ఎల్కతుర్తి, నవంబర్ 28: (తెలంగాణ ముచ్చట్లు)
హనుమకొండ జిల్లా ఎల్కతుర్తి మండలం వల్బాపూర్ గ్రామంలో ఇటీవల చోటుచేసుకున్న అగ్నిప్రమాదంలో చిర్ర రాజయ్య గౌడ్ కుటుంబం పూర్తిగా నిరాశ్రయులైన విషయం తెలిసిందే. చిన్నపాటి ఇల్లు, గృహోపకరణాలు, దినసరి వాడుక సామగ్రి అన్నీ మంటల్లో దగ్ధమై తీవ్ర ఆర్థిక నష్టం జరిగింది.
ఈ ఘటనతో ఆర్థికంగా నిలదొక్కుకోవడంలో ఇబ్బంది పడుతున్న కుటుంబాన్ని ఆదుకునేందుకు గ్రామ పెద్దలు, యువత, మహిళలు ముందుకు వచ్చారు. గ్రామస్థులు స్వచ్ఛందంగా విరాళాలు సేకరించి మొత్తం రూ. 21,865లను రాజయ్య గౌడ్ కుటుంబానికి అందజేశారు.
ఈ సందర్భంగా గ్రామస్తులు మాట్లాడుతూ, “ఇలాంటి సందర్భాల్లో బాధిత కుటుంబానికి గ్రామం మొత్తం అండగా ఉండటం మన బాధ్యత. మనం ఇచ్చే చిన్న సహాయం అయినా, వారికి ఇది ప్రస్తుతం అత్యవసరమైన సమయాల్లో పెద్ద తోడ్పాటు” అని పేర్కొన్నారు.
సహాయాన్ని అందజేసిన గ్రామ యువత, పెద్దలు, మహిళలకు రాజయ్య గౌడ్ కుటుంబం కృతజ్ఞతలు తెలిపారు. ఈ సంఘటన గ్రామస్థుల పరస్పర సహకారం, మానవత్వం ఇంకా సజీవంగా ఉన్నదని చూపించిన ఉదాహరణగా నిలిచింది. కార్యక్రమంలో గ్రామస్థులు తదితరులు పాల్గొన్నారు.
Comments