పెద్దమందడి,సెప్టెంబర్20(తెలంగాణ ముచ్చట్లు):
వనపర్తి జిల్లా పెద్దమందడి మండలంలో బీఆర్ఎస్ నాయకుడు అల్వాల వెంకట్ రెడ్డి తనదైన శైలిలో దూకుడుగా వ్యవహరిస్తూ పార్టీ కార్యక్రమాల్లో చురుగ్గా పాల్గొంటున్నారు. ముఖ్యంగా ప్రతిపక్ష పార్టీల విమర్శలకు దీటుగా స్పందిస్తూ, వివిధ అంశాలపై స్పష్టంగా మాట్లాడటం ద్వారా మండల రాజకీయాల్లో తనకంటూ ప్రత్యేక గుర్తింపు తెచ్చుకుంటున్నారు.
రైతుల సమస్యలపై పూర్తి అవగాహనతో మాట్లాడుతున్న వెంకట్ రెడ్డి.. రైతులకు సంబంధించిన అంశాలను ప్రస్తావిస్తూ ప్రతిపక్ష పార్టీలకు గట్టిగా కౌంటర్ ఇస్తున్నారు. ఏ అంశంపైనైనా అనర్గళంగా మాట్లాడే సామర్థ్యం, ప్రజా సమస్యలను ప్రస్తావించే తీరు, పార్టీ కార్యక్రమాల్లో చురుకైన భాగస్వామ్యం ఆయనకు మరింత గుర్తింపు తీసుకొస్తున్నాయని స్థానికంగా చర్చ జరుగుతోంది.
ముఖ్యంగా పెద్దమందడి మండలం అధికారపక్ష ఎమ్మెల్యేకు సొంత మండలం కావడంతో బీఆర్ఎస్ తరఫున ప్రతిపక్ష పాత్రను మరింత బలంగా వినిపించాల్సిన అవసరం ఉందని పార్టీ శ్రేణులు భావిస్తున్నాయి. ఈ నేపథ్యంలో వెంకట్ రెడ్డి దూకుడు పార్టీకి కలిసొచ్చే అంశంగా మారిందనే అభిప్రాయాలు వ్యక్తమవుతున్నాయి.
*పార్టీ పదవి ఇస్తే మరింత దూకుడు*
వెంకట్ రెడ్డికి బీఆర్ఎస్ అధిష్టానం ఏదైనా పార్టీ పదవి అప్పగిస్తే ఆయన మరింత బాధ్యతతో, దూకుడుగా పనిచేసే అవకాశం ఉందని మండల ప్రజలు, పార్టీ కార్యకర్తల్లో చర్చ జరుగుతోంది. ఇప్పటికే ఎలాంటి పదవి లేకుండానే పార్టీ కార్యక్రమాల్లో చురుగ్గా పాల్గొంటూ ప్రతిపక్షాలకు కౌంటర్ ఇస్తున్న ఆయనకు సంస్థాగత బాధ్యతలు అప్పగిస్తే మండలంలో పార్టీని మరింత బలోపేతం చేసే అవకాశం ఉందని పలువురు అభిప్రాయపడుతున్నారు.
ప్రజా సమస్యలను బలంగా వినిపించే నాయకులు, ప్రతిపక్షాలను రాజకీయంగా ఎదుర్కొనే సత్తా ఉన్న నేతలను బీఆర్ఎస్ అధిష్టానం గుర్తించి ప్రోత్సహించాల్సిన అవసరం ఉందని పార్టీ శ్రేణులు కోరుతున్నాయి. ముఖ్యంగా రాబోయే రోజుల్లో వనపర్తి నియోజకవర్గంలో బీఆర్ఎస్ పునర్వైభవానికి కృషి చేయాలంటే క్షేత్రస్థాయిలో చురుగ్గా పనిచేసే నాయకులకు బాధ్యతలు అప్పగించడం కీలకమని వారు పేర్కొంటున్నారు.
మాజీ మంత్రి సింగిరెడ్డి నిరంజన్రెడ్డి నాయకత్వంలో వనపర్తిలో పార్టీని మళ్లీ బలోపేతం చేయాలంటే వెంకట్ రెడ్డి వంటి దూకుడుగా వ్యవహరించే నాయకులను అధిష్టానం గుర్తించి తగిన బాధ్యతలు అప్పగించాలని స్థానికంగా అభిప్రాయాలు వ్యక్తమవుతున్నాయి. పార్టీ పదవి దక్కితే వెంకట్ రెడ్డి మరింత చురుగ్గా పనిచేస్తూ పెద్దమందడి మండలంలో బీఆర్ఎస్ బలోపేతానికి తన వంతు పాత్ర పోషించే అవకాశం ఉందని రాజకీయ వర్గాల్లో చర్చ సాగుతోంది.
Comments