ఎండుతున్న పంటలను కాపాడుకునేందుకు రైతుల తంటాలు.

పెద్దమందడి,అక్టోబర్23(తెలంగాణ ముచ్చట్లు):

చెరువులు ఎండిపోవడంతో రైతులు సాగునీటి కోసం తీవ్ర ఇబ్బందులు ఎదుర్కొంటున్నారు. వనపర్తి జిల్లా పెద్దమందడి మండలం వెల్టూర్ చెరువులో మిగిలిన కొద్దిపాటి నీటిని మోటార్ల ద్వారా తోడి పైపుల సహాయంతో పంట పొలాలకు మళ్లిస్తూ పంటలను కాపాడుకునేందుకు రైతులు ప్రయత్నిస్తున్నారు. వర్షాలు లేక నీటి వనరులు అడుగంటడంతో సాగు చేసిన పంటలు ఎండిపోయే పరిస్థితి నెలకొంది.పంటల సాగు కోసం ఇప్పటికే పెట్టుబడులు పెట్టిన రైతులు, చివరి దశలో నీటి కొరత ఏర్పడటంతో ఆందోళన చెందుతున్నారు. పంటలు చేతికి వచ్చే సమయంలో నీరందకపోతే పెట్టిన పెట్టుబడులు వృథా అవుతాయనే భయం వారిని వెంటాడుతోంది. మరోవైపు చెరువులో నీరు తగ్గిపోవడంతో మిగిలిన కొద్దిపాటి నీటినైనా పొలాలకు మళ్లించి పంటలను కాపాడుకోవాలని రైతులు నానా తంటాలు పడుతున్నారు.ఆరుగాలం కష్టపడి పంటలు సాగు చేసిన రైతులకు నీటి కొరత పెద్ద సమస్యగా మారింది. పంటలు ఎండిపోతుండటంతో రైతులు దిక్కుతోచని పరిస్థితిని ఎదుర్కొంటున్నారు. వ్యవసాయంపైనే ఆధారపడి జీవించే కుటుంబాలకు పంట నష్టం జరిగితే ఆర్థిక ఇబ్బందులు తప్పవనే ఆందోళన నెలకొంది. వెల్టూర్ చెరువులో మిగిలిన నీటిని మోటార్లతో పొలాలకు తరలిస్తున్న దృశ్యాలు రైతుల కష్టాలను కళ్లకు కడుతున్నాయి.ఇప్పటికైనా సంబంధిత అధికారులు క్షేత్రస్థాయిలో పరిస్థితిని పరిశీలించి, రైతుల ఇబ్బందులను గుర్తించి పంటలను కాపాడుకునేందుకు అవసరమైన సహాయక చర్యలు చేపట్టాలని రైతులు కోరుతున్నారు.