జమ్మికుంట, అక్టోబర్ 23 (తెలంగాణ ముచ్చట్లు):
పంట చేతికొచ్చే చివరి దశలో సాగునీరు అందక పంటలు ఎండిపోయే పరిస్థితి నెలకొనడంతో ఆందోళనకు గురైన వావిలాల గ్రామ రైతులకు మార్కెట్ చైర్‌పర్సన్ పుల్లూరి స్వప్న సదానందం అండగా నిలిచారు. రైతులు తమ సమస్యను ఆమె దృష్టికి తీసుకెళ్లగానే తక్షణమే స్పందించి, నీటిపారుదల శాఖ అధికారులతో మాట్లాడి గ్రామంలోని పెద్ద చెరువు తూమును తెరిపించి పంట పొలాలకు సాగునీరు అందేలా చర్యలు తీసుకున్నారు.
పంట చివరి దశలో నీరు అందకపోతే దిగుబడిపై ప్రభావం పడుతుందని ఆందోళన చెందుతున్న రైతులకు ఈ చర్య ఊరటనిచ్చింది. సకాలంలో నీరు అందడంతో పంటలు ఎండిపోకుండా కాపాడుకునేందుకు అవకాశం లభించిందని రైతులు ఆనందం వ్యక్తం చేశారు.
తమ సమస్యను వివరించిన వెంటనే స్పందించి సాగునీరు అందించేందుకు చొరవ చూపిన మార్కెట్ చైర్‌పర్సన్ పుల్లూరి స్వప్న సదానందంకు వావిలాల గ్రామ రైతులు ప్రత్యేక కృతజ్ఞతలు తెలిపారు.
Comments