కరీంనగర్, అక్టోబర్ 29 (తెలంగాణ ముచ్చట్లు):
వర్షాభావ పరిస్థితులు, ఎల్‌నినో ప్రభావంతో పంట నష్టాలను ఎదుర్కొంటూ తీవ్ర ఇబ్బందులు పడుతున్న రైతులను ప్రభుత్వం ఆదుకోవాలని, కరీంనగర్ జిల్లాలోని తిమ్మాపూర్ మండలాన్ని వెంటనే కరువు మండలంగా ప్రకటించాలని డిమాండ్ చేస్తూ బీజేపీ తిమ్మాపూర్ మండల శాఖ ఆధ్వర్యంలో ధర్నా నిర్వహించారు.
ఇటీవల రాష్ట్ర ప్రభుత్వం ప్రకటించిన కరువు మండలాల జాబితాలో తిమ్మాపూర్‌కు చోటు కల్పించకపోవడాన్ని నిరసిస్తూ, తిమ్మాపూర్ పోలీస్ స్టేషన్ సమీపంలో ఆందోళన చేపట్టారు. అనంతరం రైతులకు న్యాయం చేయాలని కోరుతూ తిమ్మాపూర్ ఎమ్మార్వోకు వినతిపత్రం అందజేశారు.
తిమ్మాపూర్ మండలాన్ని తక్షణమే కరువు మండలంగా ప్రకటించి, అర్హులైన రైతులకు నష్టపరిహారంతో పాటు ప్రభుత్వ సహాయం అందించాలని బీజేపీ నాయకులు డిమాండ్ చేశారు. రైతులకు న్యాయం జరిగే వరకు బీజేపీ పోరాటం కొనసాగిస్తుందని స్పష్టం చేశారు.
ఈ కార్యక్రమంలో బీజేపీ తిమ్మాపూర్ మండల ప్రధాన కార్యదర్శి గొట్టిముక్కల తిరుపతిరెడ్డి తదితరులు పాల్గొన్నారు.
Comments