బీఆర్‌ఎస్ నాయకుల ముందస్తు అరెస్టులు.

పెద్దమందడి,అక్టోబర్26(తెలంగాణ ముచ్చట్లు):

తెలంగాణ ఉద్యమకారులు ఇచ్చిన చలో హైదరాబాద్ పిలుపు నేపథ్యంలో వనపర్తి జిల్లా పెద్దమందడి మండలంలో బీఆర్‌ఎస్ నాయకులను పోలీసులు ముందస్తుగా అరెస్టు చేశారు. ఈ అరెస్టులపై బీఆర్‌ఎస్ శ్రేణులు తీవ్ర ఆగ్రహం వ్యక్తం చేశాయి. ప్రజాస్వామ్యంలో నిరసన తెలిపే హక్కును అడ్డుకోవడం సరికాదని నాయకులు పేర్కొన్నారు.చలో హైదరాబాద్ కార్యక్రమంలో పాల్గొనకుండా అడ్డుకునేందుకే పోలీసులు ముందస్తు అరెస్టులకు పాల్పడ్డారని బీఆర్‌ఎస్ నాయకులు ఆరోపించారు. అరెస్టయిన వారిలో బీఆర్‌ఎస్ మాజీ మండల పార్టీ అధ్యక్షుడు సతీష్ శర్మ, మాజీ మండల కో-కన్వీనర్ ఖాజా హుస్సేన్, ప్రస్తుత మండల పార్టీ అధ్యక్షుడు వేణు యాదవ్ ఉన్నారు.ఈ సందర్భంగా బీఆర్‌ఎస్ నాయకులు మాట్లాడుతూ.. ప్రజాపాలన పేరుతో కాంగ్రెస్ ప్రభుత్వం ప్రతిపక్షాల గొంతు నొక్కేందుకు ప్రయత్నిస్తోందని విమర్శించారు. ప్రజా సమస్యలపై ప్రశ్నించే నాయకులను ముందస్తుగా అరెస్టు చేయడం ప్రజాస్వామ్య హక్కులకు విరుద్ధమని అన్నారు. ప్రభుత్వం తన వైఫల్యాలను కప్పిపుచ్చుకోవడానికే ఇలాంటి చర్యలకు పాల్పడుతోందని ఆరోపించారు.తెలంగాణ ఉద్యమకారులకు ఎన్నికల సమయంలో ఇచ్చిన హామీలను ప్రభుత్వం తక్షణమే అమలు చేయాలని వారు డిమాండ్ చేశారు. ఉద్యమకారుల సమస్యల పరిష్కారం కోసం, ప్రజల హక్కుల పరిరక్షణ కోసం తమ పోరాటం కొనసాగుతుందని స్పష్టం చేశారు. ముందస్తు అరెస్టులతో తమను భయపెట్టలేరని, ప్రజా సమస్యలపై నిరంతరం పోరాడుతామని తెలిపారు.ప్రభుత్వం ఇప్పటికైనా తన వైఖరిని మార్చుకొని ఇచ్చిన హామీలను నెరవేర్చాలని బీఆర్‌ఎస్ నాయకులు డిమాండ్ చేశారు. లేనిపక్షంలో ప్రజలను సమీకరించి పెద్ద ఎత్తున ఆందోళనలు చేపడతామని హెచ్చరించారు.