ఉపాధ్యాయుడిగా సుదీర్ఘ సేవలందించిన భగవంతుకు ఘన వీడ్కోలు

పెద్దమందడి,ఫిబ్రవరి18(తెలంగాణ ముచ్చట్లు):

పెద్దమందడి మండలం మోజర్ల జిల్లా పరిషత్ ఉన్నత పాఠశాలలో సుదీర్ఘకాలంగా సేవలందించిన ఉపాధ్యాయుడు భగవంత్ పదవి విరమణ కార్యక్రమం ఘనంగా నిర్వహించారు. ఈ సందర్భంగా పాఠశాల ప్రాంగణం ఆనందోత్సాహాలతో కళకళలాడింది.కార్యక్రమానికి డీఈవో, ఎంఈఓ, ప్రధానోపాధ్యాయులు, ఉపాధ్యాయులు, విద్యార్థులు, గ్రామ పెద్దలు, తల్లిదండ్రులు పెద్ద సంఖ్యలో హాజరై భగవంత్ సేవలను కొనియాడారు. ఆయన బోధనా విధానం, క్రమశిక్షణ, విద్యార్థుల పట్ల చూపిన ఆప్యాయత పాఠశాలకు ప్రత్యేక గుర్తింపు తెచ్చిందని వక్తలు పేర్కొన్నారు.ఈ సందర్భంగా పదవి విరమణ పొందిన భగవంత్ భావోద్వేగంగా మాట్లాడుతూ.. ఈ పాఠశాల నా కుటుంబం లాంటిది. ఇక్కడ గడిపిన ప్రతి క్షణం నాకు అమూల్యం.సహచర ఉపాధ్యాయుల సహకారం, గ్రామస్తుల ప్రోత్సాహం వల్లనే నేను నా బాధ్యతలను సమర్థంగా నిర్వర్తించగలిగాను. నా విద్యార్థులు ఉన్నత స్థానాలకు చేరి సమాజానికి ఆదర్శంగా నిలవాలి. అదే నాకు నిజమైన బహుమతి, అని అన్నారు.విద్యార్థులు సాంస్కృతిక కార్యక్రమాలతో సభను మరింత ఆకట్టుకున్నారు.అనంతరం జిల్లా విద్యాధికారి అబ్దుల్ ఘని, మండల విద్యాధికారి మంజుల, పాఠశాల ప్రధానోపాధ్యాయులు వరప్రసాదరావు తదితరులు కలిసి భగవంత్‌ను శాలువాతో సత్కరించి స్మారక చిహ్నం అందజేశారు.గ్రామస్తులు, పాఠశాల సిబ్బంది కలిసి నిర్వహించిన ఈ కార్యక్రమం స్మరణీయంగా నిలిచింది.కార్యక్రమంలో ఉపాధ్యాయ బృందం, విద్యార్థులు, ప్రజాప్రతినిధులు, వివిధ సంఘాల నాయకులు, అధికారులు పాల్గొన్నారు.