ఇనుప తీగకు విద్యుత్‌ ప్రసారం.. వివాహిత మృతి.!

- బట్టలు ఆరేస్తుండగా ప్రమాదం.
- కాపాడేందుకు వెళ్లిన తండ్రికి షాక్‌.

చండ్రుగొండ, అక్టోబరు 28 (తెలంగాణ ముచ్చట్లు):

బట్టలు ఆరేస్తుండగా ఇనుప తీగకు విద్యుత్‌ ప్రసారం కావడంతో షాక్‌కు గురై ఓ వివాహిత మృతి చెందింది. ఆమెను కాపాడేందుకు ప్రయత్నించిన తండ్రి కూడా విద్యుత్‌ షాక్‌కు గురయ్యారు. ఈ ఘటన చండ్రుగొండ మండలం పోకలగూడెం గ్రామ పరిధిలోని శ్రీ వెంకటేశ్వర బ్రిక్స్‌ కంపెనీ వద్ద బుధవారం చోటుచేసుకుంది. ఒడిశా రాష్ట్రం మల్కన్‌గిరి జిల్లాకు చెందిన బాలు అర్జున్‌ కుటుంబం ఉపాధి నిమిత్తం గత ఆరు నెలలుగా సదరు బ్రిక్స్‌ కంపెనీలో పనిచేస్తూ అక్కడే నివాసముంటోంది. ఈ క్రమంలో బుధవారం మధ్యాహ్నం సుమారు పన్నెండు గంటల సమయంలో బాలు అర్జున్‌ భార్య బాల రాజమణి (ఇరవై ఏడు) బట్టలు ఉతికి ఇనుప తీగపై ఆరేస్తుండగా, ఆ తీగకు విద్యుత్‌ ప్రసారం కావడంతో షాక్‌కు గురైంది. ఆమెను రక్షించేందుకు వెళ్లిన తండ్రి దీనబంధుకు కూడా విద్యుత్‌ షాక్‌ తగిలి కిందపడిపోయారు. ఈ ప్రమాదంలో బాల రాజమణి అక్కడికక్కడే మృతి చెందింది. మృతురాలి భర్త బాలు అర్జున్‌ ఇచ్చిన ఫిర్యాదు మేరకు చండ్రుగొండ పోలీసులు కేసు నమోదు చేసి దర్యాప్తు చేస్తున్నారు.