మహాత్మనగర్‌లో నూతన అంగన్వాడీ భవనం ప్రారంభం.

*చిన్నారులు, గర్భిణులు, బాలింతలకు మెరుగైన సేవలు అందించడమే లక్ష్యం: ఎమ్మెల్యే డా. కవ్వంపల్లి సత్యనారాయణ.*

మానకొండూర్, అక్టోబర్ 29 (తెలంగాణ ముచ్చట్లు):

మానకొండూర్ నియోజకవర్గ పరిధిలోని తిమ్మాపూర్ మండలం మహాత్మనగర్ గ్రామంలో నూతనంగా నిర్మించిన అంగన్వాడీ భవనాన్ని మానకొండూర్ నియోజకవర్గ శాసనసభ్యులు, టీపీసీసీ ఎస్సీ సెల్ చైర్మన్ డా. కవ్వంపల్లి సత్యనారాయణ ప్రారంభించారు.

గ్రామంలోని చిన్నారులు, గర్భిణులు, బాలింతల సంక్షేమాన్ని దృష్టిలో ఉంచుకొని నిర్మించిన ఈ అంగన్వాడీ భవనం అందుబాటులోకి రావడంతో స్థానిక ప్రజలకు మరింత సౌకర్యవంతమైన సేవలు అందనున్నాయి. అంగన్వాడీ కేంద్రాల ద్వారా చిన్నారులకు పౌష్టికాహారం, ప్రాథమిక సంరక్షణతో పాటు వారి ఎదుగుదలకు అవసరమైన సేవలు అందించేందుకు అవకాశం కలుగుతుంది. అలాగే గర్భిణులు, బాలింతలకు అవసరమైన పోషకాహారం, ఆరోగ్య సంబంధిత అవగాహన కల్పించడంలో అంగన్వాడీ కేంద్రాలు కీలక పాత్ర పోషిస్తాయి.

నూతన భవనం ప్రారంభంతో గ్రామ ప్రజలకు అంగన్వాడీ సేవలు మరింత అందుబాటులోకి వస్తాయని డా. కవ్వంపల్లి సత్యనారాయణ ఆశాభావం వ్యక్తం చేశారు. చిన్నారుల ఆరోగ్యం, పోషణ, అభివృద్ధితో పాటు మహిళల సంక్షేమానికి అంగన్వాడీ కేంద్రాలు ఎంతగానో ఉపయోగపడతాయని పేర్కొన్నారు. గ్రామీణ ప్రాంతాల్లో ప్రజలకు అవసరమైన మౌలిక సదుపాయాలు అందుబాటులో ఉండటం ద్వారా స్థానికులకు మెరుగైన సేవలు అందుతాయని తెలిపారు..