వేలేరు, అక్టోబర్ 29 (తెలంగాణ ముచ్చట్లు):
హనుమకొండ జిల్లా వేలేరు మండలం మల్లికుదుర్ల గ్రామ శివారులో ఈ నెల 20న జరిగిన రోడ్డు ప్రమాదంలో గాయపడిన పీచర గ్రామానికి చెందిన మాతంగి రాజేష్ (33) చికిత్స పొందుతూ గురువారం ఉదయం మృతి చెందాడు. వరంగల్‌కు వెళ్లి తిరిగి వస్తుండగా, మల్లికుదుర్ల శివారులోని చెరువు వద్ద ఎదురుగా వచ్చిన టాటా ఏస్ వాహనం ఢీకొట్టడంతో రాజేష్ తీవ్రంగా గాయపడ్డాడు.
మొదట వరంగల్‌లో చికిత్స పొందిన రాజేష్‌ను మెరుగైన వైద్యం కోసం హైదరాబాద్‌లోని నిమ్స్ ఆసుపత్రికి తరలించారు. అక్కడ చికిత్స పొందుతూ మృతి చెందినట్లు కుటుంబ సభ్యులు తెలిపారు. మృతుడికి భార్య, రెండేళ్ల కుమార్తె ఉన్నారు. రాజేష్ మృతితో కుటుంబంలో విషాదం నెలకొంది.
Comments