ప్రజారోగ్య సమస్యలపై రౌండ్ టేబుల్ సమావేశం.

*కరీంనగర్‌లో అక్టోబర్ 6న తెలంగాణ రక్షణ సేన ఆధ్వర్యంలో సమావేశం*

*పోస్టర్ ఆవిష్కరించిన కల్వకుంట్ల కవిత*

కరీంనగర్, అక్టోబర్ 1(తెలంగాణ ముచ్చట్లు ):

కరీంనగర్ జిల్లాలో ప్రజారోగ్య సమస్యలు, ప్రభుత్వ ఆసుపత్రుల్లో వైద్య సేవల పరిస్థితిపై చర్చించేందుకు తెలంగాణ రక్షణ సేన ఆధ్వర్యంలో అక్టోబర్ 6న రౌండ్ టేబుల్ సమావేశం నిర్వహించనున్నారు. ప్రజలకు మెరుగైన వైద్య సేవలు అందేలా ప్రభుత్వ ఆసుపత్రుల్లో అవసరమైన వసతులు, వైద్యులు, సిబ్బంది అందుబాటులో ఉండేలా చర్యలు తీసుకోవాలని సమావేశంలో చర్చించనున్నారు.

ఈ సమావేశానికి సంబంధించిన పోస్టర్‌ను తెలంగాణ రక్షణ సేన అధ్యక్షురాలు కల్వకుంట్ల కవిత ఆవిష్కరించారు. ఈ సందర్భంగా జిల్లాలో ప్రభుత్వ ఆసుపత్రుల్లో వైద్యులు, నర్సులు, సిబ్బంది కొరతను పరిష్కరించడం, అత్యవసర వైద్య సేవలు 24 గంటలూ అందుబాటులో ఉంచడం, అవసరమైన మందులు–వైద్య పరికరాలు సమకూర్చడం, ఆసుపత్రుల్లో పారిశుధ్యం మెరుగుపరచడం వంటి అంశాలపై దృష్టి సారించాల్సిన అవసరం ఉందని నిర్వాహకులు తెలిపారు.

అలాగే ప్రైవేట్ ఆసుపత్రుల్లో అధిక ఫీజులు, వైద్య పరీక్షల పేరుతో ప్రజలపై పడుతున్న ఆర్థిక భారం తదితర అంశాలపైనా రౌండ్ టేబుల్ సమావేశంలో చర్చించనున్నట్లు పేర్కొన్నారు. తెలంగాణ రక్షణ సేన జిల్లా అధ్యక్షుడు గుంజపడుగు హరిప్రసాద్ ఆధ్వర్యంలో ఈ కార్యక్రమం జరగనుంది. సమావేశానికి ప్రజారోగ్య రంగానికి చెందినవారు, వైద్యులు, ప్రజా ప్రతినిధులు, ప్రజా సంఘాల ప్రతినిధులు పాల్గొని తమ అభిప్రాయాలను వెల్లడించనున్నట్లు తెలిపారు.