పల్లగుట్టలో ఉచిత వైద్య శిబిరానికి విశేష స్పందన.

చిల్పూర్, సెప్టెంబర్ 29 (తెలంగాణ ముచ్చట్లు): 

చిల్పూర్ మండలంలోని పల్లగుట్ట గ్రామపంచాయతీలో మంగళవారం ఉచిత వైద్య శిబిరాన్ని నిర్వహించారు. గ్రామ సర్పంచ్ ఎనగందుల నరసింహారెడ్డి ఆధ్వర్యంలో మల్లారెడ్డి నారాయణ బహుళ వైద్య ప్రత్యేక ఆసుపత్రి వైద్యులచే ఈ శిబిరాన్ని ఏర్పాటు చేశారు.ఉదయం 10 గంటల నుంచి మధ్యాహ్నం 2 గంటల వరకు నిర్వహించిన శిబిరంలో గ్రామస్తులకు రక్తపోటు, మధుమేహం, జ్వరాలు, కీళ్ల నొప్పులు తదితర 25 రకాల అనారోగ్య సమస్యలకు ఉచితంగా వైద్య పరీక్షలు నిర్వహించి మందులు అందజేశారు. అవసరమైన వారికి ఉచిత శస్త్రచికిత్సలు, ఎక్స్‌రే, సీటీ స్కాన్, ఎంఆర్‌ఐ, ఈసీజీ, ద్విమితీయ గుండె పరీక్షలు నిర్వహించడంతో పాటు ఆసుపత్రికి వెళ్లేందుకు బస్సు సౌకర్యం కల్పించి చికిత్స అందిస్తామని నిర్వాహకులు తెలిపారు.

గ్రామంలో ఉచిత వైద్య శిబిరాన్ని ఏర్పాటు చేసి ప్రజలకు వైద్య సేవలు అందించిన ఆసుపత్రి యాజమాన్యానికి, వైద్యులకు సర్పంచ్ ఎనగందుల నరసింహారెడ్డి కృతజ్ఞతలు తెలిపారు. గ్రామీణ ప్రాంతాల్లో ఇలాంటి ఉచిత వైద్య శిబిరాలను మరింత విస్తృతంగా నిర్వహించి పేద ప్రజలకు వైద్య సేవలు అందించాలని కోరారు.
ఈ కార్యక్రమంలో ఉపసర్పంచ్ మహమ్మద్ రఫీ, వార్డు సభ్యులు, పంచాయతీ కార్యదర్శి, వైద్య సిబ్బంది, గ్రామస్తులు పాల్గొన్నారు.