సండ్ర అభ్యర్థులను ఓడించాలి

-మాజీ ఎస్సి కార్పొరేషన్ చైర్మన్,కాంగ్రెస్ పార్టీ రాష్ట్ర నాయకులు పిడమర్తి రవి

హైదరాబాద్,ఫిబ్రవరి9(తెలంగాణ ముచ్చట్లు):

ఈనెల 11న జరగనున్న మున్సిపల్ ఎన్నికల్లో సత్తుపల్లి నియోజకవర్గంలోని సత్తుపల్లి, కల్లూరు మున్సిపాలిటీలలో పోటీ చేస్తున్న కాంగ్రెస్ పార్టీ అభ్యర్థులను అత్యధిక మెజార్టీతో గెలిపించాలని రాష్ట్ర కాంగ్రెస్ పార్టీ నాయకుడు, మాజీ ఎస్సీ కార్పొరేషన్ చైర్మన్ పిడమర్తి రవి ప్రజలను కోరారు.
ఈ సందర్భంగా నిర్వహించిన సమావేశంలో ఆయన మాట్లాడుతూ, ప్రజల సమస్యలపై నిరంతరం పోరాడుతూ ప్రజాస్వామ్య విలువలకు కట్టుబడి పనిచేస్తున్న పార్టీగా కాంగ్రెస్ నిలిచిందన్నారు. స్థానిక సంస్థల ఎన్నికలు ప్రజల రోజువారీ జీవనంతో నేరుగా ముడిపడి ఉంటాయని, మున్సిపాలిటీల అభివృద్ధి ప్రజల చేతుల్లోనే ఉందని పేర్కొన్నారు. పారిశుధ్యం, తాగునీరు, రహదారులు, వీధి దీపాలు వంటి మౌలిక వసతుల మెరుగుదల కోసం ఈ ఎన్నికల్లో ప్రజలు స్పష్టమైన నిర్ణయం తీసుకోవాల్సిన అవసరం ఉందన్నారు.

వివిధ పార్టీల మధ్య మారుతూ చివరికి బీఆర్ఎస్‌కు చెందిన సండ్ర వెంకట వీరయ్య తరఫున నిలబడిన అభ్యర్థులను ఈ ఎన్నికల్లో ఓడించాలని ఆయన పిలుపునిచ్చారు. పార్టీ మార్పుల రాజకీయాలు ప్రజలకు ఎలాంటి మేలు చేయవని, స్థిరమైన విధానాలు, స్పష్టమైన అభివృద్ధి దృష్టికోణం ఉన్న కాంగ్రెస్ అభ్యర్థులకే ఓటు వేయాలని కోరారు. మున్సిపల్ స్థాయిలో పారదర్శక పాలనను నెలకొల్పడం, ప్రజల భాగస్వామ్యంతో అభివృద్ధి కార్యక్రమాలు అమలు చేయడమే కాంగ్రెస్ లక్ష్యమని తెలిపారు.
ఈ సమావేశంలో రాష్ట్ర కాంగ్రెస్ పార్టీ నాయకుడు బొక్కల గడ్డ చంద్రశేఖర్ తో పాటు పలువురు పార్టీ నాయకులు, కార్యకర్తలు పాల్గొన్నారు.