కుదించిన ప్రింట్ మీడియా వార్త ఇలా ఉంటుంది:

రోగులకు అమ్మలా.. సేవల్లో ఆదర్శంగా నిలిచిన ఎవాంజిలిన్.

వనపర్తి,జూలై30(తెలంగాణ ముచ్చట్లు):

ప్రభుత్వ జనరల్ ఆసుపత్రి–వనపర్తి జిల్లా కేంద్రంలో హెడ్ నర్స్ చీఫ్‌గా 40 సంవత్సరాల పాటు విశిష్ట సేవలు అందించిన యు. ఎవాంజిలిన్ పదవీ విరమణ చేశారు. ఈ సందర్భంగా నిర్వహించిన సన్మాన కార్యక్రమంలో సాహితీ కళా వేదిక వనపర్తి జిల్లా అధ్యక్షులు పలుస శంకర్ గౌడ్ పాల్గొని ఆమెను శాలువా, జ్ఞాపికతో ఘనంగా సత్కరించారు.ఈ సందర్భంగా శంకర్ గౌడ్ మాట్లాడుతూ..ఎవాంజిలిన్ ఎంతోమంది రోగులకు తల్లిలా సేవ చేశారని, రాత్రింబవళ్లు రోగుల సంరక్షణ కోసం ఆమె చేసిన కృషి అమూల్యమని కొనియాడారు. ఒక నర్సుగా మాత్రమే కాకుండా, తల్లిగా, గురువుగా జూనియర్ నర్సులకు మార్గనిర్దేశం చేశారని తెలిపారు. ఆమె క్రమశిక్షణ, అంకితభావం, మానవత్వం అందరికీ ఆదర్శంగా నిలుస్తాయని పేర్కొన్నారు.పదవీ విరమణ అనంతరం కుటుంబ సభ్యులతో ఆనందంగా, ఆరోగ్యంగా గడపాలని ఆకాంక్షించారు. కార్యక్రమంలో డా. బండారు శ్రీనివాస్, సామాజికవేత్త గంధం నాగరాజు, ప్రొఫెసర్ డాక్టర్ చంద్రమోహన్, ప్రొఫెసర్ డాక్టర్ శివప్రసాద్, వైద్యులు, నర్సులు, ఆసుపత్రి సిబ్బంది తదితరులు పాల్గొన్నారు.