డాక్టర్ నల్ల నారాయణరెడ్డికి ఘన వీడ్కోలు సన్మానం.

హుజూరాబాద్, జూన్ 9 (తెలంగాణ ముచ్చట్లు):

హుజూరాబాద్ ప్రభుత్వ ఏరియా ఆసుపత్రిలో ఎన్నో సంవత్సరాలుగా విశిష్ట సేవలందించిన సూపరింటెండెంట్ డాక్టర్ నల్ల నారాయణరెడ్డి బదిలీj నేపథ్యంలో ఆసుపత్రి ఆవరణలో ఘన సన్మాన కార్యక్రమం నిర్వహించారు. ఈ సందర్భంగా ఆసుపత్రి వైద్యులు, నర్సింగ్ సిబ్బంది, ఉద్యోగులు, ప్రజాప్రతినిధులు, స్థానికu ప్రముఖులు పాల్గొని ఆయన సేవలను కొనియాడారు.
డాక్టర్ నారాయణరెడ్డి తన పదవీకాలంలో ఆసుపత్రి అభివృద్ధికి విశేష కృషి చేశారని పలువురు వక్తలు పేర్కొన్నారు. వైద్య సేవలను ప్రజలకు మరింత చేరువ చేయడంతో పాటు రోగులకు నాణ్యమైన చికిత్స అందించేందుకు నిరంతరం కృషి చేశారని తెలిపారు. ఆసుపత్రిలో మౌలిక వసతుల అభివృద్ధి, వైద్య సేవల విస్తరణ, సిబ్బంది సమన్వయం వంటి అంశాల్లో ఆయన పాత్ర కీలకమైందని కొనియాడారు.
కరోనా వంటి క్లిష్ట పరిస్థితుల్లోనూ ప్రజల ఆరోగ్య రక్షణ కోసం అహర్నిశలు శ్రమించి, ప్రజల ప్రశంసలు అందుకున్నారని పేర్కొన్నారు. రోగుల పట్ల మానవీయ దృక్పథంతో వ్యవహరిస్తూ అందరి మన్ననలు పొందారని, వైద్య వృత్తిలో ఆయన చూపిన నిబద్ధత యువ వైద్యులకు ఆదర్శంగా నిలుస్తుందని అన్నారు.
ఈ సందర్భంగా డాక్టర్ నారాయణరెడ్డికి శాలువా కప్పి, పుష్పగుచ్ఛాలు అందజేసి ఘనంగా సన్మానించారు. పలువురు ఉద్యోగులు ఆయనతో కలిసి పనిచేసిన అనుభవాలను గుర్తుచేసుకుంటూ భావోద్వేగానికి గురయ్యారు.
తనకు సహకరించిన వైద్యులు, నర్సులు, సిబ్బంది, ప్రజాప్రతినిధులు, ప్రజలందరికీ డాక్టర్ నారాయణరెడ్డి కృతజ్ఞతలు తెలిపారు. బదిలీ అయినప్పటికీ హుజూరాబాద్ ప్రజలతో తన అనుబంధం ఎప్పటికీ కొనసాగుతుందని పేర్కొన్నారు. ఆసుపత్రి మరింత అభివృద్ధి చెందాలని ఆకాంక్షించారు.
ఇదే సందర్భంగా హుజూరాబాద్ ప్రభుత్వ ఏరియా ఆసుపత్రి నూతన సూపరింటెండెంట్‌గా డాక్టర్ పి. శ్రీకాంత్ బాధ్యతలు స్వీకరించినట్లు అధికారులు తెలిపారు. ఆయన నాయకత్వంలో ఆసుపత్రి సేవలు మరింత మెరుగుపడి ప్రజలకు అందుబాటులోకి రావాలని పలువురు ఆకాంక్షించారు.
కార్యక్రమంలో వైద్యులు, ఆసుపత్రి సిబ్బంది, ప్రజాప్రతినిధులు, సామాజిక కార్యకర్తలు తదితరులు పాల్గొన్నారు. డాక్టర్ నల్ల నారాయణరెడ్డి సేవలను స్మరించుకుంటూ పలువురు ఆయనకు శుభాకాంక్షలు తెలియజేశారు.