దళిత హక్కుల రక్షణ కోసం ఐక్య పోరాటం 

స్టేషన్ ఘనపూర్, మార్చి 14 (తెలంగాణ ముచ్చట్లు):

దళిత హక్కుల పోరాట సమితి హనుమకొండ జిల్లా రెండవ మహాసభను ఈ నెల 20వ తేదీన హనుమకొండలోని బాలసముద్రంలో ఉన్న భారత కమ్యూనిస్టు పార్టీ కార్యాలయంలో నిర్వహించనున్నట్లు సమితి నాయకులు తెలిపారు. ఈ మహాసభను విజయవంతం చేయాలని వారు పిలుపునిచ్చారు.
మహాసభలను పురస్కరించుకొని ధర్మసాగర్ మండల కేంద్రంలో నిర్వహించిన విలేకరుల సమావేశంలో దళిత హక్కుల పోరాట సమితి జిల్లా అధ్యక్షుడు నిమ్మల మనోహర్, జిల్లా కార్యదర్శి రొంటాల దేవా మాట్లాడారు. 

వారు మాట్లాడుతూ భారత రాజ్యాంగం ప్రకారం రిజర్వేషన్లు అమలు చేయాల్సిన ప్రభుత్వాలు ప్రైవేటు రంగాలలో రిజర్వేషన్లు అమలు చేయడంలో సరైన చర్యలు తీసుకోవడం లేదని విమర్శించారు. రిజర్వేషన్ వ్యవస్థ ఉనికికే ప్రమాదం ఏర్పడుతున్నదని ఆందోళన వ్యక్తం చేశారు.

రాజ్యాంగబద్ధంగా ఎన్నికైన ప్రభుత్వాలు దళితుల అభివృద్ధి కోసం కేటాయించాల్సిన 20 శాతం నిధులను ఇప్పటివరకు సరైన విధంగా కేటాయించలేదని తెలిపారు. కేటాయించిన కొద్దిపాటి నిధులను కూడా దళితుల అభివృద్ధికి వినియోగించకుండా ఇతర పథకాలకు మళ్లిస్తున్నారని ఆరోపించారు. స్వాతంత్ర్యం వచ్చిన దాదాపు 76 సంవత్సరాల కాలంలో దళితులకు ఆశించిన స్థాయిలో న్యాయం జరగలేదని అన్నారు.
దళితులపై జరుగుతున్న దాడులను కేంద్ర, రాష్ట్ర ప్రభుత్వాలు అరికట్టలేకపోతున్నాయని పేర్కొన్నారు. ఎస్సీ, ఎస్టీ అఘాయిత్యాల నిరోధక చట్టం కింద నమోదయ్యే కేసుల్లో పోలీసు స్టేషన్లలో బెయిలు ఇవ్వకుండా కఠిన చర్యలు తీసుకుంటేనే దళితులపై దాడులు తగ్గుతాయని వారు డిమాండ్ చేశారు.
ఖాళీగా ఉన్న రిజర్వేషన్ ఉద్యోగాలను భర్తీ చేయడంలో కేంద్ర ప్రభుత్వ పనితీరు సంతృప్తికరంగా లేదని విమర్శించారు. రాష్ట్రంలో కాంగ్రెస్ ప్రభుత్వం అధికారంలోకి వచ్చి దాదాపు మూడు సంవత్సరాలు గడిచినా ఎన్నికల హామీలలో పేర్కొన్న “అంబేద్కర్ హస్తం” పథకం కింద దళితులకు 12 లక్షల రూపాయల ఆర్థిక సహాయం ఇప్పటివరకు అందలేదని తెలిపారు.
ఇందిరమ్మ గృహాల పథకంలో ఇల్లు లేని పేదలలో దాదాపు 80 శాతం మంది దళితులే ఉన్నారని పేర్కొన్నారు. కాబట్టి ఈ గృహాల కేటాయింపులో మొదటి ప్రాధాన్యత దళితులకు ఇవ్వాలని ప్రభుత్వాన్ని కోరారు.
మార్చి 20న జరగనున్న ఈ మహాసభకు మాజీ శాసనసభ్యుడు పోతరాజు సారయ్య, దళిత హక్కుల పోరాట సమితి రాష్ట్ర ప్రధాన కార్యదర్శి మారుపాక అనిల్ కుమార్, భారత కమ్యూనిస్టు పార్టీ హనుమకొండ జిల్లా కార్యదర్శి కర్ర బిక్షపతి, జిల్లా సహాయ కార్యదర్శి మద్దెల ఎల్లీస్, జిల్లా నిర్మాణ బాధ్యులు కొట్టపాక రవి, జిల్లా కార్యవర్గ సభ్యులు మునిగాల బిక్షపతి తదితరులు హాజరుకానున్నట్లు తెలిపారు.
ఈ విలేకరుల సమావేశంలో ధర్మసాగర్ మండల దళిత హక్కుల పోరాట సమితి కార్యదర్శి రాజారపు రత్నం, భారత కమ్యూనిస్టు పార్టీ మండల కార్యదర్శి కొట్టే వెంకటేష్, గ్రామ కార్యదర్శి చిలుక బాబు, సీనియర్ నాయకులు దోకి రాజయ్య, వల్లపు సారయ్య, వల్లపు వెంకన్న, రాస మల్ల కుమార్, బొడిగె కమలాకర్ తదితరులు పాల్గొన్నారు.