సింగరేణి పరిరక్షణ సభకు కదలిరండి.

*కరీంనగర్‌ నుంచి 300 కార్లతో రామగుండానికి భారీ ర్యాలీ*

*ఈనెల 14న కేటీఆర్‌ సభ.. బీఆర్‌ఎస్‌ శ్రేణులకు గంగుల కమలాకర్‌ పిలుపు*

కరీంనగర్, అక్టోబర్ 12(తెలంగాణ ముచ్చట్లు ):

సింగరేణి సంస్థను పరిరక్షించుకోవడమే లక్ష్యంగా ఈనెల 14న రామగుండంలో నిర్వహించనున్న సభను విజయవంతం చేయాలని మాజీ మంత్రి, కరీంనగర్‌ ఎమ్మెల్యే గంగుల కమలాకర్‌ బీఆర్‌ఎస్‌ పార్టీ నాయకులు, కార్యకర్తలకు పిలుపునిచ్చారు. బీఆర్‌ఎస్‌ వర్కింగ్‌ ప్రెసిడెంట్‌ కేటీఆర్‌ పాల్గొననున్న ఈ సభకు సంబంధించిన సన్నాహక సమావేశాన్ని సోమవారం కరీంనగర్‌లోని తన నివాసంలో జిల్లా ముఖ్య నాయకులతో నిర్వహించారు.

*సింగరేణిని కాపాడుకోవాలి*

సింగరేణి సంస్థ తెలంగాణతో పాటు దేశానికి ఎంతో కీలకమని, దక్షిణ భారతదేశానికి వెలుగులు అందిస్తున్న ఈ సంస్థను కాపాడుకోవాల్సిన బాధ్యత ప్రతి ఒక్కరిపై ఉందని నాయకులు పేర్కొన్నారు. కాంగ్రెస్‌ ప్రభుత్వ హయాంలో బొగ్గు ఉత్పత్తి తగ్గడంతోపాటు సింగరేణిలో అక్రమాలు జరుగుతున్నాయని ఆరోపించారు. గత బీఆర్‌ఎస్‌ ప్రభుత్వ హయాంలో బొగ్గు ఉత్పత్తికి సంబంధించి ఎలాంటి అక్రమాలు చోటుచేసుకోలేదని పేర్కొన్నారు. సింగరేణి ఉత్పత్తిని పెంచి దక్షిణ భారతదేశానికి మరింత వెలుగులు అందించాలంటే సంస్థను పరిరక్షించుకోవాలని అన్నారు.

సింగరేణి ఎదుర్కొంటున్న సమస్యలను ప్రజల దృష్టికి తీసుకెళ్లడంతోపాటు సంస్థ ప్రయోజనాలను కాపాడాలనే ఉద్దేశంతో కేటీఆర్‌ ఆధ్వర్యంలో రామగుండంలో భారీ సభ నిర్వహిస్తున్నట్లు తెలిపారు.

*300 కార్లతో భారీ ర్యాలీ*

రామగుండంలో నిర్వహించే సభకు ఉమ్మడి కరీంనగర్‌ జిల్లా నుంచి పెద్ద సంఖ్యలో నాయకులు, కార్యకర్తలు తరలివెళ్లాలని సమావేశంలో నిర్ణయించారు. ఇందులో భాగంగా కరీంనగర్‌ నుంచి సుమారు 250 నుంచి 300 కార్లతో భారీ ర్యాలీ నిర్వహించేందుకు ప్రణాళిక రూపొందించారు. కేటీఆర్‌ మధ్యాహ్నం 1 నుంచి 2 గంటల మధ్య కరీంనగర్‌కు చేరుకోనున్న నేపథ్యంలో ఆయనతో కలిసి ర్యాలీగా రామగుండం సభకు వెళ్లాలని నిర్ణయించినట్లు నాయకులు తెలిపారు.

*నాయకులు, కార్యకర్తలకు విజ్ఞప్తి*

బీఆర్‌ఎస్‌ పార్టీ ముఖ్య నాయకులు, మాజీ ఎమ్మెల్యేలు, ప్రజాప్రతినిధులు, కార్యకర్తలు తమ వాహనాలతో ఉదయం 11 నుంచి 12 గంటలలోపు కరీంనగర్‌కు చేరుకోవాలని విజ్ఞప్తి చేశారు. అందరూ సమన్వయంతో పాల్గొని సింగరేణి పరిరక్షణ సభను విజయవంతం చేయాలని పిలుపునిచ్చారు.

ఈ సమావేశంలో ఎమ్మెల్యే గంగుల కమలాకర్‌తో పాటు మాజీ ఎమ్మెల్యే సుంకె రవిశంకర్‌, బీఆర్‌ఎస్‌ జిల్లా అధ్యక్షుడు జి.వి. రామకృష్ణారావు, నగర అధ్యక్షుడు చల్ల హరిశంకర్‌, మాజీ మేయర్‌ సర్దార్‌ రవీందర్‌ సింగ్‌, జిల్లా మాజీ గ్రంథాలయ సంస్థ చైర్మన్‌ అనిల్‌ కుమార్‌ గౌడ్‌, కార్పొరేటర్‌ కాల్వ మల్లేశం, జడ్పీ మాజీ కోఆప్షన్‌ సభ్యుడు జములుద్దిన్‌, మాజీ కార్పొరేటర్‌ నాంపల్లి శ్రీనివాస్‌, అర్బన్‌ బ్యాంక్‌ మాజీ డైరెక్టర్‌ కర్ర సూర్యశేఖర్‌ తదితరులు పాల్గొన్నారు.