సీఎం చొరవతోనే ఘనపూర్‌కు డిగ్రీ కళాశాల.

స్టేషన్ ఘన్‌పూర్, అక్టోబర్ 1 (తెలంగాణ ముచ్చట్లు): 

తన ఎన్నికల హామీ మేరకు ముఖ్యమంత్రి రేవంత్‌రెడ్డిని పలుమార్లు కలిసి స్టేషన్ ఘన్‌పూర్ నియోజకవర్గానికి ప్రభుత్వ డిగ్రీ కళాశాలను మంజూరు చేయించానని ఎమ్మెల్యే కడియం శ్రీహరి తెలిపారు.స్టేషన్ ఘన్‌పూర్ పట్టణంలోని గురుకుల పాఠశాల స్థలంలో గురువారం డిగ్రీ కళాశాల భవన నిర్మాణానికి భూమిపూజ నిర్వహించి శిలాఫలకాన్ని ఆవిష్కరించారు. ఈ సందర్భంగా కడియం శ్రీహరి మాట్లాడుతూ ప్రభుత్వం జీవో నంబర్ 48 ద్వారా డిగ్రీ కళాశాలను మంజూరు చేసి రూ.8.60 కోట్లను కేటాయించిందన్నారు. ఇందులో రూ.6.10 కోట్లు భవన నిర్మాణానికి కేటాయించినట్లు తెలిపారు.

ముఖ్యమంత్రి ప్రత్యేక చొరవతో గురుకుల పాఠశాల భూమిని డిగ్రీ కళాశాల నిర్మాణానికి బదిలీ చేయడం సాధ్యమైందని చెప్పారు. కళాశాల భవన నిర్మాణాన్ని 2027 ఆగస్టు 1 నాటికి పూర్తి చేయాలని కాంట్రాక్టర్‌ను ఆదేశించినట్లు తెలిపారు.నియోజకవర్గానికి రూ.200 కోట్లతో యంగ్ ఇండియా సమీకృత పాఠశాల, రూ.9.90 కోట్లతో తెలంగాణ పబ్లిక్ పాఠశాల మంజూరైనట్లు పేర్కొన్నారు. ఘనపూర్ ప్రభుత్వ డిగ్రీ కళాశాలను రాష్ట్రంలోనే ఆదర్శ కళాశాలగా తీర్చిదిద్దుతామని అన్నారు.

కార్యక్రమంలో మున్సిపల్ చైర్మన్ తాటికొండ వినయ్, గ్రంథాలయ చైర్మన్ మారుజోడు రాంబాబు, మార్కెట్ కమిటీ చైర్మన్ లావణ్య శిరీష్‌రెడ్డి, కళాశాల ప్రిన్సిపాల్ చంద్రమౌళి, మున్సిపల్ కమిషనర్ రాధాకృష్ణ తదితరులు పాల్గొన్నారు.