అర్హులకు అన్యాయం.. ప్రీ-ప్రైమరీ నియామకాలపై విచారణ జరపాలి.

- కలెక్టర్‌కు బీఆర్‌ఎస్ వినతి.
- అవసరమైతే హైకోర్టును ఆశ్రయిస్తామని మాజీ ఎమ్మెల్యే సండ్ర వెంకట వీరయ్య హెచ్చరిక.

సత్తుపల్లి, జూలై 30(తెలంగాణ ముచ్చట్లు): 

జిల్లాలో ఇటీవల నిర్వహించిన ప్రీ-ప్రైమరీ ఇన్‌స్ట్రక్టర్, ఆయా పోస్టుల నియామక ప్రక్రియలో భారీ అక్రమాలు చోటుచేసుకున్నాయని ఆరోపిస్తూ సమగ్ర విచారణ చేపట్టి బాధ్యులపై కఠిన చర్యలు తీసుకోవాలని సత్తుపల్లి మాజీ ఎమ్మెల్యే సండ్ర వెంకట వీరయ్య ఆధ్వర్యంలో బీఆర్‌ఎస్ నాయకులు గురువారం జిల్లా కలెక్టర్ టి.ఎస్. దివాకర్‌కు వినతిపత్రం సమర్పించారు. బాధిత అభ్యర్థులతో కలిసి కలెక్టరేట్‌కు చేరుకున్న నాయకులు నియామకాల్లో జరిగినట్లు ఆరోపిస్తున్న అవకతవకలపై ఫిర్యాదు చేశారు. ఈ సందర్భంగా మాజీ ఎమ్మెల్యే సండ్ర వెంకట వీరయ్య మాట్లాడుతూ.. అర్హత, ప్రతిభ ఉన్న అభ్యర్థులను పక్కనబెట్టి నియామక ప్రక్రియను అక్రమాలకు వేదికగా మార్చారని ఆరోపించారు. మొత్తం నియామక ప్రక్రియపై ఉన్నతస్థాయి విచారణ జరిపించి, అవకతవకలకు పాల్పడిన అధికారులపై చట్టపరమైన చర్యలు తీసుకోవాలని కలెక్టర్‌ను కోరారు. అర్హులైన అభ్యర్థులకు న్యాయం జరిగేలా నియామకాలను పారదర్శకంగా పునఃసమీక్షించాలని డిమాండ్ చేశారు. బాధిత అభ్యర్థులు ఆందోళన చెందాల్సిన అవసరం లేదని, వారికి బీఆర్‌ఎస్ పార్టీ అండగా నిలుస్తుందని సండ్ర వెంకట వీరయ్య భరోసా ఇచ్చారు. న్యాయం జరగకపోతే హైకోర్టును ఆశ్రయించి న్యాయపోరాటం చేస్తామని స్పష్టం చేశారు. వినతిపత్రం సమర్పించిన వారిలో మాజీ మండల, నగర పార్టీ అధ్యక్షులు బెల్లం వేణుగోపాల్, పగడాల నాగరాజు, భాషబోయిన వీరన్న, నాయకులు బిచ్చాల తిరుమలరావు, బత్తుల మురళి, ఇతర బీఆర్‌ఎస్ నాయకులు, బాధిత అభ్యర్థులు పాల్గొన్నారు.