రాష్ట్రస్థాయి కబడ్డీ పోటీలకు ఎంపికైన ఎడ్ల కృప.

ధర్మసాగర్, సెప్టెంబర్ 30 (తెలంగాణ ముచ్చట్లు): 

మండలంలోని తాటికాయల గ్రామానికి చెందిన ఎడ్ల అనిత–బుగులయ్య దంపతుల కుమార్తె ఎడ్ల కృప రాష్ట్రస్థాయి కబడ్డీ పోటీలకు ఎంపికైంది. కరుణాపురంలోని సెయింట్ అంథోని పాఠశాలలో ఎనిమిదో తరగతి చదువుతున్న కృప జిల్లా స్థాయి కబడ్డీ పోటీల్లో ప్రతిభ కనబరిచి రాష్ట్రస్థాయి పోటీలకు ఎంపికైనట్లు పాఠశాల వ్యాయామ ఉపాధ్యాయులు రాధిక, వినయ్ తెలిపారు.జిల్లా స్థాయి కబడ్డీ పోటీల్లో కృప అత్యుత్తమ ప్రతిభ కనబరిచి జట్టు విజయానికి తనవంతు సహకారం అందించిందని ఉపాధ్యాయులు తెలిపారు. క్రీడలతో విద్యార్థుల్లో శారీరక దృఢత్వంతో పాటు క్రమశిక్షణ, పట్టుదల, జట్టు స్ఫూర్తి పెంపొందుతాయని పేర్కొన్నారు. చిన్న వయసులోనే కబడ్డీలో ప్రతిభ చాటి రాష్ట్రస్థాయి పోటీలకు ఎంపిక కావడం అభినందనీయమన్నారు.కృప రాష్ట్రస్థాయికి ఎంపిక కావడం పట్ల సెయింట్ అంథోని పాఠశాల యాజమాన్యం, ఉపాధ్యాయులు, సిబ్బంది హర్షం వ్యక్తం చేశారు. రాష్ట్రస్థాయి పోటీల్లోనూ ప్రతిభ కనబరిచి పాఠశాలకు, తల్లిదండ్రులకు, తాటికాయల గ్రామానికి మంచి పేరు తీసుకురావాలని ఆకాంక్షించారు.

కృప ఎంపిక పట్ల తాటికాయల గ్రామంలోనూ హర్షం వ్యక్తమైంది. గ్రామ సర్పంచ్ ననుబాల సోమక్క–చంద్రమౌళి, ఉపసర్పంచ్ శివ, వార్డు సభ్యులు, గ్రామ పెద్దలు, యువత తదితరులు కృపను అభినందించి శుభాకాంక్షలు తెలిపారు. గ్రామీణ ప్రాంత విద్యార్థుల్లోనూ క్రీడా ప్రతిభకు కొదవలేదని, సరైన ప్రోత్సాహం లభిస్తే వారు జిల్లా, రాష్ట్ర, జాతీయ స్థాయిలో రాణించే అవకాశం ఉంటుందని వారు పేర్కొన్నారు.
కృప భవిష్యత్తులో మరిన్ని విజయాలు సాధించాలని, రాష్ట్రస్థాయి పోటీల్లో ఉత్తమ ప్రతిభ కనబరిచి పతకం సాధించాలని గ్రామ ప్రజలు ఆకాంక్షించారు. క్రీడల్లో ప్రతిభ కనబరిచే విద్యార్థులను పాఠశాల యాజమాన్యాలు, తల్లిదండ్రులు, గ్రామ ప్రజలు ప్రోత్సహించాలని వారు కోరారు.