జమ్మికుంట ఎంఈఓ కార్యాలయంలో ఏం జరుగుతోంది?

* ఆర్టీఐ సమాచారంలో తప్పిదాలపై గట్టు సాయిరాం ఆరోపణలు.. ప్రత్యేక బృందంతో విచారణ జరపాలి

* ప్రైవేట్ పాఠశాలలకు కొమ్ముకాస్తున్నారని విమర్శలు

జమ్మికుంట, అక్టోబర్ 29 (తెలంగాణ ముచ్చట్లు):

ప్రభుత్వ కార్యాలయాల్లో పారదర్శకతకు పెద్దపీట వేయాల్సిన అధికారులే తప్పిదాలకు పాల్పడుతున్నారా? సమాచార హక్కు చట్టం కింద కోరిన వివరాలకు బదులుగా మరో పాఠశాల సమాచారాన్ని అందించడం, పాఠశాలల ధ్రువపత్రాల్లో సంవత్సరాల విషయంలో వ్యత్యాసాలు కనిపించడం వంటి అంశాలు జమ్మికుంట మండల విద్యాధికారి కార్యాలయ పనితీరుపై ప్రశ్నలు లేవనెత్తుతున్నాయని గట్టు సాయిరాం ఆరోపించారు. ఈ వ్యవహారాలకు సంబంధించి తన వద్ద ఉన్న ఆధారాలను గురువారం మీడియా ముందు ఉంచిన ఆయన, ఎంఈఓ కార్యాలయంలో జరుగుతున్నట్లు పేర్కొంటున్న తప్పిదాలపై సమగ్ర విచారణ జరిపి బాధ్యులపై చర్యలు తీసుకోవాలని జిల్లా కలెక్టర్‌ను డిమాండ్ చేశారు.

ప్రభుత్వ పాఠశాలల్లో విద్యార్థుల సంఖ్యను పెంచేందుకు ప్రభుత్వం పలు చర్యలు తీసుకుంటున్న తరుణంలో, జమ్మికుంట మండల విద్యాధికారి కార్యాలయం ప్రైవేట్ పాఠశాలలకు అనుకూలంగా వ్యవహరిస్తోందని గట్టు సాయిరాం విమర్శించారు. న్యూ జయభారతి పాఠశాలకు సంబంధించిన వివరాల కోసం సమాచార హక్కు చట్టం కింద దరఖాస్తు చేయగా, సంబంధిత పాఠశాల సమాచారానికి బదులుగా కేరళ పాఠశాలకు సంబంధించిన వివరాలు పంపించారని తెలిపారు. ఒక పాఠశాల సమాచారాన్ని కోరితే మరో పాఠశాల వివరాలు అందించడం అధికారుల పనితీరులో నిర్లక్ష్యానికి నిదర్శనమని ఆయన పేర్కొన్నారు.

సెయింట్ మేరీస్ పాఠశాలకు సంబంధించిన సమాచారంలోనూ కీలకమైన వ్యత్యాసం కనిపించిందని గట్టు సాయిరాం ఆరోపించారు. ఫైర్ ఎన్‌ఓసీ పత్రంలో 2024–2025 సంవత్సరం ఉన్నట్లు కనిపించగా, దానిని స్కాన్ చేసి పరిశీలించినప్పుడు 2019–2020 సంవత్సరం ఉన్నట్లు గుర్తించానని తెలిపారు. సంబంధిత పత్రంపై అధికారి సంతకం, కార్యాలయ ముద్ర కూడా ఉన్నాయని పేర్కొంటూ, పత్రాలను పరిశీలించి సమాచారాన్ని అందించే విషయంలో ఇంతటి వ్యత్యాసాలు ఎలా చోటుచేసుకున్నాయో ఉన్నతాధికారులు సమాధానం చెప్పాలని డిమాండ్ చేశారు.

ఇదొక్కటే కాకుండా, పాఠశాలలకు సంబంధించిన ఆర్టీఐ దరఖాస్తుల వ్యవహారంలోనూ తీవ్రమైన అక్రమాలు జరుగుతున్నాయని ఆయన ఆరోపించారు. దరఖాస్తుల్లోని సమాచారాన్ని తప్పుగా మార్చి మరో పాఠశాల పేరు నమోదు చేస్తున్నారని, సంబంధిత పాఠశాలలకు ఫోన్ చేసి డబ్బులు డిమాండ్ చేస్తున్నారనే ఆరోపణలు ఉన్నాయని వెల్లడించారు. ఈ ఆరోపణలకు సంబంధించి తన వద్ద ఆధారాలు ఉన్నాయని పేర్కొంటూ, ఎంఈఓ కార్యాలయంలో ఆర్టీఐ దరఖాస్తుల నిర్వహణపై ప్రత్యేకంగా విచారణ జరపాలని కోరారు.

మరోవైపు, ఒక ప్రైవేట్ కళాశాల విద్యార్థులకు ధ్రువపత్రాలు అందించే విషయంలోనూ ప్రభుత్వ ఉద్యోగి వ్యవహారశైలిపై తాను ప్రజావాణిలో ఫిర్యాదు చేసినట్లు గట్టు సాయిరాం తెలిపారు. సర్టిఫికెట్ల కోసం సంప్రదించిన విద్యార్థులను డబ్బులు చెల్లిస్తేనే ధ్రువపత్రాలు ఇస్తామని హెచ్చరించినట్లు ఆరోపణలు చేశానని పేర్కొన్నారు. అయితే, తన ఫిర్యాదుపై ఆధారాలు అడగకుండా, పూర్తిస్థాయి విచారణ చేపట్టకుండా సంబంధిత అధికారి ఎలాంటి కార్యక్రమంలో పాల్గొనలేదని, ఎలాంటి పత్రంలోనూ రాయలేదని వివరణ ఇచ్చారని తెలిపారు. ఫిర్యాదులోని అంశాలను క్షుణ్ణంగా పరిశీలించకుండా వివరణతోనే వ్యవహారాన్ని ముగించడం సరికాదని ఆయన అభిప్రాయపడ్డారు.

ప్రభుత్వ నిబంధనలను అమలు చేయాల్సిన అధికారులు బాధ్యతాయుతంగా వ్యవహరించాలని, విద్యార్థులు, తల్లిదండ్రులు, పాఠశాలలకు సంబంధించిన సమాచారంలో పారదర్శకత పాటించాలని గట్టు సాయిరాం అన్నారు. ఎంఈఓ కార్యాలయంపై వస్తున్న ఆరోపణలను సాధారణంగా తీసుకోకుండా జిల్లా కలెక్టర్ తక్షణమే స్పందించాలని కోరారు. ప్రత్యేక విచారణ బృందాన్ని ఏర్పాటు చేసి ఆర్టీఐ దరఖాస్తులు, పంపిన సమాచార పత్రాలు, ఫైర్ ఎన్‌ఓసీ వివరాలు, ప్రైవేట్ కళాశాల సర్టిఫికెట్ల వ్యవహారంపై సమగ్రంగా పరిశీలించి వాస్తవాలను వెలుగులోకి తీసుకురావాలని డిమాండ్ చేశారు. విచారణలో తప్పిదాలు నిర్ధారణ అయితే బాధ్యులైన అధికారులపై నిబంధనల ప్రకారం కఠిన చర్యలు తీసుకోవాలని, అవసరమైతే విధుల నుంచి తొలగించేలా చర్యలు చేపట్టాలని కోరారు.