జర్నలిస్టుల హక్కుల సాధనలో ఐఎఫ్‌డబ్ల్యూజే కీలక పాత్ర.

*జర్నలిస్టుల రక్షణకు ప్రత్యేక చట్టం తీసుకురావాలి*

*సీనియర్ పాత్రికేయులకు జాతీయ పెన్షన్ పథకం అమలు చేయాలి*

*టిడబ్ల్యూజేఎఫ్ జిల్లా కార్యదర్శి కుడుతాడు బాపూరావు*

*ఘనంగా ఐఎఫ్‌డబ్ల్యూజే ఆవిర్భావ దినోత్సవ వేడుకలు*

కరీంనగర్, అక్టోబర్ 28(తెలంగాణ ముచ్చట్లు ):

జర్నలిస్టుల హక్కుల పరిరక్షణ, ఉద్యోగ భద్రత, వృత్తిపరమైన స్వేచ్ఛ కోసం ఇండియన్ ఫెడరేషన్ ఆఫ్ వర్కింగ్ జర్నలిస్ట్స్ (ఐఎఫ్‌డబ్ల్యూజే) ఏడు దశాబ్దాలకు పైగా నిరంతరం పోరాటం చేస్తోందని తెలంగాణ వర్కింగ్ జర్నలిస్ట్ ఫెడరేషన్ (టిడబ్ల్యూజేఎఫ్) జిల్లా కార్యదర్శి కుడుతాడు బాపూరావు అన్నారు. జర్నలిస్టుల సమస్యల పరిష్కారం కోసం సంఘటితంగా పోరాడుతూ, మీడియా స్వేచ్ఛను కాపాడుకోవాలని ఆయన పిలుపునిచ్చారు.
ఐఎఫ్‌డబ్ల్యూజే ఆవిర్భావ దినోత్సవ వేడుకలను బుధవారం కరీంనగర్‌లోని టిడబ్ల్యూజేఎఫ్ కార్యాలయంలో ఘనంగా నిర్వహించారు. ఈ సందర్భంగా సీనియర్ జర్నలిస్టులు పీఎస్ రవీంద్ర, కొరిమి వెంకటస్వామి, డీఎస్ ప్రసాద్, ఆడెపు లక్ష్మీనారాయణ, ఆరెల్లి శ్రీనివాస్‌లను ఘనంగా సన్మానించారు. అనంతరం నిర్వహించిన కార్యక్రమంలో బాపూరావు మాట్లాడుతూ, ఐఎఫ్‌డబ్ల్యూజే జాతీయ కమిటీ పిలుపు మేరకు దేశవ్యాప్తంగా ఆవిర్భావ దినోత్సవ కార్యక్రమాలు నిర్వహిస్తున్నట్లు తెలిపారు.
1950 అక్టోబర్ 28న న్యూఢిల్లీలో ఏర్పాటైన ఐఎఫ్‌డబ్ల్యూజే దేశవ్యాప్తంగా జర్నలిస్టులను ఐక్యం చేస్తూ వారి హక్కుల పరిరక్షణకు కృషి చేస్తోందన్నారు. వేతనాల పెంపు, మెరుగైన సేవా నిబంధనలు, పని గంటల క్రమబద్ధీకరణ, ఉద్యోగ భద్రత వంటి అంశాల్లో జర్నలిస్టుల హక్కుల సాధనకు సంస్థ అనేక ఉద్యమాలు చేపట్టిందని గుర్తుచేశారు. వర్కింగ్ జర్నలిస్టుల చట్టం, వేతన సవరణలు, పత్రికా రంగానికి సంబంధించిన వివిధ కమిటీల్లో జర్నలిస్టులకు ప్రాతినిధ్యం కల్పించడం వంటి అంశాల్లో పాత్రికేయ సంఘాల పోరాటాలు కీలకంగా నిలిచాయని పేర్కొన్నారు.
ప్రజా సమస్యలను వెలుగులోకి తీసుకువస్తూ ప్రజాస్వామ్య పరిరక్షణలో కీలక పాత్ర పోషిస్తున్న జర్నలిస్టుల సంక్షేమం, హక్కుల పరిరక్షణకు కేంద్ర ప్రభుత్వం ప్రత్యేక చర్యలు తీసుకోవాలని ఆయన కోరారు. పాత్రికేయులు వృత్తిపరమైన స్వేచ్ఛను కాపాడుకుంటూ ప్రజలకు వాస్తవాలను అందించడంలో తమ బాధ్యతను కొనసాగించాలని సూచించారు.
జర్నలిస్టుల భద్రతకు చట్టపరమైన రక్షణ కల్పించాలి
దేశవ్యాప్తంగా జర్నలిస్టులపై దాడులు, హత్యలు, బెదిరింపులు, అక్రమ కేసులు పెరుగుతుండటం ఆందోళన కలిగిస్తోందని కుడుతాడు బాపూరావు అన్నారు. విధి నిర్వహణలో భాగంగా ప్రజా సమస్యలను వెలుగులోకి తీసుకొస్తున్న జర్నలిస్టులకు రక్షణ కల్పించేందుకు కేంద్ర ప్రభుత్వం ప్రత్యేక చట్టాన్ని తీసుకురావాలని డిమాండ్ చేశారు. జర్నలిస్టుల భద్రతకు చట్టపరమైన రక్షణ కల్పించి, వారు ఎలాంటి ఒత్తిళ్లకు గురికాకుండా విధులు నిర్వహించే వాతావరణాన్ని కల్పించాలని కోరారు.
దేశవ్యాప్తంగా వివిధ పత్రికలు, వార్తా సంస్థలు, ఎలక్ట్రానిక్ మీడియాల్లో పనిచేస్తున్న జర్నలిస్టుల వివరాలను ధ్రువీకరించి జాతీయ స్థాయిలో ప్రత్యేక రిజిస్టర్ రూపొందించాలని సూచించారు. దీనివల్ల అర్హులైన జర్నలిస్టులను గుర్తించడంతోపాటు, వారికి సంక్షేమ పథకాలు అమలు చేయడానికి, ప్రభుత్వ సహాయ కార్యక్రమాలను సమర్థవంతంగా రూపొందించడానికి అవకాశం కలుగుతుందని వివరించారు.
అలాగే, అరవై ఏళ్లు దాటిన సీనియర్ జర్నలిస్టులకు ఆర్థిక భరోసా కల్పించేందుకు దేశవ్యాప్తంగా అమలయ్యే జాతీయ పెన్షన్ పథకాన్ని ప్రవేశపెట్టాలని కేంద్ర ప్రభుత్వాన్ని కోరారు. జీవితంలో ఎక్కువకాలం ప్రజలకు సమాచారాన్ని అందిస్తూ, సమాజానికి సేవ చేసిన సీనియర్ పాత్రికేయులు వృద్ధాప్యంలో ఆర్థిక ఇబ్బందులు ఎదుర్కోకుండా ప్రభుత్వం అండగా నిలవాలని అన్నారు.
గతంలో జర్నలిస్టులకు అందుబాటులో ఉన్న రైల్వే ప్రయాణ రాయితీ పాస్‌లను పునరుద్ధరించాలని డిమాండ్ చేశారు. జర్నలిస్టుల కుటుంబాలకు మెరుగైన వైద్య సదుపాయాలు, సంక్షేమ పథకాలు, సామాజిక భద్రత కల్పించడంతోపాటు, వృత్తిలో ఎదురయ్యే సమస్యల పరిష్కారానికి ప్రత్యేక వ్యవస్థను ఏర్పాటు చేయాలని కోరారు.
జర్నలిస్టుల ఐక్యతతోనే హక్కుల సాధన సాధ్యం
ఈ సందర్భంగా సీనియర్ జర్నలిస్టు పీఎస్ రవీంద్ర మాట్లాడుతూ, జర్నలిస్టుల సంఘాలకు నాయకత్వం వహించే వ్యక్తులు పదవులకే పరిమితం కాకుండా సంఘాల బలోపేతానికి నిరంతరం కృషి చేయాలని అభిప్రాయపడ్డారు. జర్నలిస్టుల హక్కుల సాధన, వృత్తిపరమైన భద్రత, సంక్షేమం కోసం నాయకులు నిబద్ధతతో పనిచేయాలని సూచించారు.
స్పష్టమైన లక్ష్యాన్ని నిర్దేశించుకుని, దానిని సాధించే దిశగా సంకల్పబలంతో ముందుకు సాగినప్పుడే నాయకత్వానికి సార్థకత చేకూరుతుందని అన్నారు. జర్నలిస్టులు ఎదుర్కొంటున్న సమస్యలపై నిరంతరం స్పందించడం, వారి గొంతుకగా నిలవడం, అవసరమైన సందర్భాల్లో అధికారులతో చర్చించి సమస్యల పరిష్కారానికి కృషి చేయడం నాయకుల ప్రధాన బాధ్యతలని వివరించారు.
సంఘంలోని సభ్యులందరినీ కలుపుకొని పోతూ, వారి అభిప్రాయాలకు ప్రాధాన్యం ఇవ్వాలని సూచించారు. కష్టాల్లో ఉన్న జర్నలిస్టులకు అండగా నిలవడంతోపాటు, హక్కుల పరిరక్షణ కోసం ఐక్యంగా పోరాడే వాతావరణాన్ని కల్పించాలన్నారు. సంఘం అభివృద్ధి ఒక్కరోజులో సాధ్యమయ్యేది కాదని, నిరంతర కృషి, క్రమశిక్షణ, పారదర్శకత, సేవాభావంతోనే సాధ్యమవుతుందని పేర్కొన్నారు.
వ్యక్తిగత ప్రయోజనాల కంటే జర్నలిస్టుల సామూహిక ప్రయోజనాలకు పెద్దపీట వేస్తూ, ఇచ్చిన మాటకు కట్టుబడి పనిచేసే నాయకుడే నిజమైన నాయకుడిగా గుర్తింపు పొందుతారని అన్నారు. జర్నలిస్టుల హక్కుల సాధనను బాధ్యతగా స్వీకరించి, సంఘాన్ని మరింత బలోపేతం చేయడమే ప్రతి నాయకుడి లక్ష్యం కావాలని స్పష్టం చేశారు.
ఈ కార్యక్రమంలో టిడబ్ల్యూజేఎఫ్ రాష్ట్ర కమిటీ సభ్యుడు గాదె కరుణాకర్ రావు, జిల్లా ఉపాధ్యక్షుడు కొమ్ము గణేష్, లక్కం సురేష్, సహాయ కార్యదర్శి ఎండీ ఖాజా, హుజూరాబాద్ నియోజకవర్గ అధ్యక్షుడు సౌడమల్ల యోహాన్, నాయకులు శంకర్ రెడ్డి, రాజేంద్రప్రసాద్, నరేష్, దీక్షిత్, రాజు, రవి, యూసఫ్ తదితర జర్నలిస్టులు పాల్గొన్నారు.