రైతు సమస్యలపై సూరారంలో గర్జించిన రైతాంగం.

ఎల్కతుర్తి, జూన్ 14 (తెలంగాణ ముచ్చట్లు):

హనుమకొండ జిల్లా ఎల్కతుర్తి మండలం సూరారం గ్రామంలో రైతులు ఎదుర్కొంటున్న పలు సమస్యలపై నిర్వహించిన సమావేశంలో రైతాంగం గళం విప్పింది. వ్యవసాయ రంగాన్ని ప్రభావితం చేస్తున్న ప్రధాన సమస్యలపై చర్చించిన రైతులు, తమ డిమాండ్ల సాధన కోసం ప్రత్యేక తీర్మానాన్ని ఏకగ్రీవంగా ఆమోదించారు.
సమావేశంలో పంటలకు గిట్టుబాటు ధరలు కల్పించడం, సాగునీటి సమస్యలను శాశ్వతంగా పరిష్కరించడం, నాణ్యమైన విత్తనాలు మరియు ఎరువులను అందుబాటులో ఉంచడం, వ్యవసాయానికి అవసరమైన మౌలిక సదుపాయాలు కల్పించడం, రైతుల సంక్షేమానికి తక్షణ చర్యలు చేపట్టడం వంటి అంశాలను ప్రధానంగా ప్రస్తావించారు.
ఈ డిమాండ్లతో కూడిన తీర్మాన ప్రతిని తెలంగాణ రైతు రక్షణ సమితి హనుమకొండ జిల్లా అధ్యక్షుడు హింగే భాస్కర్ ప్రతిపాదించగా, సమావేశంలో పాల్గొన్న రైతులు ఏకగ్రీవంగా ఆమోదం తెలిపారు.
ఈ సందర్భంగా హింగే భాస్కర్ మాట్లాడుతూ, రైతుల సమస్యలను ప్రభుత్వం మరియు సంబంధిత అధికారుల దృష్టికి తీసుకెళ్లి వాటి పరిష్కారం కోసం నిరంతరం పోరాటం కొనసాగిస్తామని అన్నారు. రైతులు ఆమోదించిన తీర్మానాలను వెంటనే అమలు చేసి వ్యవసాయ రంగానికి భరోసా కల్పించాలని ప్రభుత్వాన్ని డిమాండ్ చేశారు.
రైతు బలపడితేనే గ్రామం బలపడుతుందని, గ్రామాలు అభివృద్ధి చెందితేనే దేశం పురోగతి సాధిస్తుందని ఆయన పేర్కొన్నారు. రైతుల హక్కుల పరిరక్షణ, రైతు సంక్షేమం కోసం తెలంగాణ రైతు రక్షణ సమితి పోరాటం నిరంతరం కొనసాగుతుందని స్పష్టం చేశారు.
ఈ సమావేశంలో గ్రామానికి చెందిన రైతులు పెద్ద సంఖ్యలో పాల్గొని తమ సమస్యలను వివరించి, వాటి పరిష్కారానికి ఐక్యంగా ముందుకు సాగాలని నిర్ణయించారు.