వెల్టూర్‌ను మండల కేంద్రంగా చేస్తాం.

పెద్దమందడి,సెప్టెంబర్28(తెలంగాణ ముచ్చట్లు):

వనపర్తి జిల్లా పెద్దమందడి మండలం వెల్టూర్ గ్రామాన్ని మండల కేంద్రంగా ఏర్పాటు చేస్తామని గృహ నిర్మాణ, రెవెన్యూ శాఖ మంత్రి పొంగులేటి శ్రీనివాస్‌రెడ్డి అన్నారు. వెల్టూర్ గ్రామంలో తెలంగాణ పబ్లిక్ స్కూల్ నూతన భవన నిర్మాణానికి శంకుస్థాపన కార్యక్రమానికి మంత్రి విచ్చేసిన సందర్భంగా ఈ విషయాన్ని వెల్లడించారు.ఈ సందర్భంగా మంత్రి పొంగులేటి శ్రీనివాస్‌రెడ్డి మాట్లాడుతూ.. వెల్టూర్ గ్రామ ప్రజల చిరకాల కోరికను ప్రభుత్వం దృష్టిలో ఉంచుకుందని తెలిపారు. ఎమ్మెల్యే మేఘా రెడ్డి తనను ఎప్పుడు కలిసినా వెల్టూర్ గ్రామాన్ని మండల కేంద్రంగా ప్రకటించాలని పదేపదే కోరుతున్నారని మంత్రి గుర్తు చేశారు. ఎమ్మెల్యే మేఘా రెడ్డి వెల్టూర్ మండల కేంద్రం అంశాన్ని తన దృష్టికి తీసుకువస్తున్నారని పేర్కొన్నారు.రాష్ట్రంలో కొత్తగా మండలాల ఏర్పాటు ప్రక్రియలో భాగంగా అవకాశం వచ్చినప్పుడు వెల్టూర్‌ను మండల కేంద్రంగా ప్రకటించేలా చర్యలు తీసుకుంటామని మంత్రి హామీ ఇచ్చారు. వెల్టూర్ గ్రామాన్ని మండల కేంద్రంగా ఏర్పాటు చేయాలన్న ప్రజల చిరకాల ఆకాంక్షను నెరవేర్చేందుకు ప్రభుత్వం కృషి చేస్తుందని తెలిపారు.వెల్టూర్ మండల కేంద్రంగా ఏర్పడితే పరిసర గ్రామాల ప్రజలకు పరిపాలనా సేవలు మరింత చేరువ అవుతాయని, ప్రజలకు ఎంతో ప్రయోజనం కలుగుతుందని మంత్రి పొంగులేటి శ్రీనివాస్‌రెడ్డి పేర్కొన్నారు.