ఇల్లందకుంటలో గ్రామీణ యువతకు ఉచిత ఏఐ శిక్షణ కేంద్రం.

ఇల్లందకుంట, నవంబర్ 11 (తెలంగాణ ముచ్చట్లు):

రాబోయే ఐదు సంవత్సరాల్లో విద్య, వ్యవసాయం, వైద్యం సహా అన్ని రంగాల్లో కృత్రిమ మేధస్సు (ఏఐ) ద్వారా విప్లవాత్మక మార్పులు చోటుచేసుకోనున్నాయని యాప్ టీవీ అధినేత ఉదయానంద రెడ్డి అన్నారు. మారుతున్న సాంకేతిక పరిజ్ఞానానికి అనుగుణంగా గ్రామీణ ప్రాంత యువతకు సైతం ఏఐపై అవగాహన, నైపుణ్యాలు కల్పించాలనే ఉద్దేశంతో ఇల్లందకుంట మండల కేంద్రంలో ఉచిత ఏఐ శిక్షణ కేంద్రాన్ని ఏర్పాటు చేసినట్లు తెలిపారు.
ఆరో తరగతి చదువుతున్న విద్యార్థుల నుంచి ఉన్నత విద్యను అభ్యసిస్తున్న యువత వరకు ఈ కేంద్రంలో ఉచితంగా ఏఐ శిక్షణ అందించనున్నట్లు వెల్లడించారు. పట్టణ ప్రాంతాల విద్యార్థులకు మాత్రమే కాకుండా గ్రామీణ ప్రాంతాల యువతకు కూడా ఆధునిక సాంకేతిక విద్య అందుబాటులో ఉండాలన్నదే తమ లక్ష్యమని పేర్కొన్నారు.
గతంలో వీణవంక మండల కేంద్రంలో ఉచిత కంప్యూటర్ శిక్షణ కేంద్రాన్ని ఏర్పాటు చేసి పలువురు యువతకు ఉద్యోగ అవకాశాలు పొందేందుకు సహకరించినట్లు తెలిపారు. ఇదే స్ఫూర్తితో రాబోయే రోజుల్లో హుజూరాబాద్ కేంద్రంగా కూడా ఉచిత ఏఐ శిక్షణ కేంద్రాన్ని ఏర్పాటు చేయనున్నట్లు వెల్లడించారు.
గ్రామీణ యువత సాంకేతిక రంగంలో ముందంజ వేయడంతో పాటు భవిష్యత్తులో అందుబాటులోకి వచ్చే ఉద్యోగ, ఉపాధి అవకాశాలను సద్వినియోగం చేసుకోవాలనే లక్ష్యంతో ఈ కార్యక్రమాన్ని చేపట్టినట్లు ఉదయానంద రెడ్డి వివరించారు.
ఈ కార్యక్రమంలో గ్రామ సర్పంచ్, ఉపసర్పంచ్, వార్డు సభ్యులు, వివిధ రాజకీయ పార్టీల నాయకులు, వివిధ గ్రామాలకు చెందిన ప్రజలు పాల్గొన్నారు.