రక్తదానం మహాదానం.. వైద్యుల సూచనలతోనే రక్తదానం చేయాలి.

డాక్టర్ శ్రీకాంత్ రెడ్డి

హుజూరాబాద్, జూన్ 14 (తెలంగాణ ముచ్చట్లు):

అంతర్జాతీయ రక్తదాన దినోత్సవం సందర్భంగా రక్తదానం యొక్క ప్రాముఖ్యతపై ప్రజల్లో అవగాహన పెరుగుతోందని, అయితే ప్రతి ఒక్కరూ వైద్యుల సూచనలు మరియు ఆరోగ్య ప్రమాణాలను పాటిస్తూ మాత్రమే రక్తదానం చేయాలని ప్రభుత్వ సివిల్ సర్జన్ డాక్టర్ శ్రీకాంత్ రెడ్డి సూచించారు.
ఆయన మాట్లాడుతూ ఆరోగ్యంగా ఉన్న వ్యక్తులు మాత్రమే రక్తదానం చేయాలని, ఇటీవల అనారోగ్య సమస్యలు ఎదుర్కొన్న వారు లేదా ప్రత్యేక వైద్య పరిస్థితులు ఉన్నవారు ముందుగా వైద్యులను సంప్రదించాలని తెలిపారు. రక్తదానం పూర్తిగా సురక్షితమైన ప్రక్రియ అని, ఒక యూనిట్ రక్తం ముగ్గురు ప్రాణాలను కాపాడగలదని పేర్కొన్నారు.
అత్యవసర పరిస్థితుల్లో రక్తం అందుబాటులో ఉండేందుకు స్వచ్ఛంద రక్తదాతలు ముందుకు రావాలని ఆయన పిలుపునిచ్చారు. రక్తదానం వల్ల ఎలాంటి ఆరోగ్య నష్టాలు ఉండవని, నిర్ణీత కాల వ్యవధి తర్వాత మళ్లీ రక్తదానం చేయవచ్చని వివరించారు.
యువత సమాజ సేవలో భాగంగా అధిక సంఖ్యలో రక్తదాన శిబిరాల్లో పాల్గొని ప్రాణదాతలుగా నిలవాలని కోరారు. “రక్తదానం మహాదానం – మీ ఒక్క యూనిట్ రక్తం మరొకరి జీవితానికి ఆశాకిరణం” అని డాక్టర్ శ్రీకాంత్ రెడ్డి పేర్కొన్నారు.