ముప్పారం–వేములవాడకు నూతన బస్సు సర్వీసు ప్రారంభం.

కమ్మరిపేటతో పాటు పలు గ్రామాల ప్రజలకు ప్రయాణ సౌకర్యం.

వేలేరు, అక్టోబర్ 25 (తెలంగాణ ముచ్చట్లు):

హనుమకొండ జిల్లా వేలేరు మండలం కమ్మరిపేట గ్రామం మీదుగా ముప్పారం నుంచి వేములవాడ వరకు నూతన బస్సు సర్వీసు ప్రారంభమైంది. ఈ బస్సు మోతు తండా, బండ తండా, కమ్మరిపేట, వేలేరు, కొత్తకొండ, మల్లారం, హస్నాబాద్ మీదుగా వేములవాడకు చేరుకోనుంది.
ఉదయం 6:30 గంటలకు ముప్పారం నుంచి బయలుదేరే బస్సు ఉదయం 10 గంటలకు వేములవాడకు చేరుకుంటుంది. తిరుగు ప్రయాణంలో సాయంత్రం 4 గంటలకు కరీంనగర్ బస్టాండ్ నుంచి బయలుదేరి రాత్రి 7 గంటలకు ముప్పారం చేరుకుంటుంది.
ఈ నూతన బస్సు సర్వీసు వల్ల ఆయా గ్రామాల ప్రజలకు ప్రయాణ సౌకర్యం మెరుగుపడనుంది. భక్తులు వేములవాడ రాజన్న దర్శనానికి వెళ్లేందుకు, ఇతర అవసరాల కోసం ప్రయాణించే వారికి ఈ సర్వీసు ఉపయోగకరంగా ఉంటుందని కమ్మరిపేట సర్పంచ్ జోడుముంతల కిరణ్ తెలిపారు. ఆయా గ్రామాల ప్రజలు ఈ బస్సు సర్వీసును సద్వినియోగం చేసుకోవాలని ఆయన కోరారు.