తల్లిని కోల్పోయిన చిన్నారి భవ్యశ్రీకి పూర్వ విద్యార్థుల అండ.

పెద్దమందడి,జూన్14(తెలంగాణ ముచ్చట్లు):

వనపర్తి జిల్లా  పెద్దమందడి జిల్లా పరిషత్ ఉన్నత పాఠశాల 2005-06 విద్యా సంవత్సరానికి చెందిన పూర్వ విద్యార్థులు మానవత్వాన్ని చాటుతూ తమ తోటి స్నేహితురాలి కుమార్తెకు ఆర్థిక సహాయాన్ని అందించారు. పెద్దమందడి మండలం దొడగుంటపల్లి గ్రామానికి చెందిన రేణుక, పెద్దమందడి ప్రభుత్వ జిల్లా పరిషత్ ఉన్నత పాఠశాలలో 2005-06 బ్యాచ్‌లో పదో తరగతి చదివారు. ఇటీవల నెల రోజుల క్రితం అనారోగ్యంతో ఆమె మృతి చెందారు.ఈ విషయం తెలుసుకున్న ఆమె తోటి స్నేహితులు ,తల్లిని కోల్పోయి ఒంటరిగా మిగిలిన కుమార్తె భవ్యశ్రీకి అండగా నిలవాలని నిర్ణయించుకున్నారు. ఈ క్రమంలో 2005-06 బ్యాచ్ స్నేహితులు అందరూ కలిసి రూ.50 వేల నగదును సమీకరించి భవ్యశ్రీకి ఆర్థిక సహాయంగా అందించారు.చిన్నారి భవిష్యత్ అవసరాలను దృష్టిలో ఉంచుకుని ఈ మొత్తాన్ని భవ్యశ్రీ పేరుతో బ్యాంకులో ఫిక్స్‌డ్ డిపాజిట్ చేయాలని నిర్ణయించారు.అలాగే భవిష్యత్తులో భవ్యశ్రీ విద్యాభ్యాసానికి అవసరమైన ఎలాంటి సహాయం కావాలన్నా అందించేందుకు తాము సిద్ధంగా ఉంటామని పూర్వ విద్యార్థులు హామీ ఇచ్చారు. ఈ సందర్భంగా చిన్నారికి ధైర్యం చెబుతూ ఆమెకు అన్ని విధాలుగా అండగా ఉంటామని తెలిపారు.ఈ కార్యక్రమంలో పెద్దమందడి జిల్లా పరిషత్ ఉన్నత పాఠశాల 2005-06 బ్యాచ్‌కు చెందిన పూర్వ విద్యార్థులు పాల్గొన్నారు.