాలని పిలుపునిచ్చారు. యువత, విద్యార్థులు చెడు వ్యసనాలకు దూరంగా ఉంటూ ఉన్నత లక్ష్యాలను నిర్దేశించుకుని దేశ పురోగతిలో భాగస్వాములు కావాలని సూచించారు.
కళాకారులు, రచయితలను ప్రోత్సహిస్తూ వారి ప్రతిభకు గుర్తింపు అందిస్తున్న సంస్థల కృషిని ఆయన అభినందించారు.
హుజూరాబాద్‌ నుంచి అంతర్జాతీయ ఖ్యాతి
ఈ కార్యక్రమంలో వినియోగదారుల ఫోరం చైర్మన్ మందడి కృష్ణారెడ్డి, సరస్వతీ ఉపాసకులు దైవజ్ఞశర్మ, సీఏ ప్రతినిధి బొగ్గారపు భాగ్యలక్ష్మి, ప్రధాన నృత్య గురువులు పి. రంగనాయకి, వినయ్ రాథోడ్, అసలం, ఆదర్శ ఫౌండేషన్ నిర్వాహకులు కుసుమ భోగరాజు, తోట వందన, పల్లి శిరీష, కీర్తన తదితరులతో పాటు పలువురు రచయితలు, కళాకారులు, సామాజికవేత్తలు పాల్గొన్నారు.
హుజూరాబాద్‌ ముద్దుబిడ్డ డా. నాగుల సత్యం గౌడ్‌ అంతర్జాతీయ స్థాయిలో ప్రతిష్టాత్మక గుర్తింపు పొందడం పట్ల నియోజకవర్గ ప్రజలు, ఉమ్మడి కరీంనగర్‌ జిల్లా ప్రజలు, సాహితీ ప్రముఖులు హర్షం వ్యక్తం చేశారు. ఆయనకు అభినందనలు తెలుపుతూ మరిన్ని ఉన్నత శిఖరాలను అధిరోహించాలని ఆకాంక్షించారు.
Comments