వేలేరు, జులై 04 (తెలంగాణ ముచ్చట్లు):
వేలేరు మండలం పీచర గ్రామంలోని ఓ అంగన్వాడీ కేంద్రంలో లబ్ధిదారురాలికి పంపిణీ చేసిన కోడిగుడ్లు కుళ్లిపోయినవిగా ఉండటంతో స్థానికంగా ఆందోళన వ్యక్తమైంది. ఇంటికి తీసుకెళ్లి గుడ్లను పగులగొట్టగా అవి పూర్తిగా పాడై ఉండటాన్ని గమనించిన మహిళ అధికారుల నిర్లక్ష్యంపై ఆవేదన వ్యక్తం చేశారు.
ఈ ఘటనపై గ్రామస్తులు తీవ్ర అసంతృప్తి వ్యక్తం చేస్తూ, గర్భిణులు, బాలింతలు, చిన్నారులకు అందించే పౌష్టికాహార నాణ్యతపై అధికారులు ప్రత్యేక దృష్టి సారించాలని కోరారు. అంగన్వాడీ కేంద్రాలకు సరఫరా చేసే కోడిగుడ్ల నాణ్యతను క్రమం తప్పకుండా తనిఖీ చేసి, ఇలాంటి ఘటనలు పునరావృతం కాకుండా బాధ్యులపై తగిన చర్యలు తీసుకోవాలని విజ్ఞప్తి చేశారు. అధికారులు వెంటనే స్పందించి సమస్యను పరిష్కరించాలని గ్రామస్తులు డిమాండ్ చేశారు.
Comments