డిజిటల్ వేదికలపై జవాబుదారీతనం పెరగాలి
-- చిన్నమ్మ థామస్, రూరల్ డెవలప్మెంట్ సొసైటీ డైరెక్టర్
వనపర్తి ,అక్టోబర్01(తెలంగాణ ముచ్చట్లు):
సామాజిక మాధ్యమాలు, ఇతర డిజిటల్ వేదికలను వినియోగించే బాలల రక్షణకు మరింత బలమైన చర్యలు అవసరమని గ్రామీణ అభివృద్ధి సంస్థ డైరెక్టర్ చిన్నమ్మ థామస్ అన్నారు. మైనర్లకు సంబంధించిన భారతీయ చట్టాలను డిజిటల్ వేదికలు తప్పనిసరిగా పాటించేలా అవసరమైన నిబంధనలను చట్టబద్ధ వ్యవస్థలోకి తీసుకురావడంపై పరిశీలించాలని కేంద్ర ప్రభుత్వాన్ని కోరుతూ సుప్రీంకోర్టు ఇచ్చిన ఆదేశాలను ఆమె స్వాగతించారు.మహబూబ్‌నగర్, వనపర్తి, జోగులాంబ గద్వాల జిల్లాల్లో బాలల రక్షణ కోసం క్షేత్రస్థాయిలో పనిచేస్తున్న ఆర్‌డీఎస్.. పిల్లల ఆన్‌లైన్ భద్రతపై ప్రత్యేకంగా దృష్టి సారిస్తోంది. సామాజిక మాధ్యమాలను అధికంగా వినియోగిస్తున్న పిల్లలు లైంగిక దోపిడీ, మోసపూరిత పరిచయాలు, అక్రమ రవాణా, వేధింపులు వంటి ప్రమాదాలకు గురయ్యే అవకాశం ఉందని పేర్కొంది.చిన్నమ్మ థామస్ మాట్లాడుతూ.. నేటి పిల్లలు ఎక్కువ సమయాన్ని ఆన్‌లైన్‌లో గడుపుతున్నారు. అక్కడ ఎదురయ్యే ప్రమాదాలను వారు ఎల్లప్పుడూ పూర్తిగా అర్థం చేసుకోలేరు. పర్యవేక్షణ లేకుండా సామాజిక మాధ్యమాలను ఉపయోగించడం వల్ల పిల్లలు లైంగిక వేధింపులు, దోపిడీకి గురయ్యే ప్రమాదం ఉంది. కొందరు పిల్లలను మానసికంగా ప్రభావితం చేసి, చివరకు లైంగిక దోపిడీ, అక్రమ రవాణా వంటి పరిస్థితుల్లోకి నెట్టే అవకాశం ఉంది. అందువల్ల డిజిటల్ వేదికలు మరింత బాధ్యతాయుతంగా వ్యవహరించడంతో పాటు బలమైన రక్షణ చర్యలు, జవాబుదారీతనం కలిగి ఉండాలి అని అన్నారు.పిల్లలు స్వతంత్రంగా డిజిటల్ వేదికల్లో ఖాతాలు నిర్వహించే అంశంపై కూడా స్పష్టమైన నిబంధనలు, రక్షణ చర్యలు అవసరమని ఆమె తెలిపారు. పిల్లల హక్కులు, భద్రతకు ప్రాధాన్యం ఇవ్వాలని కోరారు.పిల్లల ఆన్‌లైన్ రక్షణ కోసం జస్ట్ రైట్స్ ఫర్ చిల్డ్రన్ కూటమి సుప్రీంకోర్టును ఆశ్రయించిందని ఆర్‌డీఎస్ తెలిపింది. ఈ కూటమికి ఆర్‌డీఎస్ భాగస్వామి సంస్థగా పనిచేస్తోంది. డిజిటల్ రంగంలో పిల్లలకు ఎదురయ్యే కొత్త తరహా ముప్పులను గుర్తించి నివారించేందుకు ప్రభుత్వాలు, చట్ట అమలు సంస్థలు, సమాజాలతో కలిసి పనిచేస్తున్నట్లు పేర్కొంది.పిల్లల ఆన్‌లైన్ భద్రతకు కుటుంబాలు, పాఠశాలలు, ప్రభుత్వ సంస్థలు, డిజిటల్ వేదికలు సమష్టిగా బాధ్యత వహించాలని చిన్నమ్మ థామస్ అన్నారు.
Comments