జమ్మికుంట టౌన్ ఏప్రిల్ 28 (తెలంగాణ ముచ్చట్లు):
తెలంగాణ రైతు ఉద్యమానికి మరో బలమైన స్వరం జతైంది. మండలంలోని అంకుషాపూర్ గ్రామానికి చెందిన మాజీ సర్పంచ్ బాసిర సంపత్ రావు తెలంగాణ రైతు సంఘం రాష్ట్ర కమిటీ సభ్యుడిగా ఏకగ్రీవంగా ఎన్నిక కావడం విశేషంగా నిలిచింది.
కొత్తగూడెం జిల్లా కేంద్రంలో ఈనెల 23, 24, 25 తేదీల్లో జరిగిన తెలంగాణ రైతు సంఘం మూడవ మహాసభల్లో నూతన రాష్ట్ర కమిటీని ఎన్నుకోగా, అందులో సంపత్ రావుకు కీలక బాధ్యతలు అప్పగించారు. గత 30 సంవత్సరాలుగా వ్యవసాయం చేస్తూనే ఆదర్శ రైతుగా గుర్తింపు పొందిన ఆయన, రైతాంగ సమస్యలపై నిరంతరం ఉద్యమిస్తూ రైతుల గళంగా నిలిచారు.
ఈ సందర్భంగా సంపత్ రావు మాట్లాడుతూ, తనపై నమ్మకం ఉంచి బాధ్యతలు అప్పగించిన రాష్ట్ర అధ్యక్షుడు పోతినేని సుదర్శన్, కార్యదర్శి తీగల సాగర్, జిల్లా అధ్యక్షుడు వర్ణ వెంకటరెడ్డి, కార్యదర్శి మిల్కూరి వాసుదేవ రెడ్డిలకు కృతజ్ఞతలు తెలిపారు.
రైతులు ఎదుర్కొంటున్న సమస్యలపై మరింత గట్టిగా పోరాడతానని స్పష్టం చేసిన ఆయన, జిల్లావ్యాప్తంగా వరి ధాన్యం కొనుగోలు కేంద్రాలను వెంటనే ప్రారంభించి, యుద్ధ ప్రాతిపదికన కొనుగోలు చేపట్టాలని ప్రభుత్వాన్ని డిమాండ్ చేశారు. ఎన్నికల ముందు ప్రకటించిన వరంగల్ రైతు డిక్లరేషన్లోని హామీలను అమలు చేయాలని కోరారు.
“రైతు ఏడిస్తే రాజ్యం బాగుపడదు” అంటూ రైతుల కష్టాలను గుర్తు చేసిన సంపత్ రావు, సరళీకృత ఆర్థిక విధానాల వల్ల రైతుల పరిస్థితి రోజురోజుకీ దిగజారుతోందని ఆందోళన వ్యక్తం చేశారు. దేశంలో రైతుల ఆత్మహత్యలు పెరుగుతున్న నేపథ్యంలో, వాటి నివారణకు కేంద్ర-రాష్ట్ర ప్రభుత్వాలు స్పష్టమైన కార్యాచరణ తీసుకురావాలని డిమాండ్ చేశారు.
అలాగే 55 సంవత్సరాలు నిండిన ప్రతి రైతుకు పెన్షన్ ఇవ్వాలని, చిన్న మరియు సన్నకారు రైతులకు ఉచితంగా ఎరువులు, పురుగుమందులు అందించాలని, పంటల బీమా పథకాన్ని రాష్ట్రంలో సమర్థవంతంగా అమలు చేయాలని కోరారు.
జిల్లాలో తెలంగాణ రైతు సంఘాన్ని మరింత బలోపేతం చేసి రైతులకు అండగా నిలుస్తామని సంపత్ రావు హామీ ఇచ్చారు.
Comments