ఎల్కతుర్తి. ఫిబ్రవరి 21 (తెలంగాణ ముచ్చట్లు)
నిజాంబాద్లో ఘనంగా నిర్వహించిన AISF తెలంగాణ రాష్ట్ర నాలుగో మహాసభలు రాష్ట్రవ్యాప్తంగా విద్యార్థి ఉద్యమానికి కొత్త దిశానిర్దేశం చేశాయి. ఫిబ్రవరి 18, 19, 20 తేదీలలో మూడు రోజుల పాటు జరిగిన ఈ మహాసభల్లో విద్య, ఉపాధి, సామాజిక న్యాయం, ప్రభుత్వ విద్యా విధానాలపై విస్తృత చర్చలు జరిగాయి. ఈ సందర్భంగా ఎల్కతుర్తి మండలానికి చెందిన భాష బోయిన సంతోష్, వుట్కూరి ప్రణీత్ గౌడ్ రాష్ట్ర సమితి సభ్యులుగా ఎన్నిక కావడం స్థానికంగా హర్షం వ్యక్తమవుతోంది.
సూరారం గ్రామానికి చెందిన భాష బోయిన సంతోష్ విద్యార్థుల హక్కుల సాధనలో ముందుండి పోరాటాలు చేపడుతూ హాస్టల్ సదుపాయాలు, ఫీజు బకాయిల చెల్లింపులు, ప్రభుత్వ విద్యాసంస్థల అభివృద్ధి కోసం నిరంతరం కృషి చేస్తున్నారు. ప్రస్తుతం హనుమకొండ జిల్లా ప్రధాన కార్యదర్శిగా బాధ్యతలు నిర్వహిస్తూ విద్యార్థి సమస్యలను రాష్ట్ర స్థాయికి తీసుకెళ్తున్నారు. ఉద్యమాల నేపథ్యంలో పలు కేసులు ఎదుర్కొన్నప్పటికీ ఆయన తన పోరాటాన్ని కొనసాగిస్తున్నారు.
గోపాల్పూర్ గ్రామానికి చెందిన వుట్కూరి ప్రణీత్ గౌడ్ గత 12 సంవత్సరాలుగా విద్యార్థి ఉద్యమంలో చురుకుగా పాల్గొంటూ సమాన విద్యావకాశాలు, సామాజిక న్యాయం కోసం పలు ఆందోళనలు చేపట్టారు. ప్రస్తుతం హనుమకొండ జిల్లా అధ్యక్షుడిగా కొనసాగుతూ యువతను ఉద్యమాల దిశగా సమీకరిస్తున్నారు. సిద్ధాంత నిబద్ధతతో పనిచేస్తున్న ఆయనకు మహాసభల్లో ప్రత్యేక గుర్తింపు లభించింది.
మహాసభల్లో ప్రభుత్వ విద్యా విధానాల్లో మార్పులు, ప్రభుత్వ పాఠశాలలు–కాలేజీల బలోపేతం, నిరుద్యోగ యువతకు ఉపాధి అవకాశాల కల్పన వంటి అంశాలపై తీర్మానాలు ఆమోదించబడినట్లు నిర్వాహకులు తెలిపారు. గ్రామీణ ప్రాంతాల నుంచి రాష్ట్ర స్థాయికి ఎదుగుతున్న నాయకత్వానికి ఇది గుర్తింపుగా నిలిచిందని స్థానిక విద్యార్థి సంఘాలు అభిప్రాయపడ్డాయి.
ఎల్కతుర్తి మండలానికి చెందిన ఇద్దరు నాయకులు రాష్ట్ర సమితిలో చోటు దక్కించుకోవడం యువతలో ఉత్సాహాన్ని నింపగా, వారి నాయకత్వంలో విద్యార్థి ఉద్యమం మరింత బలపడాలని ప్రజలు ఆశాభావం వ్యక్తం చేస్తున్నారు.
Comments