ఓటు చోరీ’ ఆరోపణలతో ప్రజల్లో గందరగోళం సృష్టించొద్దు.

జమ్మికుంట, అక్టోబర్ 12 (తెలంగాణ ముచ్చట్లు):

‘ఓటు చోరీ’ పేరుతో దేశవ్యాప్తంగా ప్రజల్లో గందరగోళం సృష్టించే ప్రయత్నాలను కాంగ్రెస్, ఇతర విపక్ష పార్టీలు విరమించుకోవాలని బీజేపీ జమ్మికుంట పట్టణ అధ్యక్షుడు కొలకాని రాజు డిమాండ్ చేశారు. ఓటరు జాబితాల సవరణ, ఎన్నికల ప్రక్రియపై ఏవైనా అభ్యంతరాలు ఉంటే ఆధారాలతో ఎన్నికల సంఘానికి ఫిర్యాదు చేయాలని సూచించారు.

జమ్మికుంట పట్టణంలో కొలకాని రాజు ఆధ్వర్యంలో నిర్వహించిన విలేకరుల సమావేశంలో ఆకుల రాజేందర్, కౌన్సిలర్ శీలం శ్రీనివాస్, గణపతి తదితరులు మాట్లాడారు. దేశంలో ఎన్నికల ప్రక్రియలో ఓటరు జాబితాల సవరణ అనేది కొత్తగా ప్రారంభించిన విధానం కాదని, గతంలోనూ ఈ ప్రక్రియ కొనసాగిందని పేర్కొన్నారు. ప్రజాస్వామ్య వ్యవస్థలో ఎన్నికలు, ఓటరు హక్కులు, ఎన్నికల సంఘం స్వయం ప్రతిపత్తి అత్యంత కీలకమని అన్నారు.

‘ఓటు చోరీ’ జరిగిందని ఆరోపిస్తున్న కాంగ్రెస్ అగ్రనేత రాహుల్ గాంధీ ఆ ఆరోపణలను ఆధారాలతో నిరూపించాలని బీజేపీ నాయకులు డిమాండ్ చేశారు. ఎన్నికల ప్రక్రియలో అవకతవకలు జరిగితే సంబంధిత అధికారులకు ఫిర్యాదు చేసి, చట్టపరమైన మార్గాల్లో పరిష్కారం కోరాలని అన్నారు. రాజకీయ ఆరోపణలతో ప్రజల్లో అనుమానాలు, అపోహలు సృష్టించడం సరికాదని విమర్శించారు. ఎన్నికల సంఘం ఇప్పటికే పలుమార్లు ఆధారాలు సమర్పించాలని కాంగ్రెస్ నాయకులను కోరిందని వారు పేర్కొన్నారు.

విదేశీ శక్తుల ప్రమేయం ఉందంటూ బీజేపీ నాయకులు ఆరోపించారు. అమెరికా, చైనా, పాకిస్థాన్, బంగ్లాదేశ్ వంటి దేశాల పేర్లను ప్రస్తావిస్తూ, దేశంలో అలజడి సృష్టించే కుట్రల పట్ల యువత, ప్రజలు అప్రమత్తంగా ఉండాలని పిలుపునిచ్చారు. అయితే ఈ ఆరోపణలకు సంబంధించి సమావేశంలో ఎలాంటి ఆధారాలను వెల్లడించలేదు.

తెలంగాణ, కర్ణాటక, జార్ఖండ్, కేరళ, తమిళనాడు రాష్ట్రాల్లో ఓటు చోరీ జరిగిందని కాంగ్రెస్ భావిస్తే, ఆయా రాష్ట్రాల్లో బీజేపీ ఎందుకు అధికారంలోకి రాలేదో కాంగ్రెస్ నాయకులు సమాధానం చెప్పాలని వారు ప్రశ్నించారు.

ఈ సమావేశంలో కైలాసకొటి గణేష్, రాచపల్లి ప్రశాంత్, ఆడువాల శ్రీధర్, కేస స్వరూప, టంగుటూరి రాజ్ కుమార్, బచ్చు శివన్న, మోతె స్వామి, ఆకుల తిరుపతి, పోచయ్య, కొండ్లె నగేష్, ఉడుగుల మహేందర్, బద్రి యాదవ్, శ్రీవర్తి ప్రవీణ్, అఖిల్, కొలకాని అరవింద్, పనికారి రమేష్ తదితరులు పాల్గొన్నారు.