మహిళా నాయకత్వానికి మరో గౌరవం.

హుజూరాబాద్,జూన్ 24(తెలంగాణ ముచ్చట్లు ):

మహిళా సాధికారత కోసం విశేషంగా కృషి చేస్తున్న మహిళా నాయకులకు ప్రోత్సాహం అందించే క్రమంలో మహిళా ఎంపవర్మెంట్ తెలుగు అసోసియేషన్ హుజూరాబాద్ మండల కోఆర్డినేటర్‌గా  చెల్పూర్ సర్పంచ్ వంతడుపుల కస్తూరి ని నియమించారు . హైదరాబాద్‌లో నిర్వహించిన ప్రత్యేక కార్యక్రమంలో సంస్థ ప్రతినిధులు ఆమెకు నియామక పత్రాన్ని అందజేసి అభినందనలు తెలిపారు.
ఈ సందర్భంగా కస్తూరి మాట్లాడుతూ మహిళల అభివృద్ధి, ఆర్థిక స్వావలంబన, స్వయం ఉపాధి అవకాశాల కల్పన కోసం నిరంతరం కృషి చేస్తానని పేర్కొన్నారు. గ్రామీణ ప్రాంత మహిళల్లో దాగి ఉన్న ప్రతిభను వెలికితీసి వారికి సరైన అవకాశాలు కల్పించడం ద్వారా సమాజంలో గౌరవప్రదమైన స్థానం కల్పించవచ్చన్నారు. మహిళలు కుటుంబానికి మాత్రమే పరిమితం కాకుండా వ్యాపారం, ఉపాధి, విద్య, రాజకీయాలు, సామాజిక సేవ తదితర రంగాల్లో రాణించేలా ప్రోత్సహించాల్సిన అవసరం ఉందన్నారు.
హుజూరాబాద్ మండలంలోని మహిళలను సంఘటితం చేసి వారి సమస్యల పరిష్కారానికి కృషి చేయడంతో పాటు ప్రభుత్వం అందిస్తున్న సంక్షేమ పథకాలపై అవగాహన కల్పించేందుకు ప్రత్యేక కార్యక్రమాలు చేపడతామని తెలిపారు. మహిళలు ఆర్థికంగా బలోపేతం అయితే కుటుంబాలు, గ్రామాలు, సమాజం అభివృద్ధి చెందుతుందని ఆమె పేర్కొన్నారు.
మహిళా సాధికారత దిశగా WETA India చేపడుతున్న కార్యక్రమాలు ప్రశంసనీయమని, మహిళలకు నాయకత్వ అవకాశాలు కల్పించడం ద్వారా వారిలో ఆత్మవిశ్వాసం పెంపొందుతుందని కస్తూరి అన్నారు. మహిళలు తమ హక్కులు, అవకాశాలపై అవగాహన పెంచుకొని అన్ని రంగాల్లో ముందుకు రావాలని పిలుపునిచ్చారు.
ఈ కార్యక్రమంలో రాష్ట్ర స్థాయి మహిళా ప్రతినిధులు, సామాజిక కార్యకర్తలు, వివిధ రంగాల ప్రముఖులు పాల్గొని కస్తూరి కి శుభాకాంక్షలు తెలిపారు. హుజూరాబాద్ మండల కోఆర్డినేటర్‌గా ఆమె నియామకం స్థానిక మహిళలకు మరింత ప్రోత్సాహాన్ని అందించి మహిళా సాధికారత కార్యక్రమాలకు కొత్త ఊపునిస్తుందని అభిప్రాయపడ్డారు. మహిళల అభ్యున్నతికి అంకితభావంతో పనిచేస్తున్న కస్తూరి కి ఈ బాధ్యతలు మరింత గుర్తింపు తీసుకురానున్నాయని పేర్కొన్నారు.ఈ కార్యక్రమంలో రవాణా శాఖ మంత్రి పొన్నం ప్రభాకర్ గౌడ్,కార్మిక శాఖ మంత్రి వివేక్ వెంకటస్వామి ముఖ్య అతిథులుగా పాల్గొన్నారు.