స్టేషన్ ఘన్పూర్, సెప్టెంబర్ 29 (తెలంగాణ ముచ్చట్లు):
రైల్వే కార్మికుల సమస్యలను వెంటనే పరిష్కరించాలని డిమాండ్ చేస్తూ మంగళవారం స్టేషన్ ఘన్పూర్లో కార్మికులు ఆందోళన నిర్వహించారు. మజ్దూర్ యూనియన్ పిలుపు మేరకు దక్షిణ మధ్య రైల్వే మజ్దూర్ యూనియన్ ఇంజినీరింగ్ విభాగం కార్యదర్శి ఇల్లందుల రాజేందర్ ఆధ్వర్యంలో పనిముట్ల గదుల వద్ద నిరసన చేపట్టారు.ఈ సందర్భంగా రాజేందర్ మాట్లాడుతూ ట్రాక్ నిర్వహణ కార్మికుల గస్తీని 12 కిలోమీటర్లకు పరిమితం చేయాలని, కీమెన్లకు అదనపు విధులు అప్పగించవద్దని, ఖాళీగా ఉన్న పోస్టులను వెంటనే భర్తీ చేయాలని డిమాండ్ చేశారు. పెండింగ్లో ఉన్న అదనపు పని భత్యం, ప్రయాణ భత్యం, సెలవుల నగదీకరణ, పిల్లల విద్యా భత్యాలను వెంటనే విడుదల చేయాలని కోరారు.
రాత్రి గస్తీ విధులకు ఇద్దరు పెట్రోల్మెన్లను నియమించాలని, పీఎల్బీపై ఉన్న రూ.7 వేల పరిమితిని ఎత్తివేయాలని డిమాండ్ చేశారు. కార్మికుల సమస్యలను పరిష్కరించడంలో అధికారులు నిర్లక్ష్యం చేస్తే పెద్ద ఎత్తున ఆందోళనలు చేపడతామని హెచ్చరించారు.కార్యక్రమంలో చైర్మన్ కొంగర బిక్షపతి, సహాయ కార్యదర్శులు కరుణ, నరసింహస్వామి, దేవయ్య, భాస్కర్ తదితరులు పాల్గొన్నారు.
Comments