పోరండ్ల పీఏసీఎస్‌ పాలకవర్గ సమావేశం.

రైతుల పంట రుణాలు, ధాన్యం కొనుగోలుపై కీలక చర్చ

రైతులకు ఇబ్బందులు కలగకుండా ధాన్యం కొనుగోలు కేంద్రాల ఏర్పాటుకు నిర్ణయం

తిమ్మాపూర్,అక్టోబర్ 23 (తెలంగాణ ముచ్చట్లు): 

కరీంనగర్ జిల్లా తిమ్మాపూర్ మండలం పోరండ్ల ప్రాథమిక వ్యవసాయ సహకార సంఘం (పీఏసీఎస్‌) పాలకవర్గ సమావేశం చైర్మన్ గోపు తిరుపతి రెడ్డి అధ్యక్షతన నిర్వహించారు. ఈ సమావేశంలో రైతులకు పంట రుణాల మంజూరు, రుణాల పంపిణీ ప్రక్రియతో పాటు ధాన్యం కొనుగోలు కేంద్రాల ఏర్పాటుపై ప్రధానంగా చర్చించారు.
ప్రస్తుత పంట సీజన్‌ను దృష్టిలో ఉంచుకుని ధాన్యం కొనుగోలు కేంద్రాలను త్వరితగతిన ప్రారంభించి, రైతులకు ఎలాంటి ఇబ్బందులు తలెత్తకుండా అవసరమైన ఏర్పాట్లు చేపట్టాలని పాలకవర్గం నిర్ణయించింది. రైతులు పండించిన ధాన్యాన్ని సజావుగా విక్రయించుకునేలా కొనుగోలు ప్రక్రియను సమర్థవంతంగా నిర్వహించేందుకు తీసుకోవాల్సిన చర్యలపై సభ్యులు చర్చించారు.

అలాగే రైతులకు పంట రుణాల మంజూరు, రుణాల పంపిణీలో అవసరమైన సహకారం అందించడం, సహకార సంఘం ద్వారా రైతులకు మెరుగైన సేవలు కల్పించడంపై సమావేశంలో సమీక్షించారు. అజెండాలోని అంశాలను పాలకవర్గ సభ్యులు ఏకగ్రీవంగా ఆమోదించారు.
ఈ సమావేశంలో పీఏసీఎస్‌ వైస్‌ చైర్మన్ రావుల కృష్ణతో పాటు పాలకవర్గ సభ్యులు పాల్గొన్నారు. సమావేశంలో తీసుకున్న నిర్ణయాలను ఇన్‌చార్జి కార్యదర్శి మదన శ్రీనివాస్ మినిట్స్‌ బుక్‌లో నమోదు చేశారు.ఈ సందర్భంగా చైర్మన్ గోపు తిరుపతి రెడ్డి మాట్లాడుతూ, రైతుల సంక్షేమమే ప్రధాన లక్ష్యంగా పోరండ్ల పీఏసీఎస్‌ పనిచేస్తుందని తెలిపారు. రైతులకు పంట రుణాల విషయంలో అవసరమైన సహకారం అందించడంతో పాటు, ధాన్యం కొనుగోలు ప్రక్రియలో రైతులకు ఇబ్బందులు కలగకుండా చర్యలు తీసుకుంటామని పేర్కొన్నారు. రైతులకు మరింత మెరుగైన, సమర్థవంతమైన సేవలు అందించేందుకు పాలకవర్గం కట్టుబడి ఉందని స్పష్టం చేశారు.