సూరారం ప్రజల సహనానికి పరీక్ష.. గ్యాస్ దుర్వాసనపై ఫిర్యాదు.

ఎల్కతుర్తి, అక్టోబర్ 5 (తెలంగాణ ముచ్చట్లు):

హన్మకొండ జిల్లా ఎల్కతుర్తి మండలంలోని సూరారం గ్రామ ప్రజలకు రిలయన్స్ గ్యాస్ ప్లాంట్ ప్రాంతం నుంచి వెలువడుతున్న దుర్వాసన తీవ్ర ఇబ్బందులకు గురిచేస్తోందని గ్రామస్తులు ఆవేదన వ్యక్తం చేశారు. గ్రామానికి సుమారు కిలోమీటర్ దూరంలో ఉన్న గ్యాస్ ప్లాంట్ ప్రాంతం నుంచి తరచూ విపరీతమైన దుర్వాసన వస్తుండటంతో ప్రజలు ఇబ్బందులు ఎదుర్కొంటున్నారని తెలిపారు.
సోమవారం సూరారం గ్రామానికి చెందిన ప్రజలు ఎల్కతుర్తి ఎంపీడీవో కార్యాలయంలో నిర్వహించిన ప్రజావాణిలో అధికారులకు వినతిపత్రం సమర్పించారు. ముఖ్యంగా రాత్రి వేళల్లో దుర్వాసన తీవ్రత పెరుగుతోందని, దీంతో ఇళ్లలో ప్రశాంతంగా నిద్రపోలేని పరిస్థితి నెలకొందని గ్రామస్తులు తెలిపారు.
దుర్వాసన కారణంగా వృద్ధులు, చిన్నారులు ఇబ్బందులు పడుతున్నారని, దగ్గు, తుమ్ములు, ఆయాసం వంటి సమస్యలు ఎదురవుతున్నాయని వారు పేర్కొన్నారు. ముఖ్యంగా పిల్లలకు చాలా ఇబ్బందిగా ఉంటోందని, దుర్వాసన కారణంగా శ్వాస సంబంధిత ఇబ్బందులు కలుగుతున్నాయని గ్రామస్తులు ఆవేదన వ్యక్తం చేశారు. కొన్ని సమయాల్లో దుర్వాసన భరించలేక ఇళ్లలో ఉండలేని పరిస్థితి ఏర్పడుతోందని తెలిపారు.
గ్యాస్ ప్లాంట్ నుంచి వెలువడుతున్న దుర్వాసనకు అసలు కారణాలను అధికారులు వెంటనే గుర్తించి తగిన చర్యలు చేపట్టాలని గ్రామస్తులు కోరారు. కాలుష్య నియంత్రణ శాఖ అధికారులు ప్లాంట్‌ను తక్షణమే తనిఖీ చేసి, నిబంధనలు పాటిస్తున్నారో లేదో పరిశీలించాలని విజ్ఞప్తి చేశారు.
ప్రజల ఆరోగ్యాన్ని దృష్టిలో ఉంచుకుని సమస్యకు శాశ్వత పరిష్కారం చూపాలని, అవసరమైతే దుర్వాసనకు కారణమవుతున్న కార్యకలాపాలను తాత్కాలికంగా నిలిపివేసి పరిస్థితిని చక్కదిద్దాలని గ్రామస్తులు డిమాండ్ చేశారు. గ్యాస్ ప్లాంట్ యాజమాన్యం కూడా భద్రతా, పర్యావరణ నిబంధనలను కచ్చితంగా పాటిస్తూ ప్రజలకు, ముఖ్యంగా చిన్నారులకు ఎలాంటి ఇబ్బందులు కలగకుండా చర్యలు తీసుకోవాలని కోరారు.

నడిపెల్లి సుధీర్ కుమార్ విజ్ఞాన్ విద్యాలయం సూరారం ప్రధానోపాధ్యాయుడు మాట్లాడుతూ.. 

ప్రజల ఆరోగ్యంపై ప్రభావం చూపుతున్న గ్యాస్ దుర్వాసన సమస్యను అధికారులు తక్షణమే పరిష్కరించాలని కోరారు. ముఖ్యంగా పిల్లలకు శ్వాస సంబంధిత ఇబ్బందులు కలుగుతున్నందున సమస్యను అత్యవసరంగా పరిష్కరించాల్సిన అవసరం ఉందన్నారు. ప్లాంట్ నుంచి వెలువడుతున్న దుర్వాసనకు కారణాలను గుర్తించి, కాలుష్య నియంత్రణ శాఖ అధికారులు సమగ్రంగా తనిఖీలు నిర్వహించాలని అన్నారు. ప్రజలకు ఇబ్బందులు కలగకుండా గ్యాస్ ప్లాంట్ యాజమాన్యం భద్రతా, పర్యావరణ నిబంధనలను కచ్చితంగా పాటించాలని సూచించారు.
ప్రజావాణిలో సమర్పించిన వినతిపత్రంపై అధికారులు స్పందించి సమస్యను ఎప్పుడు పరిష్కరిస్తారో వేచి చూడాల్సి ఉంది.