హాస్టళ్ల అభివృద్ధికి నిధులు ఇవ్వాలి.!

మంత్రి అడ్లూరి లక్ష్మణ్‌కుమార్‌కు ఎమ్మెల్యే రాగమయి వినతి.

సత్తుపల్లి, సెప్టెంబరు 23 (తెలంగాణ ముచ్చట్లు):

నియోజకవర్గంలోని సంక్షేమ హాస్టళ్లలో మౌలిక వసతుల అభివృద్ధికి నిధులు మంజూరు చేయాలని ఎమ్మెల్యే మట్టా రాగమయి దయానంద్‌ కోరారు. ఈ మేరకు బుధవారం హైదరాబాద్‌ సచివాలయంలో ఎస్సీ, ఎస్టీ సంక్షేమ శాఖ మంత్రి అడ్లూరి లక్ష్మణ్‌కుమార్‌ను కలిసి వినతిపత్రం అందజేశారు. సత్తుపల్లి నియోజకవర్గంలోని ఎస్సీ, ఎస్టీ, బీసీ, మైనారిటీ సంక్షేమ హాస్టళ్లలో విద్యార్థులు ఎదుర్కొంటున్న సమస్యలను మంత్రి దృష్టికి తీసుకెళ్లారు. హాస్టళ్లలో అవసరమైన మౌలిక సదుపాయాలు కల్పించేందుకు అభివృద్ధి పనులు చేపట్టాలని, ఇందుకు నిధులు మంజూరు చేయాలని కోరారు. విద్యార్థుల భద్రతను దృష్టిలో ఉంచుకుని హాస్టళ్ల పరిసరాల్లో సోలార్‌ ఫెన్సింగ్‌ ఏర్పాటు చేయాలని విజ్ఞప్తి చేశారు. విద్యార్థులకు సురక్షితమైన, మెరుగైన వాతావరణం కల్పించేందుకు ప్రభుత్వం నుంచి అవసరమైన సహకారం అందించాలని కోరినట్లు ఎమ్మెల్యే తెలిపారు.