మెడికవర్ ఆసుపత్రి మరణాలపై సమగ్ర విచారణ జరపాలి.

వరుస మరణాలపై ప్రభుత్వం స్పందించాలి.. 

బాధ్యులపై చర్యలు తీసుకోవాలి

ప్రభుత్వం స్పందించే వరకు ధర్నా కొనసాగిస్తాం

దళిత, బహుజన మహిళా నాయకులు

సికింద్రాబాద్,అక్టోబర్14: (తెలంగాణ ముచ్చట్లు )

సికింద్రాబాద్‌లోని మెడికవర్ ఆసుపత్రిలో వరుస మరణాలపై సమగ్ర విచారణ జరిపి వాస్తవాలను ప్రజలకు వెల్లడించాలని దళిత, బహుజన మహిళా నాయకులు ప్రభుత్వాన్ని డిమాండ్ చేశారు. సెప్టెంబర్ 21, 22 తేదీల నుంచి ఇప్పటివరకు దాదాపు 20 మంది మరణించినట్లు వారు పేర్కొంటూ, ఈ ఘటనలపై అధికార యంత్రాంగం స్పష్టమైన వివరాలు వెల్లడించాలని కోరారు. మరణాలకు గల కారణాలు, వైద్య సేవల్లో ఏమైనా నిర్లక్ష్యం జరిగిందా అనే అంశాలపై నిష్పక్షపాతంగా విచారణ జరపాలని విజ్ఞప్తి చేశారు.
ఈ సందర్భంగా జర్నలిస్ట్ కల్పన, తెలంగాణ పద్మ,ఆమ్ ఆద్మీ పార్టీ రాష్ట్ర అధ్యక్షురాలు హేమసుదర్శన్ జిల్లోజుల, జంజి రమ్యగౌడ్, టీఆర్‌ఎస్ నాయకురాలు బంజాపల్లి సుధారాణి మాట్లాడుతూ.. వైద్యం కోసం ఆసుపత్రులకు వెళ్లే పేద, బలహీన వర్గాల ప్రజలకు నాణ్యమైన వైద్యం అందించడం ప్రభుత్వ బాధ్యతని పేర్కొన్నారు. వరుస మరణాలపై వస్తున్న ఆరోపణలను తేలికగా తీసుకోకుండా, బాధిత కుటుంబాలకు న్యాయం జరిగేలా చర్యలు తీసుకోవాలని కోరారు.

ఆసుపత్రిలో చోటుచేసుకున్న మరణాలకు సంబంధించి పూర్తి వివరాలను సేకరించి, ప్రతి ఘటనకు గల కారణాలను పరిశీలించాలని నాయకులు కోరారు. వైద్య నిర్లక్ష్యం జరిగినట్లు విచారణలో తేలితే బాధ్యులపై చట్టప్రకారం కఠిన చర్యలు తీసుకోవాలని స్పష్టం చేశారు. బాధిత కుటుంబాలకు జరిగిన నష్టంపై ప్రభుత్వం స్పందించి, వారికి న్యాయం జరిగేలా చూడాలని విజ్ఞప్తి చేశారు.

ఆరోగ్య శాఖ బాధ్యత వహించాలి

ఈ వ్యవహారంపై వైద్య ఆరోగ్య శాఖ తక్షణమే స్పందించి సమగ్ర విచారణకు ఆదేశించాలని నాయకులు డిమాండ్ చేశారు. విచారణలో తీవ్రమైన ఉల్లంఘనలు బయటపడితే నిబంధనల ప్రకారం ఆసుపత్రిపై చర్యలు తీసుకోవాలని, అవసరమైతే ఆసుపత్రి కార్యకలాపాలను నిలిపివేసే అంశాన్ని పరిశీలించాలని కోరారు. ఘటనపై ప్రభుత్వం స్పందించకపోతే వైద్య ఆరోగ్య శాఖ మంత్రి బాధ్యత వహించాలని వారు పేర్కొన్నారు.

న్యాయం జరిగే వరకు ధర్నా

బాధిత కుటుంబాలకు న్యాయం జరిగి, ప్రభుత్వం నుంచి స్పష్టమైన స్పందన వచ్చే వరకు తమ ఆందోళన కొనసాగిస్తామని నాయకులు తెలిపారు. ఎన్ని అరెస్టులు చేసినా వెనక్కి తగ్గబోమని, ప్రజల ప్రాణాల రక్షణ, వైద్య రంగంలో జవాబుదారీతనం కోసం తమ పోరాటం కొనసాగుతుందని స్పష్టం చేశారు. బాధిత కుటుంబాలు ధైర్యంగా ముందుకు వచ్చి తమకు తెలిసిన వివరాలను అధికారులకు తెలియజేయాలని పిలుపునిచ్చారు.

వైద్య సేవలపై ప్రజలు అప్రమత్తంగా ఉండాలి

ప్రజలు ఆసుపత్రులను ఎంపిక చేసుకునే సమయంలో అక్కడి వైద్య సదుపాయాలు, సేవల నాణ్యత, విశ్వసనీయతపై అవగాహన కలిగి ఉండాలని నాయకులు సూచించారు. వైద్య సేవల్లో నిర్లక్ష్యం జరిగిందని అనుమానం కలిగితే సంబంధిత అధికారులను ఆశ్రయించి విచారణ కోరాలని తెలిపారు.మెడికవర్ ఆసుపత్రిలో మరణాలపై వస్తున్న ఆరోపణలకు సంబంధించి ప్రభుత్వం అధికారిక వివరాలు వెల్లడించాలని, విచారణ ద్వారా వాస్తవాలను నిర్ధారించి బాధిత కుటుంబాలకు న్యాయం చేయాలని నాయకులు డిమాండ్ చేశారు.