పండుగలు ఐక్యతకు ప్రతీకలు.

పెద్దమందడి,అక్టోబర్21(తెలంగాణ ముచ్చట్లు):

వనపర్తి జిల్లా పెద్దమందడి మండలం వెల్టూర్ గ్రామంలో దసరా పండుగ వేడుకలు ఘనంగా జరిగాయి. ఈ సందర్భంగా గ్రామానికి చెందిన గుడిబండ శ్రీనివాస్ రెడ్డి మాట్లాడుతూ పండుగలు ప్రజల మధ్య ఐక్యత, సోదరభావాన్ని పెంపొందించే గొప్ప సంప్రదాయాలని అన్నారు. రాజకీయ పార్టీలకు, కులమతాలకు అతీతంగా ప్రతి ఒక్కరూ కలిసిమెలిసి పండుగలు జరుపుకోవడం సంతోషకరమని పేర్కొన్నారు.ఉపాధి కోసం పట్టణాలు, ఇతర ప్రాంతాలకు వలస వెళ్లిన వారు పండుగ సందర్భంగా సొంతూరికి తిరిగి వచ్చి కుటుంబ సభ్యులు, బంధుమిత్రులతో కలిసి వేడుకల్లో పాల్గొనడం మంచి సంప్రదాయమని తెలిపారు. ఎంత దూరంలో ఉన్నా పండుగ సమయానికి సొంతూరికి చేరుకొని ఆత్మీయులతో ఆనందాన్ని పంచుకోవడం ప్రత్యేకమైన అనుభూతిని కలిగిస్తుందని అన్నారు. వలస వెళ్లిన వారితో గ్రామంలో పండుగ సందడి పెరగడంతో పాటు చిన్ననాటి స్నేహాలు, బంధాలు మరోసారి గుర్తుకొస్తాయని పేర్కొన్నారు.పండుగలు కుటుంబ సభ్యులను, గ్రామ ప్రజలను ఒకచోట చేర్చి పరస్పర ప్రేమాభిమానాలను పెంచుతాయని ఆయన అన్నారు. నేటి ఉరుకుల పరుగుల జీవితంలో ఇలాంటి పండుగలు మనుషుల మధ్య అనుబంధాలను బలోపేతం చేయడంలో కీలక పాత్ర పోషిస్తాయని తెలిపారు. భావితరాలకు మన సంస్కృతి, సంప్రదాయాల గొప్పతనాన్ని తెలియజేస్తూ అందరూ ఐకమత్యంతో ముందుకు సాగాలని, గ్రామ అభివృద్ధికి పరస్పర సహకారం అందించుకోవాలని ఆకాంక్షించారు. వెల్టూర్ గ్రామంలో దసరా సందర్భంగా నెలకొన్న పండుగ వాతావరణం, ప్రజల మధ్య కనిపిస్తున్న ఐక్యత ఆనందాన్ని కలిగిస్తున్నాయని గుడిబండ శ్రీనివాస్ రెడ్డి పేర్కొన్నారు.