ప్రజావాణికి 14 దరఖాస్తులు.

ప్రజల సమస్యలను పరిష్కరిస్తాం: అధికారులు.

సైదాపూర్, సెప్టెంబర్ 28 (తెలంగాణ ముచ్చట్లు):

సైదాపూర్ మండల పరిషత్ కార్యాలయంలో సోమవారం ప్రజావాణి కార్యక్రమాన్ని నిర్వహించారు. ఉదయం 10 గంటల నుంచి మధ్యాహ్నం ఒంటిగంట వరకు కొనసాగిన కార్యక్రమంలో వివిధ గ్రామాల నుంచి వచ్చిన ప్రజలు తమ సమస్యలను అధికారుల దృష్టికి తీసుకువచ్చారు.

ఈ సందర్భంగా ప్రజల నుంచి మొత్తం 14 దరఖాస్తులు స్వీకరించినట్లు ఎంపీడీవో ప్రభాకర్ తెలిపారు. వీటిలో తహసీల్దార్ కార్యాలయానికి సంబంధించి 5 దరఖాస్తులు, ఎంపీడీవో కార్యాలయానికి 4, హౌసింగ్ శాఖకు 2, మెడికల్ ఆఫీసర్‌కు 1, వ్యవసాయ శాఖకు 1, విద్యుత్ శాఖకు 1 దరఖాస్తు వచ్చినట్లు వివరించారు.

ప్రజలు సమర్పించిన దరఖాస్తులను సంబంధిత శాఖల అధికారులు పరిశీలించి, నిబంధనల ప్రకారం సమస్యలను పరిష్కరించేందుకు చర్యలు తీసుకుంటామని అధికారులు తెలిపారు. ప్రజావాణి ద్వారా ప్రజలకు నేరుగా తమ సమస్యలను అధికారుల దృష్టికి తీసుకువచ్చే అవకాశం కలుగుతోందన్నారు.

ఈ కార్యక్రమంలో వివిధ శాఖలకు చెందిన 16 మంది అధికారులు పాల్గొన్నట్లు ఎంపీడీవో ప్రభాకర్ తెలిపారు. ప్రజల సమస్యలకు ప్రాధాన్యతనిస్తూ వాటి పరిష్కారానికి చర్యలు తీసుకుంటామని ఆయన పేర్కొన్నారు.