రైతాంగ సమస్యలపై బీజేపీ సమరశంఖం.

*ఈ నెల 23న కరీంనగర్ కలెక్టరేట్ ముట్టడి.*

*కార్యక్రమాన్ని విజయవంతం చేయాలని యాదగిరి సునీల్ రావు పిలుపు.*

కరీంనగర్, అక్టోబర్ 17(తెలంగాణ ముచ్చట్లు ):

 రైతాంగ సమస్యల పరిష్కారంలో రాష్ట్ర ప్రభుత్వ నిర్లక్ష్య వైఖరిని ఎండగట్టేందుకు ఈ నెల 23వ తేదీన భారతీయ జనతా పార్టీ ఆధ్వర్యంలో కరీంనగర్ కలెక్టరేట్ ముట్టడి కార్యక్రమం నిర్వహించనున్నట్లు బీజేపీ రాష్ట్ర అధికార ప్రతినిధి, నగర డిప్యూటీ మేయర్, మాజీ మేయర్ యాదగిరి సునీల్ రావు తెలిపారు. ఈ కార్యక్రమాన్ని విజయవంతం చేయాలని పార్టీ శ్రేణులకు పిలుపునిచ్చారు.

బీజేపీ పిలుపు మేరకు కరీంనగర్‌లోని తిమ్మాపూర్ మండలంలో నిర్వహించిన ముఖ్య నాయకుల సమావేశంలో ఆయన ముఖ్య అతిథిగా పాల్గొని పార్టీ నాయకులకు దిశానిర్దేశం చేశారు.

ఈ సందర్భంగా యాదగిరి సునీల్ రావు మాట్లాడుతూ.. కాంగ్రెస్ ప్రభుత్వం ఎన్నికల సమయంలో ఇచ్చిన హామీలను అమలు చేయడంలో విఫలమైందని విమర్శించారు. రైతుల రుణాలన్నీ మాఫీ చేస్తామన్న హామీ ఏమైందని ప్రశ్నించారు. రైతులు, మహిళలు, ఉద్యోగులు, నిరుద్యోగులు సహా వివిధ వర్గాల సమస్యలను పరిష్కరించకుండా ప్రభుత్వం కాలయాపన చేస్తోందని మండిపడ్డారు. ప్రజా సమస్యలను పక్కనపెట్టి అధికార పార్టీ నాయకులు తమ వ్యక్తిగత వ్యవహారాలకే ప్రాధాన్యమిస్తున్నారని ఆరోపించారు.

ఈ నెల 23న నిర్వహించే కలెక్టరేట్ ముట్టడి కార్యక్రమానికి తిమ్మాపూర్ మండలంలోని 12 శక్తి కేంద్రాల ఇన్‌ఛార్జ్‌లు, నాయకులు, కార్యకర్తలు పెద్ద సంఖ్యలో రైతులను సమీకరించి విజయవంతం చేయాలని సూచించారు. ఈ నెల 19వ తేదీలోపు అన్ని శక్తి కేంద్రాల పరిధిలో సమావేశాలు నిర్వహించి, యువతను, రైతులను కార్యక్రమానికి సమాయత్తం చేయాలని కోరారు.

అలాగే, వచ్చే నెల 3వ తేదీన నరేంద్ర మోదీకి మద్దతుగా యువతతో భారీ ప్రదర్శన నిర్వహించనున్నట్లు తెలిపారు. పార్టీ నాయకులు, కార్యకర్తలు ఐక్యంగా పనిచేస్తూ బీజేపీ సిద్ధాంతాలను ప్రజల్లోకి తీసుకెళ్లాలని, పార్టీ బలోపేతానికి ప్రతి కార్యకర్త సైనికుడిలా కృషి చేయాలని యాదగిరి సునీల్ రావు పిలుపునిచ్చారు.

ఈ సమావేశంలో తిమ్మాపూర్ మండల బీజేపీ నాయకులు, శక్తి కేంద్రాల ఇన్‌ఛార్జ్‌లు, కార్యకర్తలు పాల్గొన్నారు.