టిఫిన్ కోసం వెళ్లిన తండ్రి.. కారులో చిన్నారి లాక్.

20 నిమిషాల పాటు నరకయాతన.. 

యూట్యూబ్ సాయంతో కారు అద్దం దించిన బాలుడు

స్టేషన్ ఘన్‌పూర్,సెప్టెంబర్ 28 (తెలంగాణ ముచ్చట్లు): 

చిన్నపిల్లలను కారులో ఒంటరిగా వదిలి వెళ్లేటప్పుడు తల్లిదండ్రులు అప్రమత్తంగా ఉండాల్సిన అవసరాన్ని శివునిపల్లిలో జరిగిన ఘటన గుర్తుచేస్తోంది. స్టేషన్ ఘన్‌పూర్ మున్సిపల్ కేంద్రంలోని శివునిపల్లిలో ఉన్న మణికంఠ హోటల్ వద్ద ఓ వ్యక్తి తన కుమారుడిని కారులో ఉంచి టిఫిన్ తీసుకురావడానికి వెళ్లాడు. ఈ సమయంలో కారు కేంద్ర తాళం పడిపోవడంతో తలుపులు తెరుచుకోలేదు.

సుమారు 20 నిమిషాల పాటు తండ్రితో పాటు అక్కడున్న పలువురు కారును తెరిచి బాలుడిని బయటకు తీసేందుకు ప్రయత్నించారు. కారు అద్దాన్ని కిందకు దించాలని బాలుడికి సూచించినప్పటికీ అతడికి అర్థం కాలేదు. దీంతో అక్కడే ఉన్న ఓ వ్యక్తి యూట్యూబ్‌లో సంబంధిత దృశ్యాన్ని చూపిస్తూ బాలుడికి అర్థమయ్యేలా వివరించాడు. చివరకు చిన్నారి కారు అద్దాన్ని కిందకు దించడంతో అతడిని సురక్షితంగా బయటకు తీసుకువచ్చారు.

ఈ సమయంలో బాలుడు భయపడకుండా కారులోనే ఉన్నట్లు స్థానికులు తెలిపారు. ఘటనతో అప్రమత్తమైన పలువురు చిన్నపిల్లలను కారులో ఒంటరిగా వదిలి వెళ్లకూడదని సూచిస్తున్నారు. అత్యవసర పరిస్థితుల్లో ప్రమాదాలు జరగకుండా కారు దిగే ముందు చిన్నారులను వెంట తీసుకెళ్లాలని, వాహనంలో పిల్లలను ఒంటరిగా ఉంచకుండా తల్లిదండ్రులు తగిన జాగ్రత్తలు తీసుకోవాలని కోరుతున్నారు.