పెండింగ్లో ఉన్న ఉద్యోగ ఉపాధ్యాయ సమస్యలు పరిష్కరించాలి

మంచిర్యాల బ్యూరో, తెలంగాణ ముచ్చట్లు:

రాష్ట్రంలో పెండింగ్లో ఉన్న ఉద్యోగ ఉపాధ్యాయుల సమస్యలు పరిష్కరించాలని తెలంగాణ ఉద్యోగ ఉపాధ్యాయుల ఐకాసా చైర్మన్, టిఎన్జీవో కేంద్ర సంఘం అధ్యక్షుడు మారం జగదీష్ డిమాండ్ చేశారు. శనివారం జిల్లాకు విచ్చేసిన ఆయన జిల్లా కేంద్రమైన మంచిర్యాల పట్టణంలోని టిఎన్జీవో భవన్లో విలేకరుల సమావేశం నిర్వహించారు. ఈ సందర్భంగా ఆయన మాట్లాడుతూ, ముందుగా ప్రతి నెల 1న జీతాలు చెల్లిస్తున్న రాష్ట్ర ప్రభుత్వానికి, రాష్ట్ర ముఖ్యమంత్రి రేవంత్ రెడ్డికి ప్రత్యేక కృతజ్ఞతలు తెలిపారు. ఉద్యోగ, ఉపాధ్యాయుల పెండింగ్ సమస్యలు పరిష్కరించాలని, పెండింగ్లో ఉన్న నాలుగు డిఏ లను వెంటనే ప్రకటించాలని కోరారు. అదే విధంగా సిపిఎస్ ను తొలగించి, పాత పెన్షన్ విధానమైన ఓపిఎస్ ను అమలు చేయాలన్నారు. ఉద్యోగ ఉపాధ్యాయులకు ఇవ్వవలసిన పిఆర్సి ని ఆమోదయోగ్యమైన శాతంతో వెంటనే ఇవ్వాలని, పెండింగ్ బిల్లును వెంటనే చెల్లించాలని కోరారు. జిఓ నెంబర్ 317 వలన నష్టపోయిన ఉద్యోగులను, వారి స్థానిక జిల్లాలకు పంపాలన్నారు. సెప్టెంబర్ 1న అన్ని జిల్లా, మండల కేంద్రాలలో ఉద్యోగ ఉపాధ్యాయులు అందరూ నల్ల బ్యాడ్జీలు ధరించి, విద్రోహ దినం పాటించాలని పిలుపునిచ్చారు. అదేవిధంగా ఇటీవల జరిగిన బదిలీలలో మిగిలిపోయిన స్పౌస్, ఇతర ఉద్యోగులకు బదిలీలు చేపట్టాలని కోరారు. ఈ కార్యక్రమంలో టిఎన్జీవో జిల్లా అధ్యక్షుడు గడియారం శ్రీహరి, పిఆర్టియు టిఎస్ జిల్లా అధ్యక్షుడు తిరుమల రెడ్డి ఇన్నారెడ్డి, ఉద్యోగ ఉపాధ్యాయ సంఘాల నాయకులు, తదితరులు పాల్గొన్నారు.