పద్మశాలి ఐక్యతకు అభినందనీయ నిర్ణయం.

* ఎన్.ఎం. రమేష్ స్వచ్ఛందంగా పోటీ నుంచి తప్పుకోగా

* అరకాల వీరేశలింగం ఏకగ్రీవ ఎన్నిక

జమ్మికుంట, సెప్టెంబర్ 23 (తెలంగాణ ముచ్చట్లు):

జమ్మికుంట పట్టణ పద్మశాలి సేవా సమితి, పద్మశాలి కుల సంఘం ఎన్నికల్లో పద్మశాలి ఐక్యతకు ప్రతీకగా అభినందనీయ పరిణామం చోటుచేసుకుంది. ఎన్నికల్లో పోటీ చేస్తున్న అరకాల వీరేశలింగం, ఎన్.ఎం. రమేష్‌లలో ఎన్.ఎం. రమేష్ స్వచ్ఛందంగా ఎన్నికల బరి నుంచి తప్పుకుని, అరకాల వీరేశలింగానికి సంపూర్ణ మద్దతు ప్రకటించారు. ఈ మేరకు ఎన్నికల అధికారులకు తన నిర్ణయాన్ని తెలియజేస్తూ లేఖ సమర్పించారు. దీంతో అరకాల వీరేశలింగం ఏకగ్రీవంగా ఎన్నికయ్యారు.
ఈ సందర్భంగా మున్సిపల్ చైర్మన్ మొలుగు ప్రశాంత్ కుమార్ దిలీప్ మాట్లాడుతూ.. పద్మశాలి సమాజ ఐక్యత కోసం ఎన్.ఎం. రమేష్ తీసుకున్న నిర్ణయం అభినందనీయమన్నారు. పద్మశాలి కులబంధవులతో తనకు ఎంతో అవినాభావ సంబంధం ఉందని తెలిపారు. తన కుటుంబాన్ని రెండు పర్యాయాలు గెలిపించడంలో పద్మశాలి కులబంధవుల సహకారం ఎంతో ఉందని, ప్రస్తుతం 23వ వార్డులో తన గెలుపులోనూ వారి పాత్ర కీలకమైందని పేర్కొన్నారు.
పద్మశాలి సమాజంలో పరస్పర గౌరవం, ఐక్యత కొనసాగాలని ఆకాంక్షించారు. ఏకగ్రీవంగా ఎన్నికైన అరకాల వీరేశలింగానికి శుభాకాంక్షలు తెలిపారు. సమాజ అభివృద్ధి, సంక్షేమం కోసం అందరూ కలిసి ముందుకు సాగాలని పిలుపునిచ్చారు.
ఈ కార్యక్రమంలో మాజీ కౌన్సిలర్ దిడ్డీ రాము, అభ్యర్థి ఎన్.ఎం. రమేష్, కొండ శ్రీధర్, కొండి రమేష్‌తో పాటు ఎన్నికల అధికారులు పాల్గొన్నారు.